VyavaLevi 8:1-36
-
Kuwavisa vapilishitu vakutanga yaAlone (1-36)
8 Yehova ahanjikile lika kuli Mose ngwenyi:
2 “Neha Alone navana venyi vamalunga,+ nauvwalo wavo,+ namaji akuwavisa,+ nangombe wakuji wawana wahashili, navizamba jamikoko vavali, namutonga wambolo yakuzeneka chimbalwila.+
3 Kaha ukungulwila lizavu lyosena kuchikolo chambalaka yakuliwanyina.”
4 Mose alingile ngana muze amulwezele Yehova, kaha lizavu lyosena lyakungulukile kuchikolo chambalaka yakuliwanyina.
5 Mose ambile jino kulizavu ngwenyi: “Evi vikiko vyuma natulweze Yehova ngwenyi tulinge.”
6 Mose anehele Alone navana venyi vamalunga, avasanyishile meya.+
7 Kufumaho avwikile Alone lihina lyakukuluka.+ Amukashile muhya mumbunda,+ nakumuvwika ndeleji yakuzeneka mavoko,+ kaha amuvwikile lipunu,+ alikashile kanawa namuhya+ walyo.
8 Amuvwikile chipwiko,+ kaha ahakilemo Ulime naTumine.+
9 Amujingile nawa lihina+ kumutwe wenyi, kaha helu yalize lihina haluholo ahakileho kalilata kaulu kakuya muupalasese kakuvyakuma, kakiko katachikijilo kajila kakulihana chenyi,*+ ngana muze vamulwezele kuli Yehova.
10 Jino Mose ambachile maji akuwavisa, awavishile tavanaku navyuma vyosena vize vyapwilemo nakuvijilika.+
11 Kufumaho asapwilile maji amwe akuwavisa mapapa 7 halijiko lyakulumbila, kaha awavishile jino lize lijiko navyuma vyacho vyosena, nambashiya, nachitumbikilo chayo mangana avijilike.
12 Kaha ahingunwinyine maji amwe akuwavisa hamutwe waAlone, amuwavishile mangana amujilike.+
13 Mose anehele jino vana vaAlone vamalunga, avavwikile vikuto. Avakashile mihya mujimbunda, nakuvavwika matepa+ ngana muze vamulwezele kuli Yehova.
14 Anehele ngombe wakuji wawana wahashili, kaha Alone navana venyi vamalunga vanangikile mavoko avo hamutwe wayauze ngombe wawana wahashili.+
15 Mose ajihile uze ngombe, ambachile manyinga+ enyi kumunwe nakuwashila kujimbinga jalijiko lyakulumbila kujihachi jalyo josena. Kaha lize lijiko lyakulumbila alitomesele kushili, oloze manyinga aze asalileho awahingunwinyine kushina yalijiko lyakulumbila mangana alijilike, alilingile chakufwika hashili.
16 Kufumaho Mose ambachile maji akumijingwa osena, nachiwuva chamaji akulisuli, najiso jivali namaji ajo, kaha avilumbile halijiko lyakulumbila mangana vikakumuke wishi.+
17 Kaha Mose ambachile uze ngombe wakuji wosena, nalilambu lyenyi, natuji twenyi, avyochele kusali yachilombo+ ngana muze vamulwezele kuli Yehova.
18 Anehele chizamba chamukoko wawana wakulumba, kaha Alone navana venyi vamalunga vanangikile mavoko avo hamutwe wayauze chizamba.+
19 Mose ajihile uze chizamba chamukoko, ambachile manyinga enyi nakuwasapwila kujihachi jalijiko lyakulumbila josena.
20 Avatwile uze chizamba chamukoko muvipuka, kaha alumbile mutwe wenyi, navize vipuka, namaji.*
21 Mose akosele mijingwa namikono nameya, alumbile uze mukoko wosena halijiko lyakulumbila mangana akakumuke wishi. Wapwile wana wakulumba walivumba lyalupengopengo,* hiwana wakwocha hakakahya waYehova, ngana muze vamulwezele kuli Yehova.
