VyavaLevi 3:1-17
3 “‘Kachi nge mutu mwahana wana wakusolola kuunda,+ wakuutanga wavangombe, numba apwa kuji chipwe chihwevo, uze chimuna mwahana kuli Yehova akapwe walambwe.
2 Akanangike mavoko enyi hamutwe wayauze ngombe yenyi mwakahana, kaha akamujihile kuchikolo chambalaka yakuliwanyina. Jino vapilishitu vana vaAlone vakasapwile manyinga enyi kujihachi jalijiko lyakulumbila josena.
3 Kuwana uze wakusolola kuunda akambateko vimwe nakuvihana kupwa wana waYehova wakwocha hakakahya.+ Akambateko maji+ akumijingwa osena,
4 najiso jivali namaji ajo akumutanda. Akafumise chiwuva chamaji akulisuli najiso.+
5 Kaha vana vaAlone vamalunga vakavilumbe helu lyawana wakulumba uze uli halijiko lyakulumbila mangana vikakakumuke wishi.+ Unapu wana wakwocha hakakahya walivumba lyalupengopengo* kuli Yehova.+
6 “‘Kachi nge mutu mwahana Yehova wana wamikoko chipwe wavapembe kupwa wana wakusolola kuunda, akahane chimuna walambwe wachizamba chipwe wachihwevo.+
7 Nge mwahana mwanamukoko wachizamba kupwa wana, kaha akamuhane kumeso aYehova.
8 Akanangike mavoko enyi hamutwe wayauze mukoko mwakahana, kaha akamujihile kuchikolo chambalaka yakuliwanyina. Jino vana vaAlone vakasapwile manyinga enyi kujihachi jalijiko lyakulumbila josena.
9 Kuwana uze wakusolola kuunda akambateko maji nakuwahana kupwa wana waYehova wakwocha hakakahya.+ Akambate mukila wamaji wosena wakumutanda, namaji akumijingwa osena,
10 najiso jivali namaji ajo akumutanda. Akafumise chiwuva chamaji akulisuli najiso.+
11 Kaha kapilishitu akavilumbe halijiko lyakulumbila mangana vikakakumuke wishi kupwa vyakulya.* Unapu wana wakwocha hakakahya wakuhana Yehova.+
12 “‘Nge mwahana pembe kupwa wana, kaha akamuhane kumeso aYehova.
13 Akanangike mavoko enyi hamutwe wayauze pembe, kaha akamujihile kuchikolo chambalaka yakuliwanyina. Jino vana vaAlone vakasapwile manyinga enyi kujihachi jalijiko lyakulumbila josena.
14 Vyuma vize mwakahana kupwa wana waYehova wakwocha hakakahya shina maji akumijingwa osena,+
15 najiso jivali namaji ajo akumutanda. Akafumise chiwuva chamaji akulisuli najiso.
16 Kaha kapilishitu akavyoche halijiko lyakulumbila mangana vikakakumuke wishi kupwa vyakulya.* Unapu wana wakwocha hakakahya walivumba lyalupengopengo.* Maji osena anapu aYehova.+
17 “‘Kanda namukalya maji chipwe manyingako.+ Elu lukiko lushimbi namukavangizanga myaka namyaka muvisemunwino vyenu vyosena kweshokwo namukatwamanga.’”
Kwinyikila Chamwishi
^ Chipwe “lyakusuulwisa; lyakwivwisa kuwaha.”
^ Hepe., “mbolo,” kulumbununa chazano chaKalunga chakuwana wakusolola kuunda.
^ Hepe., “mbolo,” kulumbununa chazano chaKalunga chakuwana wakusolola kuunda.
^ Chipwe “lyakusuulwisa; lyakwivwisa kuwaha.”
