VyavaLevi 14:1-57
14 Yehova ahanjikile lika kuli Mose ngwenyi:
2 “Elu lukiko lushimbi lwamuka-mbumba luze namukavangizanga halikumbi lize navamuneha kuli kapilishitu+ mangana vamutomese:
3 Kapilishitu akaye kusali yachilombo nakukekesa uze muka-mbumba. Nge uze muka-mbumba vanamuku kumbumba yenyi,
4 kapilishitu akamulweze akanehe tujila vavali vavatonyi vaze vanatomo, namushitale, nawanda uchila, nahusope* vyakuzachisa hakulitomesa.+
5 Kapilishitu akavalweze vakajihile kajila umwe mundeho yauma muze muli meya akulwiji.
6 Oloze akambate uze kajila wamutonyi, namushitale, nawanda uchila, nahusope, akavitupike mumanyinga ayauze kajila vajihilanga mundeho yili nameya akulwiji.
7 Akasapwile aze manyinga mapapa 7 hamutu uze navatomesa kumbumba, akamuvilike nawa ngwenyi natomo. Kaha akeche uze kajila wamutonyi akaliyile tuhu muchipapa.+
8 “Mutu uze vanatomesa akakose uvwalo wenyi, akateule jikambu jenyi josena nakusana meya, kaha mwakatoma. Kufumaho akengile jino muchilombo, oloze akatwame kuweluka wambalaka yenyi hamakumbi 7.
9 Halikumbi lyakusokesa 7, akateule jikambu jakumutwe wenyi josena, nawevu wenyi, naungona wahavikenyikenyi vyenyi. Omu mwakakumisa kuteula, akakose uvwalo wenyi nakusana meya, kaha mwakatoma.
10 “Kaha halikumbi lyakusokesa 8, akanehe vana vamikoko vavizamba vavali valambwe, namukoko wachihwevo umwe walambwe+ wamwaka umwe, navimbwa vitatu vyaunga wamwaza vyakusokesa muvimbwa 10 vyalifwa* vyakuchingasana namaji kupwa wana wamanona,+ nalongo* yamaji yimwe.+
11 Kapilishitu uze mwakavilika mutu uze navatomesa ngwenyi natomo, akamunehe kumeso aYehova kuchikolo chambalaka yakuliwanyina nawaze mawana.
12 Kapilishitu akambate uze mwanamukoko wachizamba akamuhane kupwa wana wahamulonga+ nayize longo yamaji yimwe, kaha akavihungise noku noku kupwa wana wakuhungisa kumeso aYehova.+
13 Kaha akajihile uze mwanamukoko wachizamba muchihela chajila muze veji kujihilanga vimuna vawana wahashili,+ navimuna vawana wakulumba mwomwo wana wahamulonga unapu wakapilishitu+ ngana muze wapwa wana wahashili. Unapu wajila chikuma.+
14 “Kapilishitu akambate manyinga amwe achimuna wawana wahamulonga, akawashile kusongo yalitwitwi lyamutu uze navatomesa, nakumunwe wenyi washina wakulivoko lyachilyo, nakumunwe wenyi washina wakulihinji lyachilyo.
15 Kapilishitu akambate maji amwe kuze kulongo yamaji,+ akawahingunwine mulivoko lyenyi lyachimoswe.
16 Akatupike jino munwe wenyi wakuchilyo muze mumaji ali mulivoko lyenyi lyachimoswe, akawasapwile namunwe wenyi hamavu mapapa 7 kumeso aYehova.
17 Uze kapilishitu akambate maji amwe aze anasale mulivoko lyenyi, akawashile kusongo yalitwitwi lyakuchilyo lyayauze navatomesa, nakumunwe wenyi washina wakulivoko lyachilyo, nakumunwe wenyi washina wakulihinji lyachilyo kuze ashilanga manyinga achimuna wawana wahamulonga.
