VyavaLevi 4:1-35
-
Wana wahashili (1-35)
4 Yehova ambile nawa kuli Mose ngwenyi:
2 “Lweza vaIsalele ngwove, ‘Kachi nge mutu* nalingi shili chakuzeneka kuchisakula+ hakulinga chuma chimwe havyuma vize ambile Yehova ngwenyi kavatela kuvilingako, akalinge vyuma vino:
3 “‘Nge kapilishitu vawavisa+ nalingi shili+ nakuhakisa vatu mumulonga, kaha akahane Yehova mwanangombe wakuji walambwe kupwa wana wahashili yize nalingi.+
4 Akanehe ngombe wakuji kumeso aYehova kuchikolo chambalaka yakuliwanyina.+ Akanangike mavoko enyi hamutwe wayauze ngombe, kaha akamujihile kumeso aYehova.+
5 Uze kapilishitu vawavisa+ akambate manyinga amwe ayauze ngombe wakuji nakuwaneha mumbalaka yakuliwanyina.
6 Akatupike munwe wenyi mumanyinga+ nakuwasapwila mapapa 7+ kumeso aYehova, kulutwe lwalihina lyakuvatasana lyachihela chajila.
7 Uze kapilishitu akashile manyinga amwe nawa kujimbinga jalijiko lyakulumbila vyuma vyalivumba lyamwaza+ lize lili kumeso aYehova mumbalaka yakuliwanyina. Kaha manyinga aze nawakasalaho akawahingunwine kushina yalijiko lyakulumbila wana wakulumba+ lize lili kuchikolo chambalaka yakuliwanyina.
8 “‘Kapilishitu akafumise maji osena ayauze ngombe wakuji wawana wahashili, namaji akumijingwa osena,
9 najiso jivali namaji ajo akumutanda. Akafumise chiwuva chamaji akulisuli najiso.+
10 Vyuma kana vikapwe nge vize vyakufumisa kungombe wakuji wawana wakusolola kuunda.+ Kaha kapilishitu akavyoche halijiko lyakulumbila wana wakulumba mangana vikakakumuke wishi.
11 “‘Oloze lilambu lyauze ngombe wakuji nanyama yenyi yosena, namutwe, namikono, namijingwa, natuji,+
12 navyosena vize navikasalaho akavitwale kusali yachilombo kuchihela chitoma kuze veji kumwangilanga uto* mangana akavyoche hakakahya.+ Akavyochele kuze veji kumwangilanga uto.
13 “‘Jino nge lizavu lyavaIsalele lyosena lili namulonga wakulinga shili chakuzeneka kuchisakula,+ oloze chikungulwilo kachatachikijile ngwacho chinalingi vyuma vize ambile Yehova ngwenyi kavatela kuvilingako,+
14 kaha kutwala muze yize shili hinavayitachikiza, chikungulwilo chikanehe mwanangombe wakuji kumbalaka yakuliwanyina kupwa wana wahashili.
15 Vakulwane valizavu vakanangike mavoko avo hamutwe wayauze ngombe kumeso aYehova, kaha vakamujihile kumeso aYehova.
16 “‘Kaha kapilishitu vawavisa akanehe manyinga amwe ayauze ngombe wakuji mumbalaka yakuliwanyina.
17 Akatupike munwe wenyi mumanyinga nakuwasapwila mapapa 7 kumeso aYehova, kulutwe lwalihina lyakuvatasana lyachihela chajila.+
18 Uze kapilishitu akashile manyinga amwe kujimbinga jalijiko lyakulumbila+ vyuma vyalivumba lyamwaza lize lili kumeso aYehova mumbalaka yakuliwanyina. Kaha manyinga aze nawakasalaho akawahingunwine kushina yalijiko lyakulumbila wana wakulumba lize lili kuchikolo chambalaka yakuliwanyina.+
19 Akafumise maji osena nakuwalumba halijiko lyakulumbila mangana akakakumuke wishi.+
20 Ngombe kanou akamulinge nge muze alinganga uze ngombe mukwavo wawana wahashili. Omu mukiko mwakamulinga. Ngocho kapilishitu mwakavalingila chakufwika hashili,+ kaha navakavakonekela.
