VyavaLevi 24:1-23
24 Yehova ahanjikile lika kuli Mose ngwenyi:
2 “Lweza vaIsalele vakunehele maji amwaza akutwa nakuyenga kanawa akumunyikisa mangana manongo akamunyikenga lika.+
3 Alone awahisenga aze manongo amumbalaka yakuliwanyina kusali yalihina lyakuvatasana lize lili kuchikasha chaUnjiho mangana amunyikenga lika kumeso aYehova kuputuka nachingoloshi swi nakuchimene. Elu lukiko lushimbi namukavangizanga muvisemunwino vyenu vyosena.
4 Atumbikenga kanawa awa manongo hachitumbikilo chamanongo+ chaulu wamwaza kumeso aYehova makumbi osena.
5 “Ukambata unga wamwaza nakuwocha jimbolo 12 jamujingulule. Mbolo yimwe yikapwe yaunga wakuta muvimbwa vivali vyakusokesa muvimbwa 10 vyalifwa.*
6 Jimbolo kana ukajihake mumilumba yivali hamesa yaulu wamwaza kumeso aYehova,+ mulumba himulumba ukapwe najimbolo 6.+
7 Hamulumba hamulumba wajimbolo ukahakaho lavona, kaha yize lavona yikapwe wana wakwanukilangaho,+ wakwocha hakakahya wakuhana Yehova.
8 Jimbolo kana vakajihakenga kumeso aYehova halikumbi hilikumbi lyaSambata.+ Elu lukiko lushiko navalamanga vaIsalele myaka namyaka.
9 Jikapwe jaAlone navana venyi,+ vakajililenga muchihela chajila,+ mwomwo jinapu jajila chikuma jakuwana waYehova wakwocha hakakahya. Elu lunapu lushimbi lwamyaka namyaka.”
10 Jino muli vaIsalele mwapwile mwanalunga umwe vasemene kuli kaIsalele wapwevo, oloze ise apwile kaEjipitu.+ Kaha uze mwanalunga alizungishile nalunga wakaIsalele muchilombo.
11 Uze mwanalunga asawile nakwangula* lijina lyaKalunga.+ Ngocho vamunehele kuli Mose.+ Naye apwile ikiye Shelomite, mwanaNjivili wakumuyachi waNdane.
12 Kaha vamukashile nakumulama palanga nomu Yehova avalwezele mwakumulingila.+
13 Jino Yehova ambile kuli Mose ngwenyi:
14 “Mbata mutu uze angulanga lijina lyaKalunga umulovole kusali yachilombo. Vosena vaze vamwivwanga vanangike mavoko avo hamutwe wenyi, kaha lizavu lyosena limwase malolwa.+
15 Ulweza vaIsalele ngwove, ‘Weshowo mwangula Kalunga kenyi vamuzangamise hashili yenyi.
16 Weshowo mwasaula lijina lyaYehova vamujihe.+ Lizavu lyosena limwase malolwa. Numba apwa vene mwiza vamujihe ngana muze navajiha mutu wakusemukila mulifuchi mwomwo nasaula lijina lyaKalunga.
17 “‘Kachi nge mutu mwajiha mukwavo,* naikiye vamujihe.+
18 Weshowo mwaveta chimuna chambala nakumujiha,* ashishisemo chimuna weka. Chimuna vamushishise nachimuna mukwavo.
19 Kachi nge mutu mwavulumuna mukwavo, naikiye vamuvulumune.+
20 Valinge chifuwa nachifuwa ndwa, liso naliso ndwa, lizo nalizo ndwa. Mweshomwo nalingi mukwavo naikiye vamulingemo.+
21 Mutu uze mwaveta chimuna chambala nakumujiha ashishisemo chimuna weka.+ Oloze mutu uze mwaveta mukwavo nakumujiha, naikiye vamujihe.+
22 “‘Kuli enu muvosena kupwenga mazu akuyula wowamwe, numba mupwa muvamwiza chipwe muvakusemukila mulifuchi.+ Ami yami Yehova Kalunga kenu.’”
23 Ngocho Mose ahanjikile kuli vaIsalele, kaha vambachile uze mutu ahanjikile mazu akwangula, vamulowele kusali yachilombo nakumwasa malolwa.+ Kaha vaIsalele valingile nge muze Yehova alwezele Mose.
Kwinyikila Chamwishi
^ Vimbwa vivali vyakusokesa muvimbwa 10 vyalifwa vyapwile jilita 4.4. Tala Chihande B14.
^ Chipwe “nakushinga.”
^ Chipwe “mwajiha mwono.”
^ Chipwe “Weshowo mwajiha mwono wachimuna chambala.”
