VyavaLevi 22:1-33
22 Yehova ahanjikile cheka kuli Mose ngwenyi:
2 “Lweza Alone navana venyi mangana vazangame hakuzachisa vyuma* vyajila vyavaIsalele, kuchina navasaula lijina lyami lyajila+ kupandama kuvyuma vyajila vize vali nakunguhana.+ Ami yami Yehova.
3 Valweze ngwove, ‘Muvisemunwino vyenu vyosena, weshowo mwanenu mwakapihya nakupandama kuvyuma vyajila vize vaIsalele navakahana Yehova, vakamujihe akafume kumeso ami.+ Ami yami Yehova.
4 Lunga wakutanga yaAlone uze ali nambumba+ chipwe uze ali navimwe vili nakumuhita kuusonyi wenyi,+ kanda akalya kuvyuma vyajilako,+ kuvanga omu mwakatoma. Nalunga mwakwata mutu uze napihi hakukwata mufu,*+ chipwe uze ali nakulovola vana kuusonyi wenyi,+
5 chipwe uze mwakwata chuma chachipi chakuhalala hamavu,+ chipwe ou mwapihya hakukwata mutu uze napihi navyuma vimwe.+
6 Mutu* uze mwakwata vyuma kanevi mwapihya palanga nakuchingoloshi, kaha kanda alya kuvyuma vyajilako, oloze asane meya mumujimba wenyi.+
7 Omu nalilauka likumbi numba atome. Kufumaho alyenga tuhu kuvyuma vyajila, mwomwo vinapu kulya chenyi.+
8 Kanda alipihisa hakulya kanyama wakulifwila, chipwe uze vanatanye kuvakwavo tunyama vamuchipapako.+ Ami yami Yehova.
9 “‘Valamenga vyuma ngunavalweze, kuchina navalinga shili nakufwa mwomwo yakujilulula vyuma vyajila. Ami yami Yehova muka-kuvajilika.
10 “‘Mutu uze kavetavisako* kanda akalya kuvyuma vyajilako.+ Ngeji uze neza kuli kapilishitu kufuma kulifuchi lyeka chipwe ngamba wakukamba kanda akalya kuvyuma vyajilako.
11 Kachi nge kapilishitu mwalanda mutu* najimbongo jenyi, kaha mutu kana alyenga tuhu kuvyuma vyajila. Vandungo vakusemukila muzuvo yakapilishitu navakiko vanahase kulya kukulya chenyi.+
12 Nge mwanakapilishitu wapwevo mwasomboka kuli lunga uze kapwa kapilishituko,* kaha kanda alya kuwana wajila vanakungululako.
13 Oloze nge mwanakapilishitu wapwevo napu tuliwe, chipwe vanamulukulula nakukinduluka kuzuvo yaise oku achili mwanapwevo kaha nawa keshi namwanako, alyenga tuhu kukulya chaise.+ Oloze mutu uze kavetavisako* kanda akalyakoko.
14 “‘Kachi nge mutu nali lyehi chuma chajila chakuzeneka ikiye kutachikiza, kaha ahakileho chimbwa chimwe chakusokesa muvimbwa vitanu chachuma kana. Kaha ahane wana wajila kuli kapilishitu.+
15 Vapilishitu kanda vakajilulula vyuma vyavaIsalele vyajila vize veji kuhananga kuli Yehovako,+
16 nakuvalingisa vavazangamise hakuhenga chavo mwomwo yakulya vyuma vyavo vyajila. Ami yami Yehova muka-kuvajilika.’”
17 Yehova ahanjikile lika kuli Mose ngwenyi:
18 “Hanjika kuli Alone navana venyi nakuli vaIsalele vosena ngwove, ‘Kachi nge kaIsalele chipwe mwiza uze atwama muIsalele mwahana wana wakulumba+ kuli Yehova mangana atesemo jishiko jenyi chipwe kuhana wana wakulisakila,+
19 kaha ahane ngombe wakuji,+ chipwe vana vamikoko vavizamba, chipwe vapembe. Vimuna kana vapwenga valambwe mangana vamwivwile uselewa.
20 Kanda namuhana chimuna ali nakatengako,+ mwomwo kaveshi kumivwila uselewako.
21 “‘Kachi nge mutu mwahana Yehova wana wakusolola kuunda+ mangana atesemo lushiko lwenyi, chipwe nge mwahana wana wakulisakila, ahane chimuna walambwe wakuutanga wenyi wavangombe chipwe wamikoko mangana vamwivwile uselewa. Chimuna kana kanda apwa nakatenga numba kamweko.
22 Kanda namuhana chimuna wakufwa meso, chipwe wakuhokoka, chipwe uze ali nambandu, chipwe nachijimbo, chipwe namukule, chipwe nachikombeko. Vimuna vaze vali navyumevi, kanda namuvahana kuli Yehova, chipwe kuvalumbila Yehova halijiko lyakulumbilako.
23 Weshowo ngombe wakuji chipwe mukoko uze ali nalihinji chipwe livoko lyalisuku chipwe lyalihi, munahase kumuhana tuhu kupwa wana wakulisakila. Oloze kaveshi kumwitavilako kachi nge namumuhana kupwa wana walushiko.
24 Kanda namuhana Yehova chimuna wajimbindu jakulyenyeka, chipwe jakuchikika, chipwe jakulutula, chipwe jize vanateteko. Kanda namukahana vimuna kana mulifuchi lyenuko.
25 Kanda namukatambula vimuna vakufwana ngana kuli muka-lifuchi lyeka nakuvahana kupwa vyakulya vyaKalunga kenuko, mwomwo vimuna kana vanapihi, vali natutenga. Kaveshi kuvetavila nakumilingisa vamivwile uselewako.’”
26 Yehova ahanjikile cheka kuli Mose ngwenyi:
27 “Kachi nge nakusemuka ngombe wakuji chipwe mwanamukoko wachizamba chipwe pembe, kaha akapwe nanaye hamakumbi 7.+ Oloze kufuma halikumbi lyakusokesa 8 nakuya kulutwe navakamwitavila kupwa wana wakwocha hakakahya kuli Yehova.
28 Oloze ngombe wakuji chipwe mukoko kanda namukamujiha halikumbi lyolimwe namwanenyiko.+
29 “Kachi nge namuhana Yehova wana wakusakwilila,+ kauhanenu kanawa mangana vamivwile uselewa.
30 Wana kana mukaulye halikumbi vene lize. Kanda namukauseza ukahete nakuchimeneko.+ Ami yami Yehova.
31 “Lamenunga jishimbi jami nakujikavangiza.+ Ami yami Yehova.
32 Kanda namusaula lijina lyami lyajilako.+ Vangujilile muli vaIsalele.+ Ami yami Yehova muka-kumijilika,+
33 yami ngwamilowele mulifuchi lyaEjipitu mangana ngulisolole kupwa nguKalunga kenu.+ Ami yami Yehova.”
Kwinyikila Chamwishi
^ Hepe., “mangana vahanduke kuvyuma.”
^ Chipwe “mwono.”
^ Chipwe “Mwono.”
^ Hepe., “mutu weka,” kulumbununa, mutu uze kafuma kutanga yaAloneko.
^ Chipwe “mwono.”
^ Chipwe “mwasomboka kuli mutu weka.”
^ Hepe., “mutu weka,” kulumbununa, mutu uze kafuma kutanga yaAloneko.
