WaChimoteu 1 3:1-16
3 Mazu awa anatela kuwafwelela: Kachi nge mutu ali nakusaka kupwa kalama,+ kaha ali nakufwila mulimo wamwenemwene.
2 Shikaho kalama atela kupwa wakuzeneka chuma chakumuhanyina mulonga, lunga ambata pwevo umwe kaha, muka-kulinga vyuma nakwesekela, muka-kushinganyeka mwamangana,+ muka-kulinga vyuma mukulonga, wachisambo,+ uze atamo kunangula vakwavo,+
3 keshi muka-kupendako,+ keshi muka-ukenyako,* oloze muka-kwashiwisa muchima,+ keshi muka-kukokojolako,+ keshi muka-kuzanga jimbongoko,+
4 lunga uze eji kutwaminyinanga* vaze vakuzuvo yenyi mujila yamwenemwene, uze ali navana vakuliluula, vakuhaka chikuma mangana kuvyuma,+
5 (kachi nge mutu katachikijile mwakutwaminyina vaze vakuzuvo yenyiko, kaha mwahasa ngachilihi kuzakama chikungulwilo chaKalunga?),
6 keshi mutu wamuhya mukwitavako,+ kuchina pamo mwalivwimba nakwingila mukusopesa chize vasopesa Liyavolo.
7 Kaha atela nawa kupwa napuho yamwenemwene kuvatu vakuweluka,+ kuchina mwengila mukumutoleka* namumuheto waLiyavolo.
8 Vaka-kuzachila navakiko nawa vatela kuhaka mangana kuvyuma, keshi vamalimi avaliko,* keshi vaka-kunwa vinyo vyavivuluko, keshi vaka-kufwila kunganyala vyuma mulizangaminako,+
9 vapwenga vaka-kulama vyuma vyajila vyakusweka vyalufwelelo nachivezu chitoma.+
10 Kaha nawa, vatu kana chatete vaveseke vavamone nge vanatemo, kufumaho vapwenga vaka-kuzata, hakuwana nge kaveshi nachuma chakuvahanyina mulongako.+
11 Mapwevo navakiko nawa vatela kuhaka mangana kuvyuma, keshi vaka-kuvangila vakwavoko,+ vapwenga vaka-kulinga vyuma nakwesekela, vakushishika muvyuma vyosena.+
12 Vaka-kuzachila vapwenga malunga vambata pwevo umwe umwe kaha, vaze veji kutwaminyinanga vana vavo navaze vakujizuvo javo mujila yamwenemwene.
13 Mwomwo malunga vaze veji kuzatanga mujila yamwenemwene, vali nakulitungila vavene puho yamwaza, nakuhanjikanga nakukasunuka kutalisa kulufwelelo lwavo muli Kulishitu Yesu.
14 Numba tuhu nguli nakufwila kwiza okwo kuli ove kalinwomu, oloze nguli nakukusonekela vyuma evi,
15 mangana nge nangushimbula, ove utachikize omu watela kutwamina navaze vakuzuvo yaKalunga,+ vaze vapwa chikungulwilo chaKalunga ou ayoya, chikiko panda kaha nawa nguji yamuchano.
16 Chikupu vene, vyuma vyajila vyakusweka vize vyatalisa kumuchima ou wakuzachila Kalunga vyapwa vyavilemu chikuma: ‘Ikiye vamusolwele mumujimba wanyama,+ vamuvulukile kupwa wakwoloka mushipilitu,+ asolokele kuli vangelo,+ vamwambulwile muli vaka-mafuchi,+ vamwitavilile mukaye,+ vamutambwile mwilu muupahu.’
Kwinyikila Chamwishi
^ Chipwe “keshi muka-kuzungako.”
^ Chipwe “eji kuyulanga.”
^ Chipwe “mukumusaula.”
^ Chipwe “keshi vaka-kulyongako.”
