VyavaLevi 16:1-34
-
Likumbi lyaKulinga chaKufwika haShili (1-34)
16 Yehova ahanjikile kuli Mose omu valingile vana vaAlone hivanafu lyehi mwomwo yakupandama kuli Yehova.+
2 Yehova ambile kuli Mose ngwenyi: “Lweza ndumbwove Alone ngwove kanda akengila muchihela chajila+ hakala lwola, kusali yalihina lyakuvatasana,+ kulutwe lwachifwiko chaChikashako kuchina mwakafwa,+ mwomwo nangukasoloka mulivwi+ helu lyachifwiko.+
3 “Evi vikiko mwakambata Alone omu mwakengila muchihela chajila: mwanangombe wakuji wawana wahashili+ nachizamba chamukoko wawana wakulumba.+
4 Akavwale chikuto chajila,+ naputula* yalihina,+ akalikase muhya walihina mumbunda yenyi,+ nakujinga lihina kumutwe wenyi.+ Vyuma kana vinapu vyajila.+ Akasane meya+ numba akavivwale.
5 “Kuli vaIsalele+ akambateko vana vavapembe vavizamba vavali vawana wahashili, nachizamba chamukoko umwe wawana wakulumba.
6 “Alone akahane ngombe yenyi wakuji kupwa wana wahashili, akalingile ivene chakufwika hashili+ navaze vakuzuvo yenyi.
7 “Akambate vapembe vavali, akavemike kumeso aYehova kuchikolo chambalaka yakuliwanyina.
8 Kaha Alone akasakule vaze vapembe vavali natutachikijilo, katachikijilo kamwe kakapwe kapembe yaYehova, kaha kakwavo kakapwe kapembe yaAzazele.*
9 Alone akambate pembe uze vanasakula nakatachikijilo+ kupwa waYehova, akamuhane kupwa wana wahashili.
10 Oloze pembe uze vanasakula nakatachikijilo kupwa waAzazele vakamunehe wamutonyi kumeso aYehova mangana vakalingileho chakufwika hashili, vakamusuwile Azazele mupambo.+
11 “Alone akahane ngombe yenyi wakuji wawana wahashili, akalingile ivene chakufwika hashili navaze vakuzuvo yenyi. Mwakajiha uze ngombe yenyi wakuji wawana wahashili.+
12 “Akambate chinoma chakulumbila vize vyalivumba lyamwaza,+ akachizalise chato namakala akakahya ahalijiko lyakulumbila+ lize lili kumeso aYehova, namavoko avali ato avyuma vyalivumba lyamwaza,+ akavinehe kusali yalihina lyakuvatasana.+
13 Akahake vize vyalivumba lyamwaza hakakahya kumeso aYehova,+ mangana wishi wavize vyalivumba lyamwaza ufwike hachifwiko chaChikasha chaUnjiho+ kuchina mwakafwa.
14 “Kaha akambate manyinga+ amwe angombe wakuji, akawasapwile namunwe wenyi kulutwe lwachifwiko, chakutala kumututuko. Akasapwile nawa manyinga amwe namunwe wenyi mapapa 7 kulutwe lwachifwiko.+
15 “Akajihe pembe wawana wahashili wavatu,+ akanehe manyinga enyi kusali yalihina lyakuvatasana,+ kaha akawalinge ngana muze alinganga namanyinga+ ayauze ngombe wakuji. Akasapwile manyinga kulutwe lwachifwiko.
16 “Kaha chize chihela chajila akachilingile chakufwika hashili havilinga vyavipi vyavaIsalele, nahakuzombwojoka chavo jishimbi, nahashili yavo.+ Omu mukiko mwakalinga kumbalaka yakuliwanyina yize yili muli vana vaIsalele vaze vali navilinga vyavipi.
17 “Omu mwakengilamo Alone nakulinga chakufwika hashili muchihela chajila palanga nomu mwakalovokamo, mumbalaka yakuliwanyina kanda namukapwa lunga wekako. Akalingile ivene chakufwika hashili, navaze vakuzuvo yenyi,+ nachikungulwilo chavaIsalele chosena.+
18 “Akalovoke nakuya kulijiko lyakulumbila+ lize lili kumeso aYehova, kaha akalingile lize lijiko chakufwika hashili. Akambate manyinga amwe angombe wakuji, namanyinga amwe apembe, akawashile kujimbinga jalijiko lyakulumbila jingulwishi.
