VyavaLevi 26:1-46
26 “‘Kanda namukalitengela tulunga vamokomokoko,+ chipwe kwimika likombelo lyakusonga+ chipwe panda yakulemeselako. Kanda namukajika lilolwa+ mulifuchi lyenu nakulifukula kulikikoko,+ mwomwo ami yami Yehova Kalunga kenu.
2 Mukalama jisambata jami nakwivwa woma chihela chami chajila. Ami yami Yehova.
3 “‘Kachi nge namukavangizanga jindongi jami, nakulamanga jishimbi jami nakujikavangizanga,+
4 kaha nangukamihana vula hangonde yayo.+ Lifuchi nawa nalikalovolanga jimbuto,+ kaha mitondo yamuchipapa nayikemanga mihako.
5 Ngonde yenu yakuzungula jimbuto nayikaheta nakungonde yakwaha mihako yamivinyo, kaha ngonde yakwaha mihako yamivinyo nayikaheta nakungonde yakukuva jimbuto. Namukalyanga vyakulya nakwikuta, namukapwanga muvakukingiwa mulifuchi lyenu.+
6 Nangukaneha kuunda mulifuchi,+ kaha namukasavalanga chakuzeneka mutu wakumivwisa woma.+ Nangukafumisa visuma mulifuchi, kaha poko yamukwale yajita kayeshi kukahita mulifuchi lyenuko.
7 Namukahangasana vaka-kole jenu nakuvajiha najipoko jamikwale.
8 Vatu jenu vatanu navakahangasana vaka-kole 100, kaha vatu jenu 100 navakahangasana vaka-kole 10,000. Namukajiha vaka-kole jenu najipoko jamikwale.+
9 “‘Nangukamivwila uselewa,* nangukamihana vana nakumivulisa chikuma,+ kaha nangukalama lushiko ngwalishikile nayenu.+
10 Shimbu kanda mukumise kulya jimbuto jamwaka unahichi lyehi, mukajifumisa muvisete mangana mukahakemo jimbuto jajihya.
11 Nangukajika tavanaku yami mukachi kenu,+ kangweshi* kukamikanako.
12 Nangukatambukanga muli enu nakupwa nguKalunga kenu,+ kaha enu namukapwanga muvatu jami.+
13 Ami yami Yehova Kalunga kenu uze amilowele mulifuchi lyaEjipitu mangana muzeneke kupwa muvandungo javo. Ngwahokwele toka yenu nakumitambukisa oku munandula mitwe yenu.*
14 “‘Kachi nge kamweshi kungwivwililako, chipwe kukana kulama jishimbi joseneji,+
15 kachi nge namukana jindongi jami,+ nakuhunga mazu ami akuyula mangana ngwenu muzeneke kulama jishimbi jami josena nakuhokola chivwasano chami,+
16 kaha ami nangukalinga vyuma vino kuli enu. Nangukamizangamisa hakuminehela vihuli, namusongo watulo* nachishikashika vize navikamilavisa meso, nakumihokamisa. Namukalishina kukuva jimbuto mwomwo vaka-kole jenu vakiko navakajilya.+
17 Nangukamikwachila utenu, kaha vaka-kole jenu navakamifungulula.+ Vaze vamihunga navakachikima woma hakumimona,+ kahenu namukachina chakuzeneka mutu wakumihangasana.+
18 “‘Kachi nge kamweshi kukangwivwililako chamokomoko navyuma kanevi, kaha nangukamizangamisa mapapa 7 mwomwo yajishili jenu.
19 Nangukakumisa kulivwimba chenu, kaha melu enu nangukawalumuna kupwa nge fwelu+ namavu enu kupwa nge unengu.
20 Ngolo jenu najikaya mwamokomoko mwomwo mande enu kaweshi kukalovola jimbutoko,+ kaha mitondo yenu yamulifuchi nawa kayeshi kukema mihakoko.
21 “‘Kachi nge namukalikanga lika kuli ami nakukana kungwivwilila, kaha nangukamizangamisa cheka mapapa 7 kweseka najishili jenu.
22 Nangukamitumina tunyama vamuchipapa,+ kaha navakalya vana venu+ nakujiha vimuna jenu nakumilingisa kupwa muvavandende. Jijila jenu najikapunda.+
23 “‘Kachi nge kamweshi kuketavila vyuma ngunamihuhumuna+ nakulikanga lika kuli ami chamokomoko navyuma kanevi,
24 kaha nangukamyalumukila nakumizangamisa mapapa 7 mwomwo yajishili jenu.
25 Nangukaneha poko yamukwale hali enu mangana yikaminongese mwomwo yakuhokola chivwasano.+ Nge namukachinyina mujinganda jenu,+ nangukamitumina musongo nakukamihana mumavoko avaka-kole.+
26 Omu nangukenyeka vyakulya* vyenu,*+ mapwevo 10 navakamyochela jimbolo mufwolonyi yimwe, kaha navakajipezalisa nakumipangilajo.+ Kaha namukajilya, oloze kamweshi kukekutako.+
27 “‘Kachi nge kamweshi kukangwivwililako nakulikanga lika kuli ami chamokomoko navyuma kanevi,
28 kaha nangukamyalumukila+ nakumizangamisa mapapa 7 mwomwo yajishili jenu.
