VyavaLevi 9:1-24
-
Alone mwahana mawana akuwavisa (1-24)
9 Jino halikumbi lyakusokesa 8,+ Mose asanyikile Alone navana venyi vamalunga navakulwane javaIsalele.
2 Kaha ambile kuli Alone ngwenyi: “Mbata mwanangombe wawana wahashili+ nachizamba chamukoko wawana wakulumba, vosena valambwe, uvanehe kumeso aYehova.
3 Hanjika kuli vaIsalele ngwove, ‘Mbatenu chizamba chapembe wawana wahashili namwanangombe nachizamba chamukoko vamwaka umwe, valambwe, vawana wakulumba,
4 nangombe wakuji, nachizamba chamukoko vawana wakusolola kuunda,+ mangana muvahane kumeso aYehova. Muhane nawana wamanona+ wakuchingasana namaji, mwomwo likumbi lyalelo Yehova mwasoloka kuli enu.’”+
5 Ngocho vana vaIsalele vanehele vyuma vize avalwezele Mose kumbalaka yakuliwanyina. Kaha lizavu lyosena lyejile nakwimana kumeso aYehova.
6 Mose ambile ngwenyi: “Evi vikiko namilweze Yehova ngwenyi muvilinge mangana upahu waYehova usoloke kuli enu.”+
7 Jino ambile kuli Alone ngwenyi: “Pandama kulijiko lyakulumbila uhane wana wove wahashili,+ nawana wove wakulumba, mangana valingile chakufwika hashili yove+ nahashili yavava vakuzuvo yove. Uhane nawa wana vananehe vatu,+ uvalingile chakufwika hashili+ ngana muze nambe Yehova.”
8 Hahaze vene Alone apandamine kulijiko lyakulumbila, ajihile mwanangombe wawana wenyi wahashili.+
9 Jino vana vaAlone vamuhanyine manyinga+ auze mwanangombe, atupikilemo munwe wenyi, awashilile kujimbinga jalijiko lyakulumbila. Kaha manyinga aze asalileho awahingunwinyine kushina yalijiko lyakulumbila.+
10 Ambachile maji, najiso, nachiwuva chamaji akulisuli vyachimuna wawana wahashili, avilumbile halijiko lyakulumbila mangana vikakumuke wishi ngana muze Yehova alwezele Mose.+
11 Kaha alumbile nyama nalilambu hakakahya kusali yachilombo.+
12 Kufumaho ajihile chimuna wawana wakulumba, kaha vana vaAlone vamuhanyine manyinga ayauze chimuna, awasapwilile kujihachi jalijiko lyakulumbila josena.+
13 Vamuhanyine nawa vipuka vyayauze chimuna wawana wakulumba namutwe wenyi. Avilumbile halijiko lyakulumbila mangana vikakumuke wishi.
14 Kaha akosele mijingwa namikono, avilumbile halijiko lyakulumbila helu lyawana wakulumba mangana vikakumuke wishi.
15 Anehele jino uze wana wavatu, kaha akwachile pembe wawana wahashili yavatu, amujihile nakumuhana kupwa wana wahashili, ngana uze wakulivanga.
16 Anehele nawa wana wakulumba nakuuhana kweseka najindongi jakuuhanyinamo.+
17 Kufumaho ahanyine wana wamanona,+ atapwileho livoko lyato, kaha aulumbile halijiko lyakulumbila mangana ukakumuke wishi, kuhakila kuwana wakulumba wachimene.+
18 Kaha ajihile uze ngombe wakuji nauze chizamba chamukoko vaze vapwile wana wakusolola kuunda wavatu. Vana vaAlone vamuhanyine manyinga avaze vimuna, kaha awasapwilile kujihachi jalijiko lyakulumbila josena.+
19 Oloze vihanda vyamaji ayauze ngombe wakuji,+ namukila wamaji wayauze chizamba chamukoko, namaji osena ahelu lyavize vyamujimo, najiso, nachiwuva chamaji akulisuli,+
20 vavihakile vyosena hajipambo javaze vimuna. Kufumaho vize vihanda vyamaji avilumbile halijiko lyakulumbila mangana vikakumuke wishi.+
21 Oloze Alone ahungishile jize jipambo nalize lihinji lyachilyo noku noku kupwa wana wakuhungisa kumeso aYehova ngana muze ambile Mose.+
22 Alone olwele mavoko enyi, awatalikishile kuli vatu nakuvakisula.+ Kaha ashikumukile kufuma kuze apwile nakulumbila wana wahashili, nawana wakulumba namawana akusolola kuunda.
23 Kukumisako Mose naAlone vengilile mumbalaka yakuliwanyina, kaha valovokelemo nakukisula vatu.+
Upahu waYehova wasolokele jino kuvatu vosena,+
24 kaha kakahya kafumine kuli Yehova+ nakwocha uze wana wakulumba navihanda vyamaji vize vyapwile halijiko lyakulumbila. Omu vatu vosena vamwene chuma kana, vatambakanyine nakufukama chameso hamavu.+
