VyavaLevi 23:1-44
-
Makumbi ajila naviwanyino (1-44)
23 Yehova ahanjikile lika kuli Mose ngwenyi:
2 “Hanjika kuli vaIsalele ngwove, ‘Viwanyino vyaYehova vyamumwaka+ vize namukavilika+ vinapu hiviwanyino vyakukunguluka chajila. Evi vikiko viwanyino vyami vyamumwaka:
3 “‘Kazatenu milimo hamakumbi 6, oloze likumbi lyakusokesa 7 likapwe kunoka chasambata,+ hikukunguluka chajila. Kanda namukazata milimo yimweko, mwomwo likumbi kana nalipwanga sambata yaYehova kweshokwo namukatwamanga.+
4 “‘Evi vikiko viwanyino vyaYehova vyamumwaka vize vyapwa kukunguluka chajila vize namukavilikanga halwola lwavyo vatongola:
5 Mukakweji wakulivanga, halikumbi lyakusokesa 14+ hakajimbavenyi,* kukapwe Paseka+ yaYehova.
6 “‘Likumbi lyakusokesa 15 mukakweji kanou likapwe lyakulingila Yehova Chiwanyino chaJimbolo Jakuzeneka Chimbalwila.+ Mukalye mbolo yakuzeneka chimbalwila+ hamakumbi 7.
7 Halikumbi lyakulivanga hakapwe kukunguluka chajila.+ Kanda namukazata milimo yakulikanyako.
8 Oloze mukahane wana wakwocha hakakahya kuli Yehova hamakumbi 7. Kaha likumbi lyakusokesa 7 likapwe likumbi lyakukunguluka chajila. Kanda namukazata milimo yakulikanyako.’”
9 Yehova ahanjikile lika kuli Mose ngwenyi:
10 “Hanjika kuli vaIsalele ngwove, ‘Omu namukalinga himunahete lyehi mulifuchi lize nangumihana, kaha nawa himunahe lyehi jimbuto jamulifuchi kana, mukanehe mukuta wajimbuto jakulivanga+ jamumande enu kuli kapilishitu.+
11 Kaha akahungise uze mukuta noku noku kumeso aYehova mangana Kalunga akamivwile uselewa. Uze kapilishitu akahungise uze mukuta halikumbi nalikakavangizaho kufuma haSambata.
12 Halikumbi lize namukahungisa uze mukuta, mukahana mwanamukoko wachizamba walambwe wamwaka umwe kupwa wana wakulumba wakuhana Yehova.
13 Mukahana nawa wana wamanona wakuta muvimbwa vivali vyakusokesa muvimbwa 10 vyalifwa* vyaunga wamwaza wakuchingasana namaji, kupwa wana wakwocha hakakahya walivumba lyalupengopengo* kuli Yehova. Mukahana nawana wavinyo wakuta muchimbwa chimwe chakusokesa muvimbwa viwana vyahine.*
14 Kanda namukalya mbolo, chipwe manona akwocha, chipwe manona amahyako, kuvanga halikumbi lize namukaneha wana waKalunga kenu. Elu lukiko lushimbi namukavangizanga muvisemunwino vyenu vyosena kweshokwo namukatwamanga.
15 “‘Mukalava vyalumingo 7 kuputukila halikumbi nalikakavangizaho kufuma hasambata, halikumbi lize namukaneha mukuta wawana wakuhungisa.+ Mukalava vyalumingo vyamuundu 7.
16 Mukalava nawa makumbi 50+ kuheta nakulikumbi nalikakavangizaho kufuma haSambata yakusokesa 7, numba jino mukahane Yehova wana wamanona amahya.+
17 Mukaneha jimbolo jivali kufuma kujizuvo jenu kupwa wana wakuhungisa. Jimbolo kana jikapwe jaunga wamwaza wakuta muvimbwa vivali vyakusokesa muvimbwa 10 vyalifwa.* Vakajoche nachimbalwila,+ kupwa jimbuto jakulivanga jakuhana Yehova.+
18 Jize jimbolo mukajihanyine kumwe navana vamikoko vavizamba 7 valambwe vamwaka umwe, namwanangombe wakuji umwe, navizamba jamikoko vavali.+ Vakapwe wana wakulumba wakuhana Yehova. Mukavahanyine kumwe nawana wamanona, namawana avinyo kupwa wana wakwocha hakakahya walivumba lyalupengopengo* kuli Yehova.
19 Mukahana nawa mwanapembe umwe kupwa wana wahashili,+ navana vamikoko vavizamba vavali vamwaka umwe kupwa wana wakusolola kuunda.+
20 Kaha kapilishitu akahungise noku noku ava vana vamikoko vavizamba vavali, najimbolo jakujimbuto jakulivanga, kupwa wana wakuhungisa kumeso aYehova. Vyuma kana vikapwe vyajila kuli Yehova, kaha vikapwe vyakapilishitu.+
21 Halikumbi kaneli mukavilike kukunguluka chajila.+ Kanda namukazata milimo yakulikanyako. Elu lukiko lushimbi namukavangizanga muvisemunwino vyenu vyosena kweshokwo namukatwamanga.
22 “‘Omu namukaha jimbuto muze mulifuchi lyenu, kanda namukaha jimbuto josena jakujisongo jamande enuko. Kanda namukanonojola jize najikasala mumande enuko.+ Oloze mukajisela vaka-kuhutwa*+ navamwiza.+ Ami yami Yehova Kalunga kenu.’”