29 Ngocho namukalyanga nyama yavana venu vamalunga navava vamapwevo.+
30 Nangukashiula vihela vyenu vyakulunduka vyakulemesela.+ Nangukateta vitumbikilo vyenu vyavyuma vyalivumba lyamwaza, kaha nangukalumbika mijimba yenu yakufwa hamakombelo enu aunyengwe.*+ Nangukamivwila unyengwe nakumiseza.+
31 Jinganda jenu nangukajinongesa napoko yamukwale,+ vihela vyenu vyajila nangukavilingisa kupwa vyamokomoko. Kaha livumba lyalupengopengo* lyavimuna jenu vakuvatula nangukalivwila kupihya.
32 Nangukalingisa lifuchi kupwa ngundu,+ kaha vaka-kole jenu vaze navakatwamamo navakalikomokela.+
33 Kahenu nangukamimwangila kumafuchi eka.+ Nangukasolomona poko yamukwale yikamikave.+ Lifuchi lyenu nalikasala ngundu,+ kaha nangukanongesa nawa jinganda jenu.
34 “‘Halwola luze, lifuchi nalikanoka nakulama jisambata hamakumbi osena aze nalikasala ngundu omu enu namukapwa mulifuchi lyavaka-kole jenu. Halwola luze lifuchi nalikanoka* mangana likalamenga jisambata+ jize kalyalaminengako.
35 Nalikanoka hamakumbi osena aze nalikasala ngundu mwomwo kalyanokelenga hajisambata jenu omu mwatwaminengamoko.
36 “‘Vatu vaze navakayovoka muli enu+ nangukavalingisa vakalizakamine omu navakatwamanga mumafuchi avaka-kole javo. Navakachina kuwakasha chamafwo ali nakupekumuka. Navakachina kwijiva nge mutu uze ali nakuchina poko yamukwale, kaha navakalimbuka chakuzeneka mutu ali nakuvahangasana.+
37 Navakahukana hali vakwavo kwijiva nge vatu vaze vali nakuchina poko yamukwale, numba tuhu kakweshi mutu uze ali nakuvahangasanako. Kaha kamweshi kukahasa kuhonesa vaka-kole jenuko.+
38 Namukafwila kumafuchi eka,+ namukanongela mulifuchi lyavaka-kole jenu.
39 Vaze navakasalaho muli enu navakapolela mulifuchi lyavaka-kole javo+ mwomwo yakuhenga chavo. Navakapola mwomwo yakuhenga chamasevo.+
40 Kaha navakambulula jishili javo,+ najishili jamasevo navilinga vyamasevo vyakuhenga. Navaketavila ngwavo kavashishikileko, kaha valikangile kuli ami.+
41 Ngocho ngwavalumukilile,+ kaha ngwavanehele mulifuchi lyavaka-kole javo.+
“‘Pamo michima yavo yakuzeneka kujihana* nayikalinyisa.+ Ngocho navakavashishishilamo mwomwo yakuhenga chavo.
42 Nangukanuka jino lushiko ngwalishikile naYakova,+ naIsaka,+ naApalahama.+ Nangukanuka nawa lifuchi.
43 Omu vasezele lifuchi kana, lyanokele nakulama jisambata,+ kaha lyasalile ngundu. Vavashishishililemo hakuhenga chavo mwomwo vakanyine mazu ami akuyula nakuhunga jishimbi jami.+
44 Chipwe ngocho, omu navakapwa mulifuchi lyavaka-kole javo, ami kangweshi kukavakana+ chipwe kuvambila nakuvanongesako. Mwomwo nge nangukalinga ngocho, kaha nangukahokola lushiko+ ngwalishikile navakiko. Ami yami Yehova Kalunga kavo.
45 Nangukanuka lushiko ngwalishikile navakakuluka javo+ vaze ngwalowele mulifuchi lyaEjipitu kumeso avaka-mafuchi+ mangana ngulisolole kupwa nguKalunga kavo. Ami yami Yehova.’”
46 Eji jikiko jindongi jaYehova, namazu enyi akuyula, najishimbi jenyi jize ahanyine vaIsalele haPili yaShinai kuhichila muli Mose.+
Kwinyikila Chamwishi
^ Hepe., “Nangukamitala.”
^ Chipwe “mwono wami kaweshi.”
^ Hepe., “nakumitambukisa oku munoloka.”
^ Kulumbununa, musongo waTB.
^ Hepe., “nangukenyeka mbwechi yenu.” Pamo kutalisa kujimbwechi vatulikililenga mbolo.
^ Chipwe “mbolo.”
^ Lizu lyachiHepeleu vazachisa hano linahase kutalisa “kutuji,” kaha valizachisa kuvyuma vyakwivwisa unyengwe.
^ Chipwe “lyakusuulwisa; lyakwivwisa kuwaha.”
^ Chipwe “nalikalama sambata.”
^ Chipwe “michima yavo yakunjinjavala.”
