VyavaLevi 25:1-55
25 Yehova ahanjikile cheka kuli Mose haPili yaShinai ngwenyi:
2 “Hanjika kuli vaIsalele ngwove, ‘Omu namukalinga himunengila lyehi mulifuchi lize nangumihana,+ mukeche mavu akanoke nakulama sambata kuli Yehova.+
3 Mukakuva jimbuto mumande enu hamyaka 6, kaha mukanonga mivinyo yamumande enu hamyaka 6, nakukungulula jimbuto jamulifuchi.+
4 Oloze hamwaka wakusokesa 7, mavu akanoke mwomwo himwaka wasambata yaYehova. Kanda namukakuva jimbuto mumande enu, chipwe kunonga mivinyo yamumande enuko.
5 Kanda namukaha muzumba uze naukasoka mumande enu, chipwe kukungulula mihako yamivinyo yize kamwanongeleko. Mavu amulifuchi lize akanoke mwaka wamuundu.
6 Oloze vyakulya vize navikalisokela vivene mumwaka wasambata wakunoka mavu, munahase kukavilya tuhu. Munahase kukavilya tuhu navandungo jenu vamalunga navava vamapwevo, navangamba jenu vakukamba, navangeji vakulifuchi lyeka vaze vali nakutwama nayenu,
7 navimuna, natunyama vamuchipapa vamulifuchi lyenu. Jimbuto josena jize najikalisokela mulifuchi munahase kukajilya tuhu.
8 “‘Myaka yajisambata 7 mukayilava mapapa 7. Ngocho myaka yajisambata josena namukalava nayikapwa 49.
9 Kaha mukakweji wakusokesa 7 halikumbi lyakusokesa 10, haLikumbi lyaKulinga chaKufwika haShili,+ mukembe luneta. Luneta kana lukevwakane mulifuchi lyenu lyosena.
10 Mukajilika mwaka wakusokesa 50, kaha mukavilika kusokoka mulifuchi lyosena.+ Mwaka kana naukapwa Mwaka waKusokoka kuli enu. Mutu himutu akakinduluke kumavu auswana wenyi nakutanga yenyi.+
11 Mwaka wakusokesa 50 naukapwa Mwaka waKusokoka kuli enu. Kamweshi kukakuva jimbuto, chipwe kukaha muzumba mumande enu, chipwe kukungulula mihako yamivinyo yize kamwanongeleko.+
12 Mwomwo mwaka kana ukapwe Mwaka waKusokoka. Ukapwe mwaka wajila kuli enu. Mukalye kaha jimbuto jize najikalisokela mulifuchi.+
13 “‘MuMwaka waKusokoka, mutu himutu akakinduluke kumavu auswana wenyi.+
14 Kachi nge namukalanjisa chuma kuli mukwenu, chipwe kukalanda chuma kuli ikiye, kanda namukalilyapulako.+
15 Kachi nge namukalanda wande kuli mukwenu, kaha mukaulanda kweseka namyaka yinahichimo kufuma haMwaka waKusokoka. Ikiye nawa akamilanjise kweseka namyaka yinasaleko nakwaha jimbuto.+
16 Kachi nge kunasale myaka yayivulu, kaha akatome ndando yayinene. Oloze nge myaka yinasaleko yayindende, kaha akatome ndando yayindende, mwomwo mwamilanjisa kweseka najimbuto jize namukaha.
17 Muli enu kanda namukapwa mutu numba umwe mwakalyapula mukwavoko.+ Ngwivwenunga woma ami Kalunga kenu,+ mwomwo ami yami Yehova Kalunga kenu.+
18 Kachi nge namukavangizanga jishimbi jami nakulama mazu ami akuyula, kaha namupwanga vakukingiwa mulifuchi.+
19 Lifuchi nalikalovola mihako yalyo,+ kaha namukalyanga nakwikuta nakupwa muvakukingiwa mulifuchi.+
20 “‘Oloze nge namukamba ngwenu: “Natukalya ika mumwaka wakusokesa 7, kachi nge katweshi kukuva jimbuto chipwe kwahako?”+
21 Ami nangukamikisula mumwaka wakusokesa 6, kaha lifuchi nalikalovola jimbuto jajivulu jakulya hamyaka yitatu.+
22 Namukakuva jimbuto mumwaka wakusokesa 8, kaha namukalya jimbuto munahe lyehi palanga nakumwaka wakusokesa 9. Namukalya jimbuto munahe lyehi palanga nomu najikahya jize jajihya.
23 “‘Kanda namukalanjisa mavu kumutu mangana akapwe enyi myaka namyakako,+ mwomwo anapu ami.+ Ami ngwamimona kupwa muvamwiza, muvaka-kuzuzumana.+
24 Muketavisa vatu vakasokole mavu avo mulifuchi lyenu lyosena.
25 “‘Kachi nge mukwenu nahutu, kaha himwalanjisa mavu enyi amwe, kausoko kenyi wahalinyinga akeze nakusokola mavu aze nalanjisa ndumbwenyi.+
26 Kachi nge mutu keshi nakausoko wakusokola mavu kanako, oloze ivene himwawana jimbongo jakutamo jakuwasokola,
27 akalave ndando yakuta mumyaka yinahichimo kufuma haze awalanjishile. Kaha akakindulwishile uze mutu jimbongo najikasala kundando yize amulanjishile. Kufumaho numbanyi akakinduluke kumavu auswana wenyi.+
28 “‘Oloze nge kahashile kuwana jimbongo jakusokola mavu enyiko, kaha akapwe amutu uze awalanjile palanga nakuMwaka waKusokoka.+ Awa mavu navakawakindulwisa kuli mwenyawo haMwaka waKusokoka, kaha uze mwenyawo mwakakinduluka jino kumavu enyi.+
29 “‘Kachi nge mutu mwalanjisa zuvo yenyi yize yili munganda vanajingulwisa kembwe, kaha akapwe nalisesa lyakuyisokola mumwaka vene uze nayilanjisa. Akapwe nalisesa kana mwaka wosena wamuundu.+
30 Oloze nge kayisokwele palanga nakusongo yamwakako, kaha yize zuvo yikapwe yauze ayilandanga muvisemunwino vyenyi vyosena. Kanda akayisuula haMwaka waKusokokako.
