VyavaLevi 15:1-33
-
Vyuma vyavipi vize vili nakuhita kuusonyi (1-33)
15 Yehova ahanjikile lika kuli Mose naAlone ngwenyi:
2 “Hanjika kuli vaIsalele ngwove, ‘Kachi nge lunga ali navimwe vili nakuhita kuusonyi wenyi,* vyuma kana navimupihisa.+
3 Lunga kana mwapihya, numba vyuma kana vihita lika kuusonyi wenyi, numba vijika muze vili nakuhichila.
4 “‘Kachi nge mutu uze ali navize vili nakumuhita mwasavala hakahela, kahela kana nakapihya. Kaha cheshocho chuma mwatwamaho nachipihya.
5 Weshowo mwakwata kukahela kamutu kana akose uvwalo wenyi nakusana meya, oloze mwapihya palanga nakuchingoloshi.+
6 Weshowo mwatwama hachuma chize atwamanga mutu uze ali navimwe vili nakumuhita, akose uvwalo wenyi nakusana meya, oloze mwapihya palanga nakuchingoloshi.
7 Weshowo mwakwata hamujimba wamutu uze ali navimwe vili nakumuhita, akose uvwalo wenyi nakusana meya, oloze mwapihya palanga nakuchingoloshi.
8 Kachi nge mutu uze ali navize vili nakumuhita mwafwijila maleji hamutu uze natomo, mutu uze vanafwijila maleji akose uvwalo wenyi nakusana meya, oloze mwapihya palanga nakuchingoloshi.
9 Yeshoyo selei mwatwama mutu uze ali navimwe vili nakumuhita kuusonyi wenyi nayipihya.
10 Weshowo mwakwata chuma chize atwamanga mutu kana, mwapihya palanga nakuchingoloshi. Kaha weshowo mwambata chuma kana akose uvwalo wenyi nakusana meya, oloze mwapihya palanga nakuchingoloshi.
11 Kachi nge mutu uze ali navimwe vili nakumuhita+ kasanyine meya kumavoko enyiko, kaha himwakwata mukwavo, uze vanakwate akose uvwalo wenyi nakusana meya, oloze mwapihya palanga nakuchingoloshi.
12 Kachi nge mutu uze ali navimwe vili nakumuhita mwakwata kuchitenga chauma, kaha chitenga kana vachichike chikichiki. Kaha cheshocho chuma chakusonga mwakwata vachikose nameya.+
13 “‘Kachi nge vize vyapwanga nakumuhita kuusonyi wenyi vinakumu, nakupwa jino utoma, akalave makumbi 7 akulitomesa, kaha akakose uvwalo wenyi nakusana meya akulwiji, ngocho mwakatoma.+
14 Halikumbi lyakusokesa 8, akambate tutela vavali chipwe vana vatukwilimba vavali,+ akeze kumeso aYehova kuchikolo chambalaka yakuliwanyina nakuvahana kuli kapilishitu.
15 Uze kapilishitu akahane kajila umwe kupwa wana wahashili, kajila mukwavo kupwa wana wakulumba. Kaha akamulingile chakufwika hashili kumeso aYehova havyuma vyapwanga nakumuhita kuusonyi wenyi.
16 “‘Kachi nge kuusonyi walunga nakulovoka vana, kaha asane meya mujimba wenyi wosena, oloze mwapihya palanga nakuchingoloshi.+
17 Akose uvwalo wenyi nameya nacheshocho chuma chalilambu haze hali vana. Vyuma kana navipihya palanga nakuchingoloshi.
18 “‘Kachi nge lunga napwevo navalisavala, jino uze lunga mwalovola vana, kaha vasane meya, oloze navapihya palanga nakuchingoloshi.+
19 “‘Kachi nge pwevo ali nakuhita manyinga kuusonyi wenyi hakupwa kukakweji, mwapihya hamakumbi 7.+ Weshowo mwamukwata mwapihya palanga nakuchingoloshi.+
20 Cheshocho chuma mwasavalaho shimbu napihi hakupwa kukakweji, nachipihya. Kaha vyeshovyo vyuma mwatwamaho navipihya.+
21 Weshowo mwakwata kukahela kapwevo kana akose uvwalo wenyi nakusana meya, oloze mwapihya palanga nakuchingoloshi.
22 Weshowo mwakwata chuma chize atwamanga pwevo kana, akose uvwalo wenyi nakusana meya, oloze mwapihya palanga nakuchingoloshi.
23 Kachi nge uze pwevo atwamanga hakahela chipwe hachuma chimwe, kaha weshowo mwakwata kukahela chipwe kuchuma kana mwapihya palanga nakuchingoloshi.+
24 Kachi nge lunga mwalisavala nenyi, kaha manyinga ayauze pwevo ali kukakweji nawamukwata,+ uze lunga mwapihya hamakumbi 7. Kaha keshoko kahela mwasavala uze lunga nakapihya.
25 “‘Kachi nge pwevo ali nakuhita manyinga hamakumbi eka amavulu,+ keshi hamakumbi aze ali kukakwejiko,+ mokomoko nge mwahita manyinga kuhambakanyisa hamakumbi aze eji kupwanga kukakweji, kaha mwapihya hamakumbi osena aze ali nakuhita manyinga, ngana muze eji kupihyanga nge ali kukakweji.
26 Keshoko kahela mwasavala hamakumbi aze mwahita manyinga nakapihya ngana muze keji kupihyanga kaze eji kusavalanga nge ali kukakweji.+ Kaha cheshocho chuma mwatwamaho nachipihya ngana muze eji kupihyanga nge ali kukakweji.
27 Weshowo mwakwata vyuma kana mwapihya, shikaho akose uvwalo wenyi nakusana meya, oloze mwapihya palanga nakuchingoloshi.+
28 “‘Oloze nge uze pwevo natomo kuli vize vyapwanga nakumuhita, kaha akalave makumbi 7 akulitomesa, kufumaho numba akatome.+
29 Jino halikumbi lyakusokesa 8 akambate tutela vavali,+ chipwe vana vatukwilimba vavali, akavanehe kuli kapilishitu kuchikolo chambalaka yakuliwanyina.+
30 Uze kapilishitu akahane kajila umwe kupwa wana wahashili, kaha kajila mukwavo kupwa wana wakulumba. Akalingile uze pwevo chakufwika hashili kumeso aYehova havyuma vize vyapwanga nakumuhita.+
31 “‘Ngocho mukahandunune vaIsalele kukupihya chavo kuchina navafwa hakupihya chavo omu navajilulula tavanaku yami yize yili mukachi kavo.+
32 “‘Elu lukiko lushimbi lwakupandama kulunga uze ali navimwe vili nakumuhita kuusonyi wenyi, nakulunga uze napihi havana vaze vanalovoka kuusonyi wenyi,+
33 nakupwevo uze napihi hakupwa kukakweji,+ nakulunga chipwe pwevo uze ali navimwe vili nakumuhita kuusonyi wenyi,+ nakulunga uze mwalisavala napwevo uze napihi.’”
Kwinyikila Chamwishi
^ Hepe., “kumujimba wenyi.”
