VyavaLevi 19:1-37
-
Jishimbi jakulisezaseza jahanjika hakujila (1-37)
19 Yehova ahanjikile cheka kuli Mose ngwenyi:
2 “Hanjika kulizavu lyavaIsalele lyosena ngwove, ‘Pwenunga mwajila mwomwo ami Yehova Kalunga kenu ngwajila.+
3 “‘Mutu himutu avumbikenga* naye naise,+ mulamenga jisambata jami.+ Ami yami Yehova Kalunga kenu.
4 Kanda namukalumukila kutulunga vamokomokoko,+ chipwe kulitungila tulunga vakuzuzululako.+ Ami yami Yehova Kalunga kenu.
5 “‘Nge namukahana Yehova wana wakusolola kuunda,+ kauhanenu kanawa mangana akamivwile uselewa.+
6 Wana kana mukaulye halikumbi lize namukauhana chipwe halikumbi lize nalikakavangizaho. Oloze weshowo naukasalaho nakuheta kulikumbi lyamuchitatu, mukaulumbe hakakahya.+
7 Kachi nge wana umwe namukaulya halikumbi lyamuchitatu, wana kana naukapwa waunyengwe, kaveshi kukawitavilako.
8 Kaha mutu uze mwakaulya navakamuzangamisa hakuhenga chenyi, mwomwo nalumbilisa vyuma vyaYehova vyajila, kaha mutu* kana vakamujihe.
9 “‘Omu namukaha jimbuto jenu, kanda namukaha jimbuto josena nakujisembwa jamande enuko, kaha nawa kanda namukahuhwojola vize vinasalemoko.+
10 Kanda namukahuhwojola mihako yosena yize nayikasala mumande enu amivinyoko, chipwe kukanonojola yize nayikaliholokela iveneko. Mukavaselayo vaka-kuhutwa*+ navamwiza. Ami yami Yehova Kalunga kenu.
11 “‘Kanda mukevako,+ kanda mukatangisako,+ kanda mukonga vakwenuko.
12 Kanda mukalishinga lijina lyami mwakwonga,+ nakusaula lijina lyaKalunga kenuko. Ami yami Yehova.
13 Kanda mukalyapula vakwenuko,+ kanda mukapupa vyuma vyavakwenuko.+ Fweto yangamba wakukamba kanda mukayilama ufuku wosena palanga nakuchimeneko.+
14 “‘Kanda mukangula* kajika matwitwiko, chipwe kukahaka chimbunji mujila yakapuputako.+ Mungwivwenga ami Kalunga kenu woma.+ Ami yami Yehova.
15 “‘Kanda mukahengesa hakusopesa vakwenuko. Kanda mukatetela muka-kuhutwa mwomwo yakuhutwa chenyiko, chipwe kuhakwila muka-luheto mwomwo yaluheto lwenyiko.+ Mukasopesa vakwenu mwaya chiyulo chakwoloka.
16 “‘Kanda mukahitangana muvatu nakuvangila vakwenuko.+ Kanda mukemanyina kuyoya* chavakwenu nakoleko.*+ Ami yami Yehova.
17 “‘Kanda mukahunga vandumbwenu mumichima yenuko.+ Mukahanjikila vakwenu,+ kuchina namukazana shili yavo.
18 “‘Kanda mukalinga sambanjinga+ chipwe kulamina koko vana vavatu jenuko. Zangenunga vakwenu nganomu mwalizanga enu vavene.+ Ami yami Yehova.
19 “‘Lamenunga jishimbi jami eji: Kanda muketavisa vimuna jenu vambuto yimwe vakaseme navimuna jenu vambuto yekako. Kanda mukakuva jimbuto jamiyachi yivali mumande enuko.+ Kaha kanda mukavwala uvwalo wakutunga nawanda wamiyachi yivaliko.+
20 “‘Kachi nge lunga mwalisavala napwevo wandungo uze vatongwela lunga weka, uze vazeneka kusokola chipwe kwecha, vosena vavali vakavazangamise. Oloze kanda navakavajihako mwomwo uze pwevo kasokokeleko.
