VyavaLevi 17:1-16
17 Yehova ahanjikile lika kuli Mose ngwenyi:
2 “Hanjika kuli Alone navana venyi navaIsalele vosena ngwove, ‘Yehova nambe ngwenyi:
3 “‘ “Kachi nge mutu umwe wakuzuvo yaIsalele mwakajihila ngombe wakuji chipwe mwanamukoko wachizamba chipwe pembe muchilombo chipwe kusali yachilombo,
4 chakuzeneka kuneha uze chimuna kuchikolo chambalaka yakuliwanyina mangana amuhane kuli Yehova kupwa wana kulutwe lwatavanaku yaYehova, kaha mutu kana mwakapwa namulonga wamanyinga. Mutu kana namwange manyinga, ngocho vakamujihe
5 mangana vaIsalele vambatenga vimuna javo vakuvatula vaze vali nakujihilanga muchipapa, vavanehenga kuli Yehova, kuchikolo chambalaka yakuliwanyina, kuli kapilishitu. Vahanenga Yehova vimuna kana kupwa mawana akusolola kuunda.+
6 Uze kapilishitu akasapwile manyinga halijiko lyakulumbila lyaYehova kuchikolo chambalaka yakuliwanyina, kaha akalumbe maji mangana akakumuke wishi walivumba lyalupengopengo* kuli Yehova.+
7 Ngocho vimuna vakuvatula kanda vakavahana kuli vandemone vakufwana nge vapembeko,*+ vaze veji kulinganga navo ujila.+ Elu hilushimbi namukavangizanga muvisemunwino vyenu vyosena.” ’
8 “Ukavalweza ngwove, ‘Weshowo mutu wakuzuvo yaIsalele chipwe mwiza uze ali nakutwama muli enu, mwakahana wana wakulumba chipwe chimuna wakuvatula,
9 chakuzeneka kuuneha kuchikolo chambalaka yakuliwanyina mangana auhane kuli Yehova, mutu kana vakamujihe.+
10 “‘Kachi nge mutu wakuzuvo yaIsalele chipwe mwiza uze ali nakutwama muli enu mwalya manyinga,+ nangukamutala nautenu nakumujiha.
11 Mwomwo mwono wachuma chakuyoya watwama mumanyinga,+ kaha ami ngunamihanewo halijiko lyakulumbila+ mangana mulilingile chakufwika hashili, mwomwo manyinga akiko eji kulinganga chakufwika hashili+ hamwono uze uli muwakiko.
12 Shikaho ngunahanjikila kuli vaIsalele ngwami: “Enu kanda namulya manyingako, namwiza nawa uze ali nakutwama muli enu+ kanda mwalya manyingako.”+
13 “‘Kachi nge mutu umwe hali vaIsalele chipwe mwiza uze ali nakutwama muli enu mwaya nakuzomba, kaha himwakwata kanyama chipwe kajila uze veji kulyanga, ahichise manyinga+ ayauze kanyama chipwe uze kajila nakuwashikila mavu.
14 Mwono wachuma chakuyoya akiko manyinga, mwomwo mwono watwama muwakiko. Shikaho ngwahanjikilile kuli vaIsalele ngwami: “Kanda namulya manyinga achuma chakuyoyako, mwomwo mwono wachuma chakuyoya akiko manyinga. Weshowo mwawalya vamujihe.”+
15 Kachi nge mutu* wakusemukila mulifuchi chipwe mwiza mwalya kanyama wakulifwila chipwe uze vanajihi kuli chisuma,+ akose uvwalo wenyi, nakusana meya, oloze mwapihya palanga nakuchingoloshi,+ numba jino atome.
16 Oloze nge keshi kukosa uvwalo wenyiko nakuzeneka nawa kusana, kaha vamuzangamise hakuhenga chenyi.’”+
Kwinyikila Chamwishi
^ Chipwe “lyakusuulwisa; lyakwivwisa kuwaha.”
^ Hepe., “kuli vapembeko.”
^ Chipwe “mwono.”