23 Yehova ahanjikile lika kuli Mose ngwenyi:
24 “Lweza vaIsalele ngwove, ‘Mukakweji wakusokesa 7, halikumbi lyakulivanga, mukanoka kumilimo yenu yosena. Likumbi kana navakamyanukisalyo naluneta,+ hilikumbi lyakukunguluka chajila.
25 Kanda namukazata milimo yakulikanyako. Mukahana Yehova wana wakwocha hakakahya.’”
26 Yehova ahanjikile cheka kuli Mose ngwenyi:
27 “Oloze likumbi lyakusokesa 10 lyamukakweji kanou wakusokesa 7, nalikapwa Likumbi lyaKulinga chaKufwika haShili.+ Mukapwe nakukunguluka chajila, mukayanjiwe,*+ kaha mukahane Yehova wana wakwocha hakakahya.
28 Kanda namukazata milimo yimwe halikumbi kanako, mwomwo linapu likumbi lyakulinga chakufwika hashili+ yenu kumeso aYehova Kalunga kenu.
29 Weshowo* mwakahona kuliyanjisa ivene* halikumbi kana vakamujihe.+
30 Weshowo mwakazata milimo halikumbi kana, nangukamujiha.
31 Kanda namukazata milimo yimweko. Elu lukiko lushimbi namukavangizanga muvisemunwino vyenu vyosena kweshokwo namukatwamanga.
32 Likumbi kana likapwe kunoka chasambata. Mukayanjiwe*+ halikumbi lyakusokesa 9 mukakweji nachingoloshi. Mukalinga sambata yenu nachingoloshi nakutwala kuchingoloshi chalikumbi likwavo.”
33 Yehova ahanjikile lika kuli Mose ngwenyi:
34 “Lweza vaIsalele ngwove, ‘Likumbi lyakusokesa 15 mukakweji vene ou wakusokesa 7, likapwe likumbi lyakulingila Yehova Chiwanyino chaVisakila chamakumbi 7.+
35 Likumbi lyakulivanga likapwe likumbi lyakukunguluka chajila. Kanda namukazata milimo yakulikanyako.
36 Mukahana wana wakwocha hakakahya kuli Yehova hamakumbi 7. Likumbi lyakusokesa 8 likapwe likumbi lyakukunguluka chajila.+ Mukahana Yehova wana wakwocha hakakahya. Echi hikukunguluka chajila. Kanda namukazata milimo yakulikanyako.
37 “‘Evi vikiko viwanyino vyaYehova vyamumwaka+ vize namukavilika kupwa viwanyino vyakukunguluka chajila,+ vyakuhana Yehova wana wakwocha hakakahya. Mukahana wana wakulumba,+ nawana wamanona+ wahachimuna wakuvatula, namawana avinyo,+ kweseka nomu mwakuuhanyina halikumbi lyawo.
38 Awa akiko mawana+ akuwezela kumawana akuhana hajisambata+ jaYehova, mawana enu alushiko,+ namawana enu akulisakila,+ namawana enu eka aze namuhana Yehova.
39 Jino halikumbi lyakusokesa 15 mukakweji wakusokesa 7, omu namukalinga himunakungulula lyehi jimbuto jamulifuchi, mukamulingila Yehova chiwanyino hamakumbi 7.+ Halikumbi lyakulivanga mukanoke kumilimo yenu yosena, kaha mukanoka nawa halikumbi lyakusokesa 8.+
40 Halikumbi lyakulivanga, mukambata mihako yakumitondo yamwaza, namafwo amilive,+ namitango yamafwo amavulu, namitondo yamupopela yamuchinema.* Kaha mukawahilile+ kuli Yehova Kalunga kenu hamakumbi 7.+
41 Mukalingila Yehova chiwanyino hamakumbi 7 mumwaka.+ Mukalinga chiwanyino kana mukakweji wakusokesa 7. Elu lukiko lushimbi namukavangizanga muvisemunwino vyenu vyosena.
42 Mukatwama muvisakila hamakumbi 7.+ VaIsalele vosena vakatwamenga muvisakila,
43 mangana visemunwino vyenu vyakulutwe vikatachikize+ ngwavyo ngwatwamishilenga vaIsalele muvisakila omu ngwavalowele mulifuchi lyaEjipitu.+ Ami yami Yehova Kalunga kenu.’”
44 Ngocho, Mose alwezele vaIsalele viwanyino vyaYehova vyamumwaka.
Kwinyikila Chamwishi
^ Hepe., “mukachi kavingoloshi vivali.”
^ Hine yimwe yapwile jilita 3.67. Tala Chihande B14.
^ Chipwe “lyakusuulwisa; lyakwivwisa kuwaha.”
^ Vimbwa vivali vyakusokesa muvimbwa 10 vyalifwa vyapwile jilita 4.4.
^ Vimbwa vivali vyakusokesa muvimbwa 10 vyalifwa vyapwile jilita 4.4. Tala Chihande B14.
^ Chipwe “lyakusuulwisa; lyakwivwisa kuwaha.”
^ Chipwe “vaka-kuyanda.”
^ Chipwe “mukayanjise myono yenu.”
^ Chipwe “Weshowo mwono.”
^ Chipwe pamo, “mwakahona kulijilika kulya.”
^ Chipwe “Mukayanjise myono yenu.”
^ Chipwe “yakumwanakalwiji.”