31 Oloze jizuvo jize jili mumembo akuzeneka kujingulwisa jikembwe vakajimone kupwa nge misuka yamavu amulifuchi. Venyajo vakapwe lika nalisesa lyakujisokola. Kaha vaze vajilanjile vakajisuule haMwaka waKusokoka.
32 “‘Oloze jizuvo javaLevi jize jili mujinganda javo,+ vaLevi vakapwe nalisesa lyakujisokola heshoho vanasakila.
33 Kachi nge kaLevi nahono kusokola zuvo yenyi yize alanjishile munganda, kaha vakamusuwileyo haMwaka waKusokoka.+ Mwomwo jizuvo jamujinganda javaLevi jinapu luheto lwavo muli vaIsalele.+
34 Kaha vipapa+ vize vyajingilika jinganda javo kanda vakavilanjisako, mwomwo vinapu luheto lwavo lwamyaka namyaka.
35 “‘Kachi nge ndumbwenu mwalihata nenyi nahutu, keshi navyakulikafwa navyoko,+ mukafwenu nge muze namukafwa mwiza chipwe muka-kuzuzumana,+ mangana ayoyenga lika muli enu.
36 Kanda namutambula saku kuli ikiye chipwe kunganyalila hali ikiyeko.+ Mwivwenunga Kalunga kenu woma,+ kaha ndumbwenu mwayoyanga lika muli enu.
37 Kanda namukalevanyisa jimbongo jenu hasakuko,+ chipwe kumuhana vyakulya vyenu mangana muwanyineho nganyoko.
38 Ami yami Yehova Kalunga kenu uze amilowele mulifuchi lyaEjipitu+ nakumihana lifuchi lyaKanane, mangana ngulisolole kupwa nguKalunga kenu.+
39 “‘Kachi nge ndumbwenu mwalihata nenyi nahutu, kaha ali nakusaka kulilanjisa ivene kuli enu,+ kanda namukamuzachisa milimo yaundungoko.+
40 Mukamuzachise nge hingamba wakukamba,+ nge mwiza. Mukamuzachise palanga nakuMwaka waKusokoka.
41 Kaha ikiye navana venyi* vakamiseze nakukinduluka kuli vatanga jenyi. Akakinduluke kumavu avakakuluka jenyi.+
42 Mwomwo vana vaIsalele vanapu vandungo jami vaze ngwalowele mulifuchi lyaEjipitu.+ Kanda vakalilanjisa vavene nge muze veji kulanjisanga vandungoko.
43 Kanda namukamuyanjisako.+ Mwivwenunga Kalunga kenu woma.+
44 Vandungo jenu vamalunga navava vamapwevo mukavalanda kumafuchi aze anamijingilika.
45 Mukalanda nawa vandungo kuvana vavamwiza vaze vali nakutwama nayenu,+ nakuli vaka-tanga yavo vaze vanasemukila mulifuchi lyenu, kaha navakapwanga luheto lwenu.
46 Mukavahana kuli vana venu vaze navakeza hanyima yenu vakapwe uswana wavo, luheto lwavo lwamyaka namyaka. Vakamizachilenga, olozenyi vandumbwenu vaIsalele kanda namukavayanjisako.+
47 “‘Kachi nge mwiza chipwe muka-kuzuzumana muli enu mwapwa naluheto, oloze ndumbwenu uze nalihate nenyi nahutu, kaha himwalilanjisa ivene kuli uze mwiza chipwe muka-kuzuzumana, chipwe kumutu wamutanga yamwiza,
48 kaha mutu kana vakamwitavise kumusokola numba tuhu nalilanjisa ivene. Ndumbwenyi umwe nahase kumusokola.+
49 Mokomoko natwenyi, chipwe mwananatwenyi, chipwe kausoko kenyi wahalinyinga nahase kumusokola.
“‘Oloze nge ivene mwapwa jino naluheto, kaha akalisokole ivene kuli uze amulanjile.+
50 Mutu kana nakaka yenyi uze amulanjile vakalave myaka kufuma haze alilanjishile ivene nakuheta kuMwaka waKusokoka.+ Kaha jimbongo alilanjishile jikate mumyaka kana.+ Halwola lwosena luze, makumbi enyi akuzata vakawalave kweseka nafweto yangamba wakukamba.+
51 Kachi nge kunasale myaka yayivulu, kaha akalisokole ivene najimbongo jakuta mumyaka yinasaleko.
52 Kachi nge kunasale myaka yayindende nakuheta kuMwaka waKusokoka, kaha alave ivene ndando nakulisokola kweseka namyaka yinasaleko.
53 Azachilenga kaka yenyi mwaka himwaka nge hingamba wakukamba, kaha mukamone chikupu ngwenu uze kaka yenyi keshi nakumuyanjisako.+
54 Oloze nge keshi kuhasa kulisokola ivene mujijila kanejiko, kaha akasokoke haMwaka waKusokoka,+ navana venyi* hamwe.
55 “‘Mwomwo vaIsalele vanapu vandungo jami. Vanapu vandungo jami vaze ngwalowele mulifuchi lyaEjipitu.+ Ami yami Yehova Kalunga kenu.
