VyavaLevi 27:1-34
27 Yehova ahanjikile lika kuli Mose ngwenyi:
2 “Hanjika kuli vaIsalele ngwove, ‘Kachi nge mutu mwashika Yehova lushiko lwakulipwila+ ngwenyi mwamuhana ndando yakweseka mumutu,*
3 kaha ndando yakweseka mumutu walunga wamyaka yakusemuka 20 nakuheta ku 60, yikapwe jishekele* japalata 50 kweseka nakulema chashekele yamuchihela chajila.*
4 Oloze nge mwahana ndando yakweseka mumutu wapwevo, kaha ndando kana yikapwe jishekele 30.
5 Nge mutu ali namyaka yakusemuka yitanu nakuheta ku 20, nge lunga, kaha ndando yenyi yikapwe jishekele 20, nge pwevo, kaha ndando yenyi yikapwe jishekele 10.
6 Kachi nge mutu ali nakakweji umwe nakuheta kumyaka yitanu yakusemuka, nge lunga, kaha ndando yenyi yikapwe jishekele japalata jitanu, nge pwevo, kaha ndando yenyi yikapwe jishekele jitatu.
7 “‘Nge mutu ali namyaka yakusemuka 60 nakutwala kwilu, nge lunga, kaha ndando yenyi yikapwe jishekele 15, nge pwevo, kaha ndando yenyi yikapwe jishekele 10.
8 Oloze nge mutu uze nashiki lushiko ahutwa chikuma,+ ngocho nahono kufweta ndando kana, kaha akemane kumeso akapilishitu mangana akamutomene ndando. Uze kapilishitu akamutomene ndando yakweseka muvyuma mwahasa kufweta.+
9 “‘Kachi nge mutu nashiki lushiko ngwenyi mwahana chimuna wakutela kuhana kuli Yehova, kaha uze chimuna mwakahana kuli Yehova mwakapwa wajila.
10 Kanda akamushishisa nachimuna weka chipwe kumutambasana nachimuna wamupi chipwe wamwazako. Oloze nge mwakamutambasana naweka, kaha uze chimuna wakulivanga nauze natambasana navakapwa vajila.
11 Nge mwahana chimuna uze napihi,+ uze kavatela kuhana kuli Yehovako, kaha akamwimike kumeso akapilishitu.
12 Kapilishitu akatome ndando kweseka nakuwaha chipwe kupihya chauze chimuna. Ndando yize mwakatoma kapilishitu kanda yikalumukako.
13 Oloze kachi nge mutu kana mwakasaka kusokola uze chimuna, kaha akahakilaho chimbwa chimwe chakusokesa muvimbwa vitanu chandando yauze chimuna.+
14 “‘Kachi nge mutu mwajilika zuvo yenyi nakuyihana kuli Yehova kupwa yajila, kaha kapilishitu akatome ndando yazuvo kana kweseka nakuwaha chipwe kupihya chayo. Ndando yize mwakatoma kapilishitu yikiko vene nayikapwa ndando yayo.+
15 Kachi nge mutu uze najilika zuvo yenyi mwasaka ayisokole, kaha akahakileho jimbongo jakweseka muchimbwa chimwe chakusokesa muvimbwa vitanu chandando yayo. Ngocho nayikapwa cheka yenyi.
16 “‘Kachi nge mutu mwajilika chimbwa chimwe chawande wenyi nakuchihana kuli Yehova, kaha ndando yacho yikapwe kweseka najimbuto navakatumbamo. Yikapwe homele* yimwe yamanona ambale yakweseka mujishekele japalata 50.
17 Kachi nge mwakajilika wande wenyi haMwaka waKusokoka,+ kaha ndando yawo kanda yikalumukako.
18 Kachi nge mwakajika wande wenyi kufuma haMwaka waKusokoka, kaha kapilishitu akamulavile ndando yakweseka namyaka yize yinasaleko kuheta kuMwaka waKusokoka naukakavangizaho. Kapilishitu akatepulule kundando kana.+
19 Oloze nge mutu uze ajilikile wande wenyi mwasaka kuusokola, kaha akahakileho jimbongo jakweseka muchimbwa chimwe chakusokesa muvimbwa vitanu chandando yawo. Ngocho naukapwa cheka wenyi.
20 Nge uze wande kausokweleko, ngocho mutu weka naulande, kaha keshi kahasa kukausokolako.
21 Nge uze wande vanausokola haMwaka waKusokoka, kaha vakauhane kuli Yehova kupwa wande wenyi wajila. Wande kana naukapwa wavapilishitu.+
22 “‘Kachi nge mutu mwajilika wande alanjile uze kawapwa uswana wenyiko, kaha himwauhana kuli Yehova,+
23 kaha kapilishitu akamulavile ndando kweseka namyaka yize yinasaleko kuheta kuMwaka waKusokoka. Akahane ndando kana halikumbi vene lize.+ Yinapu yajila kuli Yehova.
24 HaMwaka waKusokoka, uze wande ukakinduluke kuli mwenyawo uze aulanjishile.+
25 “‘Ndando hindando yikapwe kweseka nakulema chashekele yamuchihela chajila. Shekele yimwe yikapwe jingela* 20.
26 “‘Oloze kanda nakukapwa mutu mwakajilika mwanachimuna watwatwako, mwomwo chimuna watwatwa apwa lyehi waYehova.+ Numba apwa ngombe wakuji chipwe mukoko, napu lyehi wambala waYehova.+
27 Kachi nge chimuna kana napihi, ngocho himwamusokola kweseka nandando yenyi, kaha akahakileho chimbwa chimwe chakusokesa muvimbwa vitanu chandando kana.+ Oloze nge kamusokweleko, kaha vakamulanjise hali yize ndando.
28 “‘Oloze kanda nakukapwa mutu uze mwakalanjisa chipwe kusokola chuma chenyi chize nalisuula kuhana Yehovako, numba apwa mutu numba chimuna numba wande. Cheshocho chuma navahana Yehova chinapu chajila chikuma.+
29 Mutu uze vanatongwela kufwa kanda vakamusokolako.+ Vakamujihe.+
30 “‘Chimbwa chimwe chakusokesa muvimbwa 10+ chakujimbuto jamumande chipwe chakumihako yakumitondo chinapu chaYehova. Chinapu chajila kuli Yehova.
31 Kachi nge mutu mwasaka kusokola chimbwa chenyi chakusokesa muvimbwa 10, kaha akahakileho chimbwa chimwe chakusokesa muvimbwa vitanu chandando yacho.
32 Weshowo ngombe chipwe mukoko wakusokesa 10 havimuna vaze navaseluka mwishi yambwechi yakafunga akapwe wajila kuli Yehova.
33 Kanda akakekesa uze chimuna numba apwa wamwaza chipwe wamupiko. Kanda akamutambasana nawekako. Oloze kachi nge mwakamutambasana naweka, kaha uze chimuna wakulivanga nauze natambasana navakapwa vajila.+ Kanda navakavasokolako.’”
34 Eji jikiko jishimbi jize Yehova ahanyine Mose haPili yaShinai+ mangana ajilweze vaIsalele.
Kwinyikila Chamwishi
^ Chipwe “mumwono.”
^ Shekele yimwe yapwile jingalamu 11.4. Tala Chihande B14.
^ Chipwe “kweseka nashekele yajila.”
^ Homele yimwe yapwile jilita 220. Tala Chihande B14.
^ Ngela yimwe yapwile jingalamu 0.57. Tala Chihande B14.