18 Maji aze nawakasala mulivoko lyakapilishitu akawahake hamutwe wayauze navatomesa, kaha kapilishitu mwakamulingila chakufwika hashili kumeso aYehova.+
19 “Kapilishitu akahane chimuna wawana wahashili+ nakulingila mutu uze navatomesa chakufwika hashili. Kufumaho akajihe chimuna wawana wakulumba.
20 Kapilishitu akalumbe wana wakulumba nawana wamanona+ halijiko lyakulumbila, kaha mwakamulingila chakufwika hashili,+ ngocho mwakatoma.+
21 “Oloze nge mutu kana chihutu, keshi navikumbako, kaha akanehe mwanamukoko umwe wachizamba wawana wahamulonga kupwa wana wakuhungisa mangana vakamulingile chakufwika hashili. Akanehe nachimbwa chimwe chaunga wamwaza chakusokesa muvimbwa 10 vyalifwa* chakuchingasana namaji, kupwa wana wamanona, nalongo yamaji yimwe,
22 natutela vavali, chipwe vana vatukwilimba vavali kweseka nomu mwahashila. Kajila umwe akapwe wawana wahashili, kaha kajila mukwavo akapwe wawana wakulumba.+
23 Kaha halikumbi lyakusokesa 8+ akavinehe kuchikolo chambalaka yakuliwanyina kumeso aYehova mangana kapilishitu akamutomese.+
24 “Kapilishitu akambate uze mwanamukoko wachizamba wawana wahamulonga,+ nayize longo yamaji yimwe, akavihungise noku noku kupwa wana wakuhungisa kumeso aYehova.+
25 Kaha akajihe uze mwanamukoko wachizamba wawana wahamulonga, akambate manyinga enyi amwe nakuwashila kusongo yalitwitwi lyachilyo lyamutu uze navatomesa, nakumunwe wenyi washina wakulivoko lyachilyo, nakumunwe wenyi washina wakulihinji lyachilyo.+
26 Uze kapilishitu akahingunwine maji amwe mulivoko lyenyi lyachimoswe,+
27 kaha akatupike munwe wenyi wakulivoko lyachilyo mumaji amuze mulivoko lyenyi lyachimoswe, kaha akawasapwile hamavu mapapa 7 kumeso aYehova.
28 Uze kapilishitu akambate manyinga amwe aze ali mulivoko lyenyi, akawashile kusongo yalitwitwi lyachilyo lyayauze navatomesa, nakumunwe wenyi washina wakulivoko lyachilyo, nakumunwe wenyi washina wakulihinji lyachilyo kuze ashilanga manyinga achimuna wawana wahamulonga.
29 Kaha maji aze anasale mulivoko lyenyi akawahake hamutwe wayauze navatomesa mangana akamulingile chakufwika hashili kumeso aYehova.
30 “Hatujila kana akahaneho katela umwe, chipwe mwanakakwilimba umwe, kweseka nomu nahashila.+
31 Kajila umwe akapwe wawana wahashili, kaha kajila mukwavo akapwe wawana wakulumba.+ Akavahanyine kumwe nawana wamanona. Uze kapilishitu mwakalingila uze navatomesa chakufwika hashili kumeso aYehova.+
32 “Elu lukiko lushimbi lwamutu uze ali namusongo wambumba, uze keshi navyuma vyakuhana mangana vamutomeseko.”
33 Jino Yehova ambile kuli Mose naAlone ngwenyi:
34 “Omu namukalinga himunengila lyehi mulifuchi lyaKanane+ lize nangumihana kupwa luheto lwenu,+ omu nangukahaka musongo wambumba+ muzuvo yamutu mulifuchi kana,
35 mwenyazuvo kana akeze nakulweza kapilishitu ngwenyi, ‘Muzuvo yami muli vimwe vinafwane nge musongo.’
36 Kapilishitu akamulweze akafumise vyuma vyosena vize vili muzuvo shimbu kanda ezenga nakwingilamo nakukekesa uze musongo kuchina mwakavivilika ngwenyi vinapihi. Kapilishitu akengile jino muze muzuvo nakukekesamo.
