VyavaLevi 20:1-27
20 Yehova ahanjikile lika kuli Mose ngwenyi:
2 “Lweza vaIsalele ngwove, ‘Weshowo kaIsalele chipwe mwiza uze ali nakutwama muIsalele mwahana mwanenyi kuli Moleke vakamujihe chikupu.+ Vatu vamulifuchi vakamwase malolwa afwenga.
3 Mutu kana nangukamutala nautenu nakumujiha, mwomwo nahane mwanenyi kuli Moleke, kaha najilulula chihela chami chajila+ nakusaula nawa lijina lyami lyajila.
4 Kachi nge vatu vamulifuchi lize navakamwivwila keke nakuzeneka kumujiha omu mwakahana mwanenyi kuli Moleke,+
5 ami nangukamuzangamisa natanga yenyi.+ Nangukamujiha navosena vaze navakalinunga nenyi hakulinga ujila naMoleke.
6 “‘Mutu* uze mwakaya kuli vaka-kutahisa vashipilitu,+ nakuli vaka-kulweza vyuma vyakulutwe+ mangana akalinge navo ujila wakushipilitu, nangukamutala nautenu nakumujiha.+
7 “‘Lijilikenu mupwenga mwajila,+ mwomwo ami yami Yehova Kalunga kenu.
8 Lamenunga jishimbi jami nakujikavangizanga.+ Ami yami Yehova muka-kumijilika.+
9 “‘Weshowo mwakangula* ise chipwe naye, vakamujihe chikupu.+ Mulonga wamanyinga enyi naukapwa hali ivene mwomwo nangula ise chipwe naye.
10 “‘Lunga uze mwalinga ukoji napwevo lyambala, ou vene mwalinga ukoji napwevo lyamukwavo, vamujihe chikupu. Napwevo uze nalingi nenyi ukoji vamujihe.+
11 Lunga uze mwalisavala napwevo lyaise nasaula ise.*+ Vosena vavali vavajihe chikupu. Mulonga wamanyinga avo naupwa hali vavene.
12 Kachi nge lunga mwalisavala napwevo lyamwanenyi, kaha vosena vavali vavajihe chikupu. Vanahingika chisemwa. Mulonga wamanyinga avo naupwa hali vavene.+
13 “‘Kachi nge lunga mwalisavala nalunga kwijiva nge pwevo, vosena vavali vanalingi chuma chaunyengwe,+ kaha vavajihe chikupu. Mulonga wamanyinga avo naupwa hali vavene.
14 “‘Kachi nge lunga mwahalikila pwevo nanaye yauze pwevo, echi chinapu chuma chaunyengwe.*+ Uze lunga navaze mapwevo vakavalumbe hakakahya+ mangana vilinga vyavo vyaunyengwe vizeneke kupwa muli enu.
15 “‘Kachi nge lunga mwasavala kanyama, kaha vamujihe chikupu. Nauze kanyama nawa vamujihe.+
16 Kachi nge pwevo mwapandama kuli kanyama nakumusavala,+ kaha mujihe uze pwevo nauze kanyama. Muvajihe chikupu, kaha mulonga wamanyinga avo naupwa hali vavene.
17 “‘Kachi nge lunga mwalisavala nandumbwenyi wapwevo, numba apwa mwanaise chipwe mwananaye, kaha mutu himutu himwamona usonyi wamukwavo, chuma kana chinapu chasonyi.+ Ngocho vavajihile hameso avana vavatu javo. Lunga kana nasaula ndumbwenyi,* kaha vamuzangamise hakuhenga chenyi.
18 “‘Kachi nge lunga mwalisavala napwevo uze ali kukakweji, vosena vavali vanalumbilisa manyinga.+ Ngocho vosena vavali vavajihe.
19 “‘Kanda mukalisavala nandumbwanoko wapwevo, chipwe ndumbwaiso wapwevoko, mwomwo kulinga ngocho chinapu kusaula kausoko kove wahalinyinga.+ Muvosena muvavali vakamizangamise hakuhenga chenu.
20 Lunga uze mwalisavala napwevo lyanatwenyi nasaula natwenyi.*+ Vosena vavali vavazangamise hashili yavo. Vakafwe chakuzeneka vana.
21 Kachi nge lunga mwakambata pwevo lyandumbwenyi, nalingi chuma chaunyengwe.+ Nasaula ndumbwenyi,* ngocho kaveshi kukasema vanako.
22 “‘Lamenunga jishimbi jami josena namazu ami akuyula osena+ nakuvikavangizanga,+ mangana vakazeneke kumihanga mulifuchi lize nguli nakumitwala.+
23 Kanda namukakavangiza jishimbi javaka-mafuchi vaze nanguhanga kumeso enuko.+ Ngunavahungu mwomwo vanalingi vyuma vyosenevi.+
24 Shikaho ngwamyambilile ngwami: “Namukaheta lifuchi lyavo lyakumbwambumuka mavele nauchi, nangukamihanalyo kupwa luheto lwenu.+ Ami yami Yehova Kalunga kenu uze namihandula kuvatu veka naveka.”+
25 Kahandununenu kanyama utoma nakanyama wamupi, nakajila utoma nakajila wamupi.+ Kanda namukalipihisa nakanyama, chipwe nakajila, chipwe nachuma chakuhalala hamavu, vize ngunavuluka ngwami vyavipi kuli enuko.+
26 Ngujililenunga, mwomwo ami Yehova ngwajila,+ kaha nangumihandula kuvatu veka naveka mangana mupwenga muvatu jami.+
27 “‘Weshowo lunga chipwe pwevo mwapwa muka-kutahisa vashipilitu chipwe muka-kulweza vyuma vyakulutwe* vamujihe chikupu.+ Vamwase malolwa afwenga. Mulonga wamanyinga enyi naupwa hali ivene.’”
Kwinyikila Chamwishi
^ Chipwe “Mwono.”
^ Chipwe “mwakashinga.”
^ Hepe., “nazulu ise.”
^ Chipwe “chuma chakwivwisa sonyi.”
^ Hepe., “nazulu ndumbwenyi.”
^ Hepe., “nazulu natwenyi.”
^ Hepe., “Nazulu ndumbwenyi.”
^ Chipwe “uze ali nashipilitu yakutachikiza vyuma vyakulutwe.”
