VyavaLevi 7:1-38
7 “‘Elu lukiko lushimbi lwawana wahamulonga:+ Unapu wana wajila chikuma.
2 Chimuna wawana wahamulonga vakamujihile kuchihela veji kujihilanga vimuna vamawana akulumba, kaha manyinga+ enyi vakawasapwile kujihachi jalijiko lyakulumbila josena.+
3 Kapilishitu akahane maji+ ayauze chimuna osena, namukila wamaji, namaji akumijingwa,
4 najiso jivali, namaji ajo akumutanda. Afumise chiwuva chamaji akulisuli najiso.+
5 Kapilishitu akavilumbe halijiko lyakulumbila mangana vikakakumuke wishi kupwa wana wakwocha hakakahya wakuhana Yehova.+ Unapu wana wahamulonga.
6 Malunga vavapilishitu vosena vakalye uze wana,+ vakaulile muchihela chajila. Unapu wana wajila chikuma.+
7 Lushimbi lwawana wahashili lukiko navakavangizanga hakuhana wana wahamulonga. Wana kanou ukapwe wakapilishitu uze mwakalinga chakufwika hashili.+
8 “‘Kachi nge kapilishitu mwahanyina mutu wana wakulumba, kaha lilambu+ lyayou chimuna likapwe lyakapilishitu.
9 “‘Wana wamanona wosena uze vanochela mufwolonyi, chipwe hachikango, chipwe muchifwoyo+ ukapwe wakapilishitu uze mwauhana.+
10 Oloze wana wamanona wosena uze vanachingasana namaji,+ chipwe uze waumu+ ukapwe wavana vaAlone vamalunga. Vosena vakapwe navyazano vyovimwe.
11 “‘Elu lukiko lushimbi lwawana wakusolola kuunda+ uze mwahana mutu kuli Yehova:
12 Kachi nge mwauhana kupwa wana wakusolola kusakwilila,+ kaha akauhanyine kumwe najimbolo jakuzeneka chimbalwila jamujingulule jili nawina hakachi jakuchingasana namaji, najimbolo jajilelu chikuma jakuzeneka chimbalwila jakukwita maji, najimbolo jamujingulule jili nawina hakachi jaunga wamwaza jakuchingasana kanawa namaji.
13 Hakuhana wana wenyi wakusolola kuunda, uze unapu wana wakusakwilila, akahakileho nawa jimbolo jachimbalwila jamujingulule.
14 Havyuma vyosenevi akambateho chazano chimwe nakuchihana kuli Yehova kupwa chazano chajila. Kaha chikapwe chakapilishitu uze mwakasapwila manyinga avimuna vamawana akusolola kuunda halijiko lyakulumbila.+
15 Nyama yayauze chimuna wawana wenyi wakusolola kuunda, uze unapu wana wakusakwilila vakayilye halikumbi lize mwakayihana. Kanda akalama yize nyama palanga nakuchimeneko.+
16 “‘Kachi nge chimuna wakuvatula mwakahana napu wawana walushiko+ chipwe wakulisakila,+ kaha vakamulye halikumbi lize mwakamuhana. Yeshoyo nyama nayikasalaho vanahase kukayilya tuhu halikumbi nalikakavangizaho.
17 Oloze nyama yize nayikasalaho nakuheta kulikumbi lyamuchitatu vakayilumbe hakakahya.+
18 Kachi nge nyama yimwe yakuwana wakusolola kuunda navakayilya halikumbi lyamuchitatu, kaha mutu uze mwakayihana kaveshi kukamwitavilako. Wana wenyi kaveshi kukawitavilako mwomwo unapu waunyengwe. Kaha mutu* uze mwakalya kuwana kana navakamuzangamisa hakuhenga chenyi.+
19 Yeshoyo nyama nayituta kuchuma chachipi, kanda vakayilyako. Vakayilumbe hakakahya. Mutu uze natomo nahase tuhu kulya nyama yize yinatomo.