37 Akakekese haze hali musongo, nge hajimbango jayize zuvo hali mapenga ausungwa chipwe achiluluka, kaha nawa uze musongo uli nakusoloka nge unatokola hambango yazuvo,
38 kapilishitu akalovoke kuchikolo, akasokeko nakuyiseza hamakumbi 7.+
39 “Jino uze kapilishitu akakinduluke nakukekesa yize zuvo halikumbi lyakusokesa 7. Kaha nge uze musongo unatande hajimbango josena,
40 akavalweze vakafumisemo malolwa aze anakwate musongo, vakawambile kuweluka wanganda kuchihela chamajilo.
41 Akavalweze vakalamune ndaka yosena yize vasalimbisa mukachi kazuvo, nakuyimbila kuweluka wanganda kuchihela chamajilo.
42 Kaha vakahake malolwa eka muze vafumisanga malolwa akwavo, vakasalimbe yize zuvo nandaka yeka.
43 “Kachi nge musongo nawingila cheka muzuvo yize vafumisanga lyehi malolwa, nakulamuna ndaka, nakuyisalimba,
44 kaha kapilishitu akengilemo nakuyikekesa cheka. Kachi nge mwawana uze musongo unatande chikuma muzuvo, kaha muli mbumba yayipi.+ Zuvo kana yinapihi.
45 Uze kapilishitu akapuzwise yize zuvo, namalolwa ayo, namaliva ayo, nandaka yosena, nakuvimbila kuweluka wanganda kuchihela chamajilo.+
46 Weshowo mwakengilamo hamakumbi aze vanayiseze+ mwakapihya palanga nakuchingoloshi.+
47 Weshowo mwakasavalamo chipwe kulilamo vyakulya akakose uvwalo wenyi.
48 “Kachi nge omu mwakeza kapilishitu mwakamona ngwenyi uze musongo kawatanjile muze muzuvoko omu vanayisalimba lyehi, kaha akayivilike ngwenyi yinatomo mwomwo uze musongo unakumu.
49 Hakutomesa yize zuvo kumusongo,* akanehe tujila vavali, namushitale, nawanda uchila, nahusope.+
50 Akajihile kajila umwe mundeho yauma muze muli meya akulwiji.
51 Kaha akambate uze mushitale, nahusope, nawanda uchila, nauze kajila wamutonyi, akavimbwichike mumanyinga akajila uze vajihilanga muze mundeho yameya akulwiji, kaha akasapwile kuze kuzuvo mapapa 7.+
52 Ngocho yize zuvo mwakayitomesa kumusongo* kana namanyinga ayauze kajila, nameya akulwiji, nauze kajila wamutonyi, namushitale, nahusope, nawanda uchila.
53 Kapilishitu akeche uze kajila wamutonyi kuweluka wanganda akaliyile muchipapa. Ngocho mwakalingila yize zuvo chakufwika hashili, kaha nayikatoma.
54 “Elu lukiko lushimbi lwambumba yakumutwe chipwe yakumulungu,+
55 chipwe yakuuvwalo+ chipwe yamuzuvo,+
56 chipwe lwachijimbo, namavanda, namapenga,+
57 lwakwijivilaho numba nge chuma chinapihi nyi chinatomo.+ Elu lukiko lushimbi lwambumba.”+
Kwinyikila Chamwishi
^ Tala Mukana waMazu.
^ Vimbwa vitatu vyakusokesa muvimbwa 10 vyalifwa vyapwile jilita 6.6. Tala Chihande B14.
^ Longo yimwe yapwile jilita 0.31. Tala Chihande B14.
^ Chimbwa chimwe chakusokesa muvimbwa 10 vyalifwa chapwile jilita 2.2. Tala Chihande B14.
^ Hepe., “kushili.”
^ Hepe., “kushili.”
