VyavaLevi 5:1-19
5 “‘Kachi nge mutu* nevu mutambi wakusaka mutu ahane unjiho havyuma vimwe,*+ kaha nawa ikiye napu chinjiho, chipwe amonangako, chipwe navitachikiza, oloze kate kuvyambulula, mutu kana nalingi shili. Ngocho navakamuzangamisa hashili yenyi.
2 “‘Mokomoko, kachi nge mutu* mwakwata chuma chachipi, numba upwa mujimba wakanyama wamupi wakufwa, chipwe wachimuna wamupi wakufwa, chipwe wavyuma vyavipi vyakutambuka mumayongomena,+ mutu kana mwapihya, kaha mwapwa namulonga numba tuhu katachikizanga ngwenyi chuma akwatanga chachipiko.
3 Mokomoko kachi nge mutu mwakwata haze hanapihi kumutu chakuzeneka kutachikiza,+ chipwe kukwata cheshocho chuma chinapihi lyehi chize nachimupihisa, kaha himwatachikiza ngwenyi chuma akwatanga chachipi, mutu kana mwapwa namulonga.
4 “‘Mokomoko kachi nge mutu* mwalusuka kulishinga kulinga chuma, numba chipwa chamwaza chipwe chachipi okunyi kachitachikijileko, kahomu mwanuka ngwenyi alusukanga kulishinga mwapwa namulonga.*+
5 “‘Kachi nge mutu mwapwa namulonga havyuma kanevi, kaha akambulule shili+ yenyi nalingi.
6 Akanehe chimuna wawana wenyi wahamulonga kuli Yehova washili yenyi nalingi.+ Akanehe mwanamukoko wachihwevo chipwe mwanapembe wachihwevo kupwa wana wahashili. Kaha kapilishitu mwakamulingila chakufwika hashili.
7 “‘Kachi nge mwahona kuneha mukoko kuli Yehova, kaha anehe tutela vavali chipwe vana vatukwilimba+ vavali kupwa wana wenyi wahamulonga. Kajila umwe wawana wahashili, kaha kajila mukwavo wawana wakulumba.+
8 Akavanehe kuli kapilishitu, kaha kapilishitu akavangile kuhana kajila wawana wahashili. Akatanye shingo yauze kajila, oloze kanda akamuvatula mutweko.
9 Kaha manyinga amwe ayauze kajila wawana wahashili akawasapwile kuluhachi lwalijiko lyakulumbila. Oloze manyinga aze nawakasalaho akawazuzulwile kushina yalijiko lyakulumbila.+ Unapu wana wahashili.
10 Uze kajila mukwavo akamuhane kupwa wana wakulumba kweseka najindongi jakumuhanyinamo.+ Kaha kapilishitu mwakamulingila chakufwika hashili yize nalingi, kaha navakamukonekela.+
11 “‘Nge mwahona kuneha tutela vavali chipwe vana vatukwilimba vavali, kaha anehe chimbwa chimwe chaunga wamwaza chakusokesa muvimbwa 10 vyalifwa*+ kupwa wana wahashili. Kanda akahakako maji chipwe lavonako, mwomwo unapu wana wahashili.
12 Akanehe unga kana kuli kapilishitu, kaha kapilishitu akatapuleho livoko lyato kupwa wana wakwanukilaho. Akaulumbe halijiko lyakulumbila helu lyamawana aYehova akwocha hakakahya mangana ukakakumuke wishi. Unapu wana wahashili.
13 Kapilishitu mwakamulingila chakufwika hayeshoyo shili nalingi, kaha navakamukonekela.+ Uze wana naukasalaho ukapwe wakapilishitu+ ngana mwawana wamanona.’”+
14 Yehova ahanjikile lika kuli Mose ngwenyi:
15 “Kachi nge mutu* mwahona kushishika, kaha mwalinga shili kupandama kuvyuma vyajila vyaYehova+ chakuzeneka kuchisakula, akanehe chizamba chamukoko walambwe kuli Yehova kupwa wana wahamulonga.+ Ndando yamukoko kana yikate mujishekele* japalata jakweseka nakulema chashekele yamuchihela chajila.*+
16 Akamuhane mangana akafwike hashili yize nalingi kupandama kuchihela chajila. Akahakileho nawa chimbwa chimwe chakusokesa muvimbwa vitanu vyandando yenyi+ nakuchihana kuli kapilishitu. Ngocho mwakamulingila chakufwika hashili+ nachizamba chamukoko wawana wahamulonga, kaha navakamukonekela.+
17 “Kachi nge mutu* mwalinga shili hakulinga chuma chimwe havyuma vize ambile Yehova ngwenyi kavatela kuvilingako, mwapwa namulonga numba tuhu katachikizanga ngwenyi nalingi shiliko, kaha navakamuzangamisa hashili yenyi.+
18 Mutu kana akambate chizamba chamukoko walambwe kuutanga wenyi kweseka nandando vanamutomena, akamunehe kuli kapilishitu kupwa wana hamulonga.+ Kapilishitu mwakamulingila chakufwika hashili yenyi yize alinganga chakuzeneka kutachikiza, kaha navakamukonekela.
19 Wana kana unapu wana wahamulonga, mwomwo nalingi shili kuli Yehova.”
Kwinyikila Chamwishi
^ Hepe., “mutambi wakwangula (wakushinga).” Pamo mutambi wavyuma vyavipi vanalingi wakushinga uze napihisa chipwe chinjiho uze nahono kwambulula.
^ Chipwe “mwono.”
^ Chipwe “mwono.”
^ Chipwe “mwono.”
^ Echi kafwe chili nakulumbununa nge mutu kana nahono kutesamo lushiko lwenyi.
^ Chimbwa chimwe chakusokesa muvimbwa 10 vyalifwa chapwile jilita 2.2. Tala Chihande B14.
^ Chipwe “mwono.”
^ Shekele yimwe yapwile jingalamu 11.4. Tala Chihande B14.
^ Chipwe “jakweseka nashekele yajila.”
^ Chipwe “mwono.”