20 “‘Kachi nge mutu* uze napihi mwalya nyama yawana wakusolola kuunda yize yinapu yaYehova, mutu* kana vamujihe.+
21 Kachi nge mutu* mwakwata chuma chachipi, numba akwata haze hanapihi kumutu,+ numba kanyama wamupi,+ numba chuma chachipi chaunyengwe,+ kaha himwalya kunyama yawana wakusolola kuunda yize yinapu yaYehova, mutu* kana vamujihe.’”
22 Yehova ahanjikile lika kuli Mose ngwenyi:
23 “Lweza vaIsalele ngwove, ‘Kanda namukalya maji+ angombe wakuji chipwe amwanamukoko wachizamba chipwe apembeko.
24 Maji akanyama wakulifwila, namaji akanyama uze vanajihi kuli mukwavo vakawazachise tuhu kuvyuma vyeka, oloze enu kanda namukawalyako.+
25 Weshowo mwalya maji akanyama uze nahane kupwa wana waYehova wakwocha hakakahya, vamujihe.
26 “‘Kanda namulya manyinga+ akajila chipwe akanyama kweshokwo namukatwamangako.
27 Weshowo* mwalya manyinga vamujihe.’”+
28 Yehova ahanjikile lika kuli Mose ngwenyi:
29 “Lweza vaIsalele ngwove, ‘Weshowo mwahana Yehova wana wakusolola kuunda akanehe chazano chimwe kuli Yehova chakuwana wenyi wakusolola kuunda.+
30 Akanehe maji+ napambo vyayauze kanyama kupwa wana waYehova wakwocha hakakahya. Kaha akavihungise noku noku kupwa wana wakuhungisa+ kumeso aYehova.
31 Kaha kapilishitu akalumbe aze maji halijiko lyakulumbila mangana akakakumuke wishi,+ oloze yize pambo yikapwe yaAlone navana venyi vamalunga.+
32 “‘Mukambata lihinji lyachilyo lyayauze kanyama wawana wenu wakusolola kuunda, mukalihane kapilishitu kupwa chazano chajila.+
33 MwanaAlone walunga uze mwakahana manyinga akanyama wawana wakusolola kuunda, namaji, akambate lize lihinji lyachilyo kupwa chazano chenyi.+
34 Ami nangutambulanga pambo yawana wakuhungisa nalihinji lyachazano chajila vyakuwana wakusolola kuunda wavaIsalele, kaha nanguvihananga kuli kapilishitu Alone navana venyi vamalunga. Elu nalupwanga lushimbi navakavangizanga vaIsalele myaka namyaka.+
35 “‘Echi chikiko chapwile chazano chavapilishitu, chaAlone navana venyi vamalunga, chakuwana waYehova wakwocha hakakahya halikumbi lize Mose avanehele mangana vazachilenga Yehova kupwa vapilishitu.+
36 Yehova ahanyine lushimbi halikumbi lize awavishile Alone navana venyi vamalunga ngwenyi vavahane chazano kanechi chakufuma kuli vaIsalele.+ Elu lunapu lushimbi navakavangizanga myaka namyaka muvisemunwino vyavo vyosena.’”
37 Elu lukiko lushimbi lwawana wakulumba,+ nawana wamanona,+ nawana wahashili,+ nawana wahamulonga,+ nawana wakuhakisa vatu haupilishitu,+ nawana wakusolola kuunda,+
38 ngana muze Yehova alwezele Mose haPili yaShinai+ halikumbi lize alwezele vaIsalele vahane Yehova mawana avo mupambo yaShinai.+
Kwinyikila Chamwishi
^ Chipwe “mwono.”
^ Chipwe “mwono.”
^ Chipwe “mwono.”
^ Chipwe “mwono.”
^ Chipwe “mwono.”
^ Chipwe “Weshowo mwono.”
