VyavaLevi 2:1-16
-
Wana wamanona (1-16)
2 “‘Kachi nge mutu* mwahana wana wamanona+ kuli Yehova, kaha wana kana ukapwe waunga wamwaza. Akahingunwineho maji nakuhakaho lavona.+
2 Akanehe wana kana kuli vapilishitu vana vaAlone, kaha kapilishitu akatapuleho livoko lyato lyaunga wamwaza uze vanahingunwina maji, nalavona yosena. Akaulumbe halijiko lyakulumbila mangana ukakakumuke wishi kupwa wana wakwanukilaho,+ wakwocha hakakahya walivumba lyalupengopengo* kuli Yehova.
3 Wana wamanona uze naukasalaho ukapwe waAlone navana venyi+ vamalunga, hiwana wajila+ chikuma wakuwana waYehova wakwocha hakakahya.
4 “‘Kachi nge namuhana wana wamanona uze vanochela mufwolonyi, kaha wana kana ukapwe waunga wamwaza, wajimbolo jakuzeneka chimbalwila jamujingulule jili nawina hakachi jakuchingasana namaji, chipwe wana wajimbolo jajilelu chikuma jakuzeneka chimbalwila jakukwita maji.+
5 “‘Kachi nge namuhana wana wamanona uze vanochela muchifwoyo,+ kaha wana kana ukapwe waunga wamwaza wakuzeneka chimbalwila wakuchingasana namaji.
6 Mukaupazule vihanda vihanda nakuhingunwinaho maji.+ Unapu wana wamanona.
7 “‘Kachi nge namuhana wana wamanona uze vanochela hachikango, kaha wana kana ukapwe waunga wamwaza wakuchingasana namaji.
8 Mukaneha wana kanou wamanona kuli Yehova. Vakauhane kuli kapilishitu, kaha akaunehe kwakamwihi nalijiko lyakulumbila.
9 Haze hawana wamanona, kapilishitu akatapuleho umwe kupwa wana wakwanukilaho,+ akaulumbe halijiko lyakulumbila mangana ukakakumuke wishi. Ukapwe wana wakwocha hakakahya walivumba lyalupengopengo* kuli Yehova.+
10 Wana wamanona uze naukasalaho ukapwe waAlone navana venyi vamalunga, hiwana wajila chikuma wakuwana waYehova wakwocha hakakahya.+
11 “‘Kanda namukahana Yehova wana wamanona uze uli nachimbalwilako,+ mwomwo kamwatela kulumba muunga uli nachimbalwila chipwe uchi vikakumuke wishi kupwa wana waYehova wakwocha hakakahyako.
12 “‘Mukahane vyuma kana kuli Yehova kupwa wana wajimbuto jakulivanga,+ oloze kanda namukavineha kulijiko lyakulumbila kupwa wana walivumba lyalupengopengoko.*
13 “‘Wana wamanona wosena uze namukahana ukapwe wakuhaka mungwa. Wana kana kanda ukapwa wakuzeneka mungwa walushiko lwaKalunga kenuko. Wana wosena uze namukahana mukauhanyine kumwe namungwa.+
14 “‘Kachi nge namuhana Yehova wana wamanona wajimbuto jakulivanga kwaha, kaha mukahane manona amahya, amavwovu, akwocha hakakahya, akusohola, kupwa wana wamanona wajimbuto jenu jakulivanga kwaha.+
15 Kahingunwinenuho maji, nakuhakaho lavona. Unapu wana wamanona.
16 Kaha kapilishitu akalumbe aze manona akusohola akuhaka maji nalavona yosena mangana akakakumuke wishi kupwa wana wakwanukilaho.+ Unapu wana waYehova wakwocha hakakahya.
Kwinyikila Chamwishi
^ Chipwe “mwono.”
^ Chipwe “lyakusuulwisa; lyakwivwisa kuwaha.”
^ Chipwe “lyakusuulwisa; lyakwivwisa kuwaha.”
^ Chipwe “lyakusuulwisa; lyakwivwisa kuwaha.”
