VyavaLevi 6:1-30
6 Yehova ahanjikile lika kuli Mose ngwenyi:
2 “Kachi nge mutu* mwahona kushishika nakulinga shili kuli Yehova+ hakwonga mukwavo havyuma vanamuhane kulama, chipwe vize vanamusela,+ chipwe nge mweva vyuma vyamukwavo, chipwe nge mwalyapula mukwavo,
3 chipwe nge nawane chuma chize chinajimbala nakuchitangisa, nakulishinga mwakwonga hajishili kaneji,+ kaha akalinge vyuma vino:
4 Nge nalingi shili nakupwa namulonga, kaha akakindulwise chuma chize evanga, chipwe chize atambulanga muwiji, chipwe chize alyapulanga mukwavo, chipwe chize vamuhananga kulama, chipwe chuma chakujimbala chize awananga,
5 chipwe cheshocho alishinganga mwakwonga. Akakindulwise chuma kana+ nakuhakilaho nawa chimbwa chimwe chakusokesa muvimbwa vitanu chandando yacho. Akachihane kuli mwenyacho halikumbi lize navakamuwana namulonga.
6 Kaha akambate chizamba chamukoko walambwe wakuutanga wenyi, akamunehe kuli kapilishitu kupwa wana wahamulonga,+ wakuhana Yehova. Chimuna kana akate mundando vanamutomena.
7 Kapilishitu mwakamulingila chakufwika hashili kumeso aYehova, kaha navakamukonekela hacheshocho nalingi chize chinamunehela mulonga.”+
8 Yehova ahanjikile lika kuli Mose ngwenyi:
9 “Lweza Alone navana venyi vamalunga ngwove, ‘Elu lukiko lushimbi lwawana wakulumba:+ Wana wakulumba ukapwe halijiko lyakulumbila ufuku wosena palanga nakuchimene, kaha halijiko lyakulumbila hakapwe lika kakahya.
10 Kapilishitu akavwale uvwalo wenyi wakuzachisa milimo,+ kaha mukachi akavwale putula* yalihina.+ Akafumise uto*+ wachimuna wawana wakulumba uze valumbanga halijiko lyakulumbila, akauhake kutenga yalijiko lyakulumbila.
11 Akazule uvwalo wenyi+ nakuvwala weka, kaha akatwale uze uto kuchihela chitoma kusali yachilombo.+
12 Halijiko lyakulumbila hakapwe lika kakahya, kanda kakajimako. Kapilishitu akahake jikunyi+ halijiko chimene hichimene, kaha akahakengaho wana wakulumba, namaji awana wakusolola kuunda mangana vikakakumuke wishi.+
13 Kaze kakahya kakakwate lika halijiko lyakulumbila, kanda kakajimako.
14 “‘Elu lukiko lushimbi lwawana wamanona:+ Vana vaAlone vamalunga vakahane wana kanou kumeso aYehova, kulutwe lwalijiko lyakulumbila.
15 Kaha mwanaAlone umwe akatapuleho livoko lyato lyaunga wamwaza wawana wamanona uze vanahingunwina maji, nalavona yize yiliho. Akavilumbe halijiko lyakulumbila mangana vikakakumuke wishi, kupwa wana wakwanukilaho walivumba lyalupengopengo* kuli Yehova.+
16 Wana uze naukasalaho vakaulye kuli Alone navana venyi vamalunga.+ Uze wana wajimbolo jakuzeneka chimbalwila vakaulile muchihela chajila. Vakaulile muchipango chambalaka yakuliwanyina.+
17 Wana kana kanda navakawocha nachimbalwilako.+ Ngunavahanewo kupwa chazano chavo chakumawana ami akwocha hakakahya.+ Unapu wana wajila chikuma+ ngana mwawana wahashili nawana wahamulonga.
18 Vana vaAlone vamalunga vosena vakalye wana kana.+ Unapu chazano chavo chakumawana aYehova akwocha hakakahya chamyaka namyaka muvisemunwino vyenu vyosena.+ Cheshocho nachituta kumawana kana nachipwa chajila.’”
19 Yehova ahanjikile cheka kuli Mose ngwenyi:
20 “Ou ukiko wana waAlone navana venyi vamalunga uze navakahana Yehova halikumbi lize navakawavisa Alone:+ chimbwa chimwe chaunga wamwaza chakusokesa muvimbwa 10 vyalifwa*+ kupwa wana wamanona.+ Vakahane chimbwa chimwe nachimene, kaha chimbwa chikwavo nachingoloshi.
21 Vakauchingasane namaji nakuwochela muchifwoyo.+ Kaha ukaunehe wakwocha lyehi wakuchingasana kanawa namaji. Ukauhane kupwa wana wamanona wakupazula muvihanda walivumba lyalupengopengo* kuli Yehova.
22 Kapilishitu vawavisa havana venyi+ uze mwakamushisa akahane wana kana. Elu lukiko lushimbi navakavangizanga myaka namyaka: Wana wosena vakaulumbe mangana ukakakumuke wishi kuli Yehova.
23 Wana wamanona wakapilishitu vakaulumbe wosena. Kanda vakaulyako.”
24 Yehova ahanjikile cheka kuli Mose ngwenyi:
25 “Lweza Alone navana venyi vamalunga ngwove, ‘Elu lukiko lushimbi lwawana wahashili:+ Chimuna wawana wahashili vakamujihile kumeso aYehova kuchihela veji kujihilanga+ chimuna wawana wakulumba. Unapu wana wajila chikuma.
26 Kapilishitu uze mwakahana wana kanou wahashili ikiye mwakaulya.+ Vakaulile muchihela chajila, muchipango chambalaka yakuliwanyina.+
27 “‘Cheshocho nachituta kunyama kana nachipwa chajila. Kachi nge mutu mwasapwila manyinga ayo hauvwalo wenyi, kaha ukambata uze uvwalo wenyi nakuukosela muchihela chajila.
28 Ndeho yauma yize navakatelekelamo nyama kana vakayichike. Oloze nge navakayitelekela mundeho yaunengu, kaha vakayikumbe nakuyikosongola nameya.
29 “‘Malunga vavapilishitu vosena vakalye uze wana.+ Unapu wajila chikuma.+
30 Oloze wana wahashili kanda vakaulyako kachi nge manyinga amwe achimuna wawana kana vanawengisa mumbalaka yakuliwanyina mangana valinge chakufwika hashili muchihela chajila.+ Wana kana vakaulumbe hakakahya.
Kwinyikila Chamwishi
^ Chipwe “mwono.”
^ Chipwe “uvwalo wakwishi.”
^ Chipwe “uto wamaji,” kulumbununa uto uze wazovelenga namaji avimuna vakuvatula.
^ Chipwe “lyakusuulwisa; lyakwivwisa kuwaha.”
^ Chimbwa chimwe chakusokesa muvimbwa 10 vyalifwa chapwile jilita 2.2. Tala Chihande B14.
^ Chipwe “lyakusuulwisa; lyakwivwisa kuwaha.”