21 Akatwale uze ngombe kusali yachilombo, kaha akamwoche ngana muze ochanga uze ngombe wakulivanga.+ Unapu wana wahashili wachikungulwilo.+
22 “‘Nge mwata+ umwe nalingi shili chakuzeneka kuchisakula nakupwa namulonga hakulinga chuma chimwe havyuma vize ambile Yehova Kalunga kenyi ngwenyi kavatela kuvilingako,
23 nge natachikiza yize shili nalingi hakuhokola lushimbi, kaha akanehe mwanapembe wachizamba walambwe kupwa wana.
24 Akanangike mavoko enyi hamutwe wayauze mwanapembe, kaha akamujihile kumeso aYehova kuchihela veji kujihilanga wana wakulumba.+ Unapu wana wahashili.
25 Kapilishitu akambate manyinga amwe amwanapembe wawana wahashili kumunwe wenyi nakuwashila kujimbinga+ jalijiko lyakulumbila wana wakulumba. Kaha manyinga aze nawakasalaho akawahingunwine kushina yalijiko lyakulumbila wana wakulumba.+
26 Akalumbe maji osena ayauze mwanapembe halijiko lyakulumbila mangana akakakumuke wishi, ngana muze eji kulumbanga maji awana wakusolola kuunda.+ Ngocho kapilishitu mwakamulingila chakufwika hashili, kaha navakamukonekela.
27 “‘Kachi nge mutu* wamulifuchi lyenu nalingi shili chakuzeneka kuchisakula nakupwa namulonga hakulinga chuma chimwe havyuma vize ambile Yehova ngwenyi kavatela kuvilingako,+
28 nge natachikiza yize shili nalingi, kaha akanehe mwanapembe wachihwevo walambwe kupwa wana hashili yenyi.
29 Akanangike mavoko enyi hamutwe wayauze mwanapembe wachihwevo wawana wahashili, kaha akamujihile kuchihela veji kujihilanga wana wakulumba.+
30 Kapilishitu akambate manyinga amwe kumunwe wenyi nakuwashila kujimbinga jalijiko lyakulumbila wana wakulumba. Kaha manyinga aze nawakasalaho akawahingunwine kushina yalijiko lyakulumbila.+
31 Akafumise maji+ osena ayauze mwanapembe ngana muze veji kufumisanga maji awana wakusolola kuunda.+ Uze kapilishitu akawalumbe halijiko lyakulumbila mangana akakakumuke wishi. Unapu wana walivumba lyalupengopengo* kuli Yehova. Ngocho kapilishitu mwakamulingila chakufwika hashili, kaha navakamukonekela.
32 “‘Oloze nge mwahana mwanamukoko kupwa wana wahashili, kaha akahane mwanamukoko wachihwevo walambwe.
33 Akanangike mavoko enyi hamutwe wayauze mwanamukoko wawana wahashili, kaha akamujihile kuchihela veji kujihilanga wana wakulumba, kupwa wana wahashili.+
34 Kapilishitu akambate manyinga amwe ayauze mwanamukoko wawana wahashili kumunwe wenyi nakuwashila kujimbinga jalijiko lyakulumbila wana wakulumba.+ Kaha manyinga aze nawakasalaho akawahingunwine kushina yalijiko lyakulumbila.
35 Akafumise maji osena ngana muze eji kufumisanga maji amwanamukoko wachizamba wawana wakusolola kuunda. Uze kapilishitu akawahake halijiko lyakulumbila helu lyamawana aYehova akwocha hakakahya mangana akakakumuke wishi.+ Ngocho kapilishitu mwakamulingila chakufwika hashili, kaha navakamukonekela.+
Kwinyikila Chamwishi
^ Chipwe “mwono.”
^ Chipwe “uto wamaji,” kulumbununa uto uze wazovele namaji avimuna vakuvatula.
^ Chipwe “mwono.”
^ Chipwe “lyakusuulwisa; lyakwivwisa kuwaha.”