22 Mose anehele chizamba chamukoko wamuchivali wakuhakisa mutu haupilishitu,+ kaha Alone navana venyi vamalunga vanangikile mavoko avo hamutwe wayauze chizamba.+
23 Ajihile uze chizamba chamukoko, ambachile manyinga enyi amwe nakuwashila kusongo yalitwitwi lyaAlone lyakuchilyo, nakumunwe wenyi washina wakulivoko lyachilyo, nakumunwe wenyi washina wakulihinji lyachilyo.
24 Mose anehele vana vaAlone vamalunga, ahakile manyinga amwe auze mukoko kusongo yamatwitwi avo akuchilyo, nakuminwe yavo yashina yakumavoko avo achilyo, nakuminwe yavo yashina yakumahinji avo achilyo. Manyinga aze asalileho, awasapwilile kujihachi jalijiko lyakulumbila josena.+
25 Kaha anehele maji, namukila wamaji, namaji akumijingwa, nachiwuva chamaji akulisuli, najiso jivali namaji ajo, nalihinji lyachilyo.+
26 Mumutonga wajimbolo jakuzeneka chimbalwila uze wapwile kumeso aYehova, ambachilemo mbolo yimwe yamujingulule,+ nambolo yimwe yamujingulule yawina hakachi yakuchingasana namaji,+ nambolo yimwe yayilelu chikuma. Ajihakile helu lyawaze maji nahalihinji lyayauze mukoko lyachilyo.
27 Kaha vyosena avihakile mumavoko aAlone namumavoko avana venyi vamalunga, vavihungishile noku noku kupwa wana wakuhungisa kumeso aYehova.
28 Mose avatambwilevyo nakuvilumba halijiko lyakulumbila helu lyawana wakulumba mangana vikakumuke wishi. Vyapwile wana wakuhakisa mutu haupilishitu walivumba lyalupengopengo,* hiwana wakwocha hakakahya waYehova.
29 Jino Mose ambachile pambo yayauze chimuna, ayihungishile noku noku kupwa wana wakuhungisa kumeso aYehova.+ Pambo yayauze mukoko wakuhakisa mutu haupilishitu yapwile jino chazano chaMose ngana muze vamulwezele kuli Yehova.+
30 Mose ambachile maji amwe akuwavisa+ namanyinga amwe aze apwile halijiko lyakulumbila, awasapwilile hali Alone nahauvwalo wenyi, nahali vana venyi vamalunga vaze apwile navo nahauvwalo wavo. Ngocho ajilikile Alone nauvwalo wenyi, navana venyi vamalunga+ nauvwalo wavo.+
31 Kaha Mose ambile kuli Alone navana venyi vamalunga ngwenyi: “Telekelenu+ nyama yinasaleho kuchikolo chambalaka yakuliwanyina, muyilile vene kuze nambolo yize yili mumutonga wakuzachisa hakuhaka mutu haupilishitu, ngana muze vangulwezele ngwavo, ‘Alone navana venyi vamalunga vakayilye.’+
32 Kaha nyama nambolo yize nayikasalaho cheka mukayilumbe hakakahya.+
33 Hamakumbi 7, kanda naukasosoloka kuchikolo chambalaka yakuliwanyinako, kuvanga omu nawakakuma makumbi akumihaka haupilishitu, mwomwo mulimo wakumihaka haupilishitu* naukambata makumbi 7.+
34 Yehova ambile ngwenyi tulinge vyumevi tunalingi lelo mangana tumilingile chakufwika hashili.+
35 Mutwame kuchikolo chambalaka yakuliwanyina musana naufuku hamakumbi 7,+ nakulinga nge omu namilweze Yehova,+ mangana muzeneke kufwa. Omu mukiko vanangulweze.”
36 Kaha Alone navana venyi vamalunga valingile vyuma vyosena vize avalwezele Yehova kuhichila muli Mose.
Kwinyikila Chamwishi
^ Chipwe “kakiko muchama wenyi wajila.”
^ Chipwe “namaji akujiso.”
^ Chipwe “lyakusuulwisa; lyakwivwisa kuwaha.”
^ Chipwe “lyakusuulwisa; lyakwivwisa kuwaha.”
^ Hepe., “mulimo wakuzalisa mavoko enu.”