19 Akasapwile manyinga amwe namunwe wenyi mapapa 7 halijiko lyakulumbila, akalitomese kuvilinga vyavaIsalele vyavipi nakulijilika.
20 “Omu mwakakumisa kulingila chihela chajila, nambalaka yakuliwanyina, nalijiko lyakulumbila+ chakufwika hashili,+ akahane nawa pembe wamutonyi.+
21 Alone akanangike mavoko enyi osena hamutwe wayauze pembe wamutonyi, aketavile kuhenga chavaIsalele chosena, nakuzombwojoka chavo jishimbi, nashili yavo yosena. Akahake milonga yoseneyi hamutwe wayauze pembe,+ kaha navakamusuula kuli lunga uze vatongola kulinga ngocho mangana akaye mupambo.
22 Uze pembe mwakambata milonga yavo yosena,+ kaha vakamusuule akaye mupambo.+
23 “Alone akengile mumbalaka yakuliwanyina, akazule uvwalo uze avwalanga omu engilanga muchihela chajila, akawahake hamavu.
24 Akasane meya+ muchihela chajila, nakuvwala uvwalo wenyi,+ kaha akalovokemo mangana akalumbe wana wenyi wakulumba,+ nawana wakulumba wavatu.+ Akalingile ivene chakufwika hashili, navatu nawa.+
25 Maji achimuna wawana wahashili akawalumbe halijiko lyakulumbila mangana akakakumuke wishi.
26 “Lunga uze mwakasuula pembe yaAzazele,+ akakose uvwalo wenyi, nakusana meya, kaha akeze muchilombo.
27 “Ngombe wawana wahashili, napembe wawana wahashili, vaze vakwechi manyinga avo vanehanga muchihela chajila mangana vawalinge chakufwika hashili, vakavatwale kusali yachilombo. Kaha malambu avo, nanyama yavo, natuji twavo vakavilumbe hakakahya.+
28 Mutu uze mwakalumba vyuma kana akakose uvwalo wenyi, nakusana meya, kaha akeze muchilombo.
29 “Elu lukiko lushimbi namukavangizanga myaka namyaka: Hakakweji wakusokesa 7, halikumbi lyakusokesa 10, enu navaze vanasemukila mulifuchi lyenu chipwe vamwiza vaze muli nakutwama navo mukayanjiwe,* kaha kanda namukazata milimoko.+
30 Mwomwo halikumbi kaneli navakamilingila chakufwika hashili+ mangana vakamivilike ngwavo munatomo. Namukatoma kujishili jenu josena kumeso aYehova.+
31 Chinapu kunoka chasambata kuli enu, kaha mukayanjiwe.*+ Elu nalupwanga lushimbi myaka namyaka.
32 “Kapilishitu vawavisa,+ uze vatongola* ashise ise+ kumulimo waupilishitu,+ mwakalinga chakufwika hashili,+ nakuvwala uvwalo wajila.+
33 Akalingile chihela chajila,+ nambalaka yakuliwanyina,+ nalijiko lyakulumbila+ chakufwika hashili. Akalingile nawa vapilishitu chakufwika hashili, nalizavu lyavatu lyosena.+
34 Elu hilushimbi namukavangizanga myaka namyaka+ mangana mukalingilenga vaIsalele chakufwika hashili mumwaka kamwe hajishili javo.”+
Ngocho alingile ngana muze Yehova alwezele Mose.
Kwinyikila Chamwishi
^ Chipwe “nauvwalo wakwishi.”
^ Pamo kulumbununa “Pembe Uze Nalelangana.”
^ Chipwe “mukayanjise myono yenu.” “Kuliyanjisa” chalumbununa kulikanyisa vyuma vimwe vyakufwana nge vyakulya.
^ Chipwe “mukayanjise myono yenu.”
^ Hepe., “uze vazalisa livoko.”
