WaChimoteu 1 1:1-20
1 Ami Paulu, kaposetolo kaKulishitu Yesu kweseka nalushimbi lwaKalunga Mulwilo wetu, naKulishitu Yesu ou apwa lutalililo lwetu,+
2 nguli nakusonekela ove Chimoteu,*+ ove mwanami wamwenemwene+ mulufwelelo:
Likoji lyalinene, nakutetela, nakuunda vyakuli Kalunga Setu, naKulishitu Yesu Mwata wetu vipwenga nayove.
3 Ngana muze ngwakukolezezele ngwami utwame muEfwesu omu ngwapwile kwakamwihi nakuya kuMasetonya, mukiko nangukukolezeza nawa noholili, mangana ukande vatu vamwe vahone kunangula vyuma vyamakuli,
4 chipwe kuhaka michima yavo kuvihande vyamakuli,+ nakukulava visaka vyavatu. Vyuma kana vyaya mwamokomoko,+ vyeji kulingisanga kaha vatu vahumikize, kaha nawa kavyeshi kuneha vyuma vyakuli Kalunga vize navizamisa lufweleloko.
5 Chuma vanahakilako eji jindongi* shina mangana tupwenga nazangi+ yakufuma kumuchima utoma, nakuchivezu chamwaza, nakulufwelelo+ lwakuzeneka kulyonga.
6 Vatu vamwe hakupyapumuka kuvyumevi, vanahungukila kukuhanjika chamokomoko.+
7 Vasaka vapwenga vaka-kunangula+ jishimbi, oloze vyuma vali nakuhanjika chipwe evi vakakachila ngwavo vyamuchano kavyeshi kuvalumbunukilako.
8 Tunatachikiza jino ngwetu Jishimbi japwa jamwenemwene kachi nge mutu mwajikavangiza kanawa,
9 hakutachikiza nge jishimbi kana kavajikashila mutu wakwolokako, oloze vatu vaupapwoki+ vakulikanga, vaka-kuzamukila Kalunga, navaka-shili, navaka-kuhona kushishika,* navaka-kujilulula vyuma vyajila, navaka-kujiha masevo, navaka-kujiha manevo, navaka-kujiha vatu,
10 navaka-ujila,* namalunga vaka-kusavala vakwavo malunga, namangwangwa, navaka-kwonga, navaka-kulishinga mwamakuli, nacheshocho chuma chalimbalaka nakunangula chamwenemwene,*+
11 nge omu mwaya mujimbu wamwaza waupahu waKalunga ou apwa wakuwahilila, uze vanguhanyine ami.+
12 Ngunamusakwilila Kulishitu Yesu Mwata wetu ou anguhanyine ngolo, mwomwo angumwene kupwa nguwakushishika hakunguhana mulimo,+
13 numba tuhu kunyima ngwapwilenga ngumuka-kusaula, ngumuka-kuyanjisa, ngumuka-kasautu.+ Chipwe ngocho, vangutetelele mwomwo ngwavilingilenga chakuhona kutachikiza, chakuhona lufwelelo.
14 Kaha likoji lyalinene lyaMwata wetu lyambwambumukilile chikuma hali ami nalufwelelo nazangi eyi yili muli Kulishitu Yesu.
15 Mazu awa anatela kuwafwelela, kaha anatela kuwetavila mwosena, akwamba ngwavo: Kulishitu Yesu ejile mukaye nakulwila vaka-shili.+ Kaha hali ava vaka-shili ami yami muka-shili chikuma.+
16 Chipwe ngocho, vangutetelele mangana Yesu Kulishitu angusolwele muchima wenyi wosena wakutalilila chikoki, ami vene muka-shili chikuma, nakungulingisa ngupwenga chakutalilaho kuli vaze navajika lufwelelo hali ikiye mangana vakawane kuyoya chahaya myaka yosena.+
17 Jino kuli Mwangana wahaya myaka namyaka,+ ou keshi kupolako,+ ou vahona kumona,+ uka wenyi kaha Kalunga,+ kuli ikiye kupwenga kavumbi naupahu haya myaka namyaka. Amene.
18 Ove mwanami Chimoteu, eji jindongi ngunakuhanejo* nge muze mwaya upolofweto uze vavulukile hali ove, mangana ulwenga lika jita yamwenemwene kuzachisa mazu kana,+
19 nakulamanga lufwelelo nachivezu chamwaza+ chize vanakane vatu vamwe, nakuvombesa jino lufwelelo lwavo nge wato.
20 Hali vakiko hali naHumeneu+ naAlekesande, kaha ngunavahane lyehi kuli Satana+ mangana hakuvazangamisa valinangule kuhona kumusaulanga Kalunga.
Kwinyikila Chamwishi
^ Ulumbunwiso, “Ou Avumbika Kalunga.”
^ Chipwe “elu lushimbi.”
^ Chipwe “navaze kaveshi nazangi yakwililako.”
^ Chipwe “chachikangule; changanyo.”
^ Tala Mukana waMazu, “Ujila.”
^ Chipwe “elu lushimbi ngunakuhanelwo.”
