VyavaLevi 18:1-30
18 Yehova ahanjikile lika kuli Mose ngwenyi:
2 “Hanjika kuli vaIsalele ngwove, ‘Ami yami Yehova Kalunga kenu.+
3 Kanda namukalinga ngana muze veji kulinganga vatu vamulifuchi lyaEjipitu lize mwatwaminengako. Kanda namukalinga vyuma vize veji kulinganga vatu vamulifuchi lyaKanane muze nguli nakumitwalako,+ kaha kanda namukakavangiza nawa jishimbi javoko.
4 Lamenunga mazu ami akuyula, nakulama nawa jishimbi jami nakujikavangiza.+ Ami yami Yehova Kalunga kenu.
5 Lamenunga jishimbi jami namazu ami akuyula. Weshowo mwalinga ngocho mwayoyanga.+ Ami yami Yehova.
6 “‘Minenu umwe kanda akapandama kuli kausoko kenyi wahalinyinga mangana alisavale nenyiko.*+ Ami yami Yehova.
7 Kanda mukalisavala naiso chipwe nanokoko. Kanda mukalisavala nenyiko mwomwo napu noko.
8 “‘Kanda mukalisavala napwevo lyaisoko,+ mwomwo chinapu kusaula iso.*
9 “‘Kanda mukalisavala nandumbwove wapwevoko, numba apwa mwanaiso chipwe mwananoko, numba asemukila muzuvo yimwe nayove chipwe asemukila kweka.+
10 “‘Kanda mukalisavala namuzukulyove wapwevo, vasema kuli mwanove walunga chipwe kuli mwanove wapwevoko, mwomwo chuma kana chinapu chasonyi.
11 “‘Kanda mukalisavala nandumbwove wapwevo, mwanaiso wakusemena kuli noko wekako, mwomwo napu ndumbwove.
12 “‘Kanda mukalisavala nandumbwaiso wapwevoko, mwomwo napu kausoko kaiso wahalinyinga.+
13 “‘Kanda mukalisavala nandumbwanoko wapwevoko, mwomwo napu kausoko kanoko wahalinyinga.
14 “‘Kanda mukalisavala napwevo lyandumbwaisoko, kulinga ngocho chinapu kusaula ndumbwaiso,* mwomwo napu noko.+
15 “‘Kanda mukalisavala napwevo lyamwanoveko.+ Ikiye napu nokowenu, ngocho kanda mukalisavala nenyiko.
16 “‘Kanda mukalisavala napwevo lyandumbwoveko,+ mwomwo chinapu kusaula ndumbwove.*
17 “‘Kanda mukalisavala napwevo namwanenyi wapwevo hamweko.+ Kaha kanda mukambata mwanamwanenyi walunga chipwe mwanamwanenyi wapwevo nakulisavala navoko. Vanapu vausoko wenyi vahalinyinga. Echi chinapu chuma chaunyengwe.*
18 “‘Kanda mukambata pwevo umuhalikile nandumbwenyi,+ nakulisavala nenyi shimbu ndumbwenyi achili wamutonyi, nakumwivwisa lisunguko.
19 “‘Kanda mukapandama kuli pwevo nakulisavala nenyi shimbu napihi hakupwa kukakwejiko.+
20 “‘Kanda mukalisavala napwevo lyamukwenu,* nakulipihisa ove iveneko.+
21 “‘Kanda muketavisa mwanove vamuhane* kuli Molekeko.+ Kanda mukasaula lijina lyaKalunga kenu mujila kaneyiko.+ Ami yami Yehova.
22 “‘Kanda mukalisavala nalunga kwijiva nge pwevoko.+ Echi chinapu chaunyengwe.
23 “‘Lunga kanda akasavala kanyama nakulipihisa iveneko. Napwevo nawa kanda akasavala kanyamako.+ Echi chinapu kuhingika chisemwa.
24 “‘Kanda namulipihisa navyuma kaneviko, mwomwo evi vikiko vinapihisa vaka-mafuchi vaze nanguhanga kumeso enu.+
25 Lifuchi lyavo lyosena linapihi, ngocho nanguvazangamisa hakuhenga chavo, kaha navakavahanga mulifuchi.+
26 Oloze enu lamenunga jishimbi jami namazu ami akuyula.+ Kanda namukalinga vyuma kanevi vyaunyengweko, numba mupwa muvakusemukila mulifuchi, chipwe muvamwiza.+
27 Mwomwo vyuma kanevi vyaunyengwe vikiko vanalingi vatu vamulifuchi namwingila,+ ngocho lifuchi linapihi.
28 Kaveshi kukamihanga mulifuchiko nge muze navahanga vatu vamulifuchi namwingila mwomwo yakulipihisa.
29 Weshowo* mwalinga vyuma kanevi vyaunyengwe vakamujihe.
30 Lamenunga mazu ami ngunamilweze hakulihenda kuvyuma vyaunyengwe vize vanalinginga vakiko,+ kuchina vyuma kana navimipihisa. Ami yami Yehova Kalunga kenu.’”
Kwinyikila Chamwishi
^ Hepe., “mangana awuwulule usonyi wenyi.” Eli lizu likiko vazachisa nahajivesi jinakavangizaho.
^ Hepe., “mwomwo unapu usonyi waiso.”
^ Hepe., “chinapu kuzula ndumbwaiso.”
^ Hepe., “mwomwo unapu usonyi wandumbwove.”
^ Chipwe “chuma chakwivwisa sonyi.”
^ Chipwe “napwevo lyamukwenu mumwatungila; napwevo lyasepa lyove.”
^ Chipwe “vamulumbe.”
^ Chipwe “Weshowo mwono.”