21 Uze lunga akanehe chizamba chamukoko wawana wahamulonga+ kuli Yehova kuchikolo chambalaka yakuliwanyina.
22 Kapilishitu akambate uze chizamba chamukoko wawana wahamulonga, akamulingile chakufwika hashili kumeso aYehova, kaha navakamukonekela hashili yenyi yize alinganga.
23 “‘Omu namukaheta mulifuchi lize nangumihana, kaha hinamutumba mitondo yakulya, kamonenu mihako yayo ngwenu yinapihi, chijila kuyilya.* Kanda mukalya mihako yayo hamyaka yitatu yakulivangako.
24 Oloze mumwaka wamuchiwana, mihako yayo yosena yikapwe yajila, yakwalishilaho Yehova.+
25 Kaha mumwaka wamuchitanu, mukalye mihako yayo mangana yize mitondo yikeme cheka mihako yayivulu. Ami yami Yehova Kalunga kenu.
26 “‘Kanda mukalya chuma chili namanyingako.+
“‘Kanda mukatahisa vitaho, chipwe kulinga visavako.+
27 “‘Kanda mukateula* mavinji akumitwe yenu, chipwe kukamba mavinji awevu wenuko.+
28 “‘Kanda mukalichata jichato hamijimba yenu nge mutu nafuko,+ chipwe kulisona hamijimba yenuko. Ami yami Yehova.
29 “‘Kanda mukajilulula vana venu vamapwevo hakuvalingisa kupwa vaka-ujilako,+ kuchina mulifuchi namukavula vaka-ujila nakuzalisamo vilinga vyakuzunguma.+
30 “‘Mulamenga jisambata jami+ nakwivwanga chihela chami chajila woma. Ami yami Yehova.
31 “‘Kanda mukaya kuli vaka-kutahisa vashipilitu,+ chipwe kuli vaka-kulweza vyuma vyakulutweko,+ kuchina navakamipihisa. Ami yami Yehova Kalunga kenu.
32 “‘Vumbikenu mutu ukwechi jivwi,+ lemesenunga mukulwane,+ mwivwenunga Kalunga kenu woma.+ Ami yami Yehova.
33 “‘Kachi nge muli nakutwama namwiza mulifuchi lyenu, kanda namumuyanjisako.+
34 Mwiza uze ali nakutwama nayenu mumonenunga nge himutu wakusemukila mulifuchi lyenu.+ Muzangenunga nganomu mwalizanga enu vavene, mwomwo nayenu mwapwile muvamwiza mulifuchi lyaEjipitu.+ Ami yami Yehova Kalunga kenu.
35 “‘Kanda mukazachisa vipimo vyakuhenga hakupima vyuma muusuku wavyo, chipwe kulema chavyo chipwe kuvula chavyoko.+
36 Zachisenunga vipezaliso vyakwoloka, namalolwa akupezalisa akwoloka, navyesekelo vyakwoloka vyakupimisa vyuma vyaumu* navyesekelo vyakwoloka vyakupimisa vyuma vyameya.*+ Ami yami Yehova Kalunga kenu uze amilowele mulifuchi lyaEjipitu.
37 Shikaho, lamenunga jishimbi jami josena, namazu ami akuyula osena, nakukavikavangizanga.+ Ami yami Yehova.’”
Kwinyikila Chamwishi
^ Hepe., “evwenga woma.”
^ Chipwe “mwono.”
^ Chipwe “vaka-kuyanda.”
^ Chipwe “namukashinga.”
^ Hepe., “manyinga.”
^ Chipwe pamo, “Kanda namukemana nakutala kaha mukwenu okunyi kuyoya chenyi chili mupondeko.”
^ Hepe., “kamonenu mihako yayo kupwa yaulima.”
^ Chipwe “namukakamba.”
^ Hepe., “navyesekelo vyalifwa vyakwoloka.” Tala Chihande B14.
^ Hepe., “navyesekelo vyahine vyakwoloka.” Tala Chihande B14.
