WaChimoteu 1 4:1-16
4 Oloze mazu vahwima amba* hatoma ngwawo kumakumbi akulutwe nakukapwa vatu vamwe navakasosoloka kulufwelelo hakuhaka michima yavo kumazu vahwima akuhungumwisa,*+ nakukunangula chavandemone,
2 nakumakuli avaka-kwonga,+ vaze vali navivezu vyaviveza kwijiva nge vyakwocha nachikungo chakakahya.
3 Vakiko veji kukanyisanga vatu kulimbata,+ nakulweza vatu valihende kuvyakulya+ atengele Kalunga ngwenyi vaze vali nalufwelelo,+ vaze nawa vatachikiza kanawa muchano vavilyenga+ nakusakwilila.
4 Mwomwo vyuma vyosena atenga Kalunga vyapwa vyamwenemwene,+ kaha kakweshi chuma chimwe vatela kukanako,+ kachi nge vanachitambula nakusakwilila,
5 mwomwo vanachijilika namazu aKalunga nakuchilombela.
6 Kachi nge nauvahuhumuna vandumbwetu namazu awa, kaha naupwanga umuka-kuzata wamwenemwene waKulishitu Yesu, wakuzala kanawa namazu alufwelelo, nawawa akunangula chamwenemwene echi unakavangizanga kanawa.+
7 Kana vihande vyamakuli, vyamokomoko+ nge vize veji kwambululanga tushinakaji vamapwevo. Oloze lilongese ove ivene nakufwila kupwa namuchima wakuzachila Kalunga.
8 Mwomwo kulilongesa kumujimba* cheji kunganyalisanga kaha chindende. Oloze kupwa namuchima wakuzachila Kalunga cheji kunganyalisanga muvyuma vyosena, mwomwo chikwechi lushiko lwakuneha kuyoya choholyapwa nachize nachikeza kulutwe.+
9 Mazu kana anatela kuwafwelela, kaha anatela kuwetavila chikupu.
10 Shikaho tuli nakuzachila nangolo nakulihakaho chikuma,+ mwomwo tunajiki lutalililo lwetu hali Kalunga ou ayoya, ou apwa Mulwilo+ wavatu vosena,+ chikumanyi wavaze vakushishika.
11 Vahanenga lika jishimbi eji, nakuvanangulanga.
12 Kanda nakupwa mutu numba umwe mwalumbilisa ukweze woveko. Oloze pwako uwakutalilaho kuli vaka-kushishika, mukuhanjika, namutwamiso, namuzangi, namulufwelelo, namukutoma.
13 Lihakeho lika kutangilanga kumeso avatu,+ nakulembelelanga* vakwenu, nakunangulanga palanga nomu nangwiza.
14 Kanda nauliula wana uli muli ove uze vakuhanyine kuhichila muupolofweto uze wahanjikile hali ove omu lizavu lyavakulwane lyakunangikile mavoko avoko.+
15 Hunanana* havyuma evi, lihane kuvikiko mangana kuzovoloka chove vachimone kuli vatu vosena.
16 Lilamenga ove ivene, nakuhaka muchima kukunangula chove.+ Kakachilanga kuvyumevi, mwomwo hakulinga ngocho naulilwila ove ivene nakulwila vaze navakwivwilila nawa.+
Kwinyikila Chamwishi
^ Hela., “Oloze shipilitu yamba.”
^ Hela., “kuvashipilitu vakuhungumwisa.”
^ Chipwe “kulinyuka kumujimba.”
^ Chipwe “nakukolezezanga.”
^ Chipwe “Shinganyeka.”
