VyavaLevi 21:1-24
21 Yehova ahanjikile lika kuli Mose ngwenyi: “Hanjika kuli vapilishitu, vana vaAlone, ngwove, ‘Kapilishitu kanda akalipihisa ivene mwomwo yamufu wahavatu jenyiko.+
2 Oloze nahase kulipihisa kaha hali kausoko kenyi wahalinyinga, hali naye, nahali ise, nahali mwanenyi walunga, nahali mwanenyi wapwevo, nahali ndumbwenyi walunga.
3 Nahase nawa kulipihisa hali ndumbwenyi wapwevo uze atwaminenga nenyi, kachi nge apwile kanda alisavaleho lyehi nalunga, kaha nawa kanda asombokengaho lyehi.
4 Kapilishitu kanda akalipihisa ivene nakulijilulula mwomwo yakulisavala napwevo lyambala wahavatu jenyiko.
5 Vapilishitu kanda vakakonga kumitwe yavo,+ chipwe kuteula mavinji awevu wavo, chipwe kuchata jichato hamijimba yavoko.+
6 Vajilile Kalunga kavo,+ kaha kanda vasaula lijina lyaKalunga kavoko,+ mwomwo veji kuhananga mawana aYehova akwocha hakakahya, aze apwa kulya* chaKalunga kavo. Shikaho vapwenga vajila.+
7 Kanda vakambata pwevo muka-ujila,+ chipwe uze vanapihisa, chipwe uze vanalukulula kuli lunga lyenyiko,+ mwomwo kapilishitu ajilila Kalunga kenyi.
8 Mumujilike+ mwomwo eji kuhananga kulya chaKalunga kenu. Apwenga wajila kuli enu, mwomwo ami Yehova muka-kumijilika ngwajila.+
9 “‘Kachi nge pwevo mwanakapilishitu mwalijilulula hakulinga ujila, nasaula ise. Kaha vamulumbe hakakahya.+
10 “‘Kapilishitu wakulitulaho muli vandumbwenyi, uze vanahingunwina maji akuwavisa hamutwe wenyi,+ uze nawa vanatongola* mangana avwale uvwalo waupilishitu,+ kanda akatwama nalipupe kumutwe wenyiko, chipwe kupula uvwalo wenyiko.+
11 Kanda akapandama kuli mufuko.*+ Kanda akalipihisa ivene hali ise chipwe hali naye uze nafuko.
12 Kanda akafuma muchihela chajilako, kanda akalumbilisa chihela chajila chaKalunga kenyiko,+ mwomwo katachikijilo kakulihana chenyi, kaze kapwa maji aKalunga kenyi akuwavisa,+ kali hali ikiye. Ami yami Yehova.
13 “‘Akambate pwevo uze achili kanda alisavaleho lyehi nalunga.+
14 Kanda akambata tuliwe, chipwe pwevo uze vanalukulula, chipwe uze vanapihisa, chipwe muka-ujilako. Oloze akambate pwevo wahavatu jenyi uze achili kanda alisavaleho lyehi nalunga.
15 Kanda akasaula vana* venyi vahali vatu jenyiko,+ mwomwo ami yami Yehova muka-kumujilika.’”
16 Yehova ahanjikile lika kuli Mose ngwenyi:
17 “Lweza Alone ngwove, ‘Kuli vaka-tanga* yove muvisemunwino vyavo vyosena, mutu uze ali nakatenga kanda akapandama kuchihela chajila akahane kulya chaKalunga kenyiko.
18 Weshowo lunga ali nakatenga, kanda akapandama kuchihela chajilako, numba apwa kapuputa, chipwe chitonji, chipwe ou ali nakatenga kuchihanga,* chipwe ou ali nalihinji chipwe livoko lyalisuku kuhambakana likwavo,
19 chipwe ou wakuhokoka lihinji chipwe livoko,
20 chipwe ou ali nakunda, chipwe chimbinda,* chipwe ou ali namutoyo haliso, chipwe ou ali namukule, chipwe ou ali nachikombe, chipwe ou wakuchikika jimbindu.+
21 Weshowo lunga wakutanga* yakapilishitu Alone uze ali nakatenga, kanda akapandama kulijiko lyakulumbila mangana akahane mawana aYehova akwocha hakakahyako. Kanda akapandama kulijiko lyakulumbila akahane kulya chaKalunga kenyiko mwomwo ali nakatenga.
22 Oloze akalye tuhu kuvyakulya vyaKalunga kenyi, nevi vyajila+ navyevi vyajila chikuma.+
23 Kanda akapandama kulihina lyakuvatasana,+ chipwe kulijiko lyakulumbilako,+ mwomwo ali nakatenga. Kanda akalumbilisa chihela chami chajilako,+ mwomwo ami yami Yehova muka-kuvajilika.’”+
24 Ngocho Mose ahanjikile kuli Alone navana venyi navaIsalele vosena.
Kwinyikila Chamwishi
^ Kutalisa kuvimuna vakuvatula.
^ Hepe., “uze nawa vazalisa livoko.”
^ Chipwe “kumwono wakufwako.” Lizu lyachiHepeleu neʹphesh vazachisa hano lyatalisa kulizu lyachiHepeleu lyalumbununa “kufwa.”
^ Hepe., “mbuto.”
^ Hepe., “mbuto.”
^ Hepe., “chipwe ou wamuzulu wakupulika.”
^ Chipwe pamo, “ou wakuhokama.”
^ Hepe., “wakumbuto.”
