WaChimoteu 1 6:1-21
6 Vosena vaze vakashiwa mutoka yaundungo vamonenga lika vakaka javo ngwavo vatela kuvahana chikuma kavumbi,+ mangana lijina lyaKalunga nakunangula chenyi vazeneke kuvisaula.+
2 Kaha nawa vaze vali navakaka javo vaka-kwitava, kanda navahona kuvalemesako mwomwo ngwavo hivandumbwavo. Olozenyi vatela kuvazachila chikuma mwomwo vaze vali nakunganyala kumilimo yavo yamwaza hivakwavo vaka-kwitava, kaha nawa hivandumbwavo vazanga.
Vanangulenga lika vyumevi, nakuvalembelelanga.
3 Kachi nge mutu mwanangula vyuma vyamakuli nakuhona kwitavila jindongi jamwenemwene*+ jakuli Mwata wetu Yesu Kulishitu, chipwe kunangula chize chaya mwaya muchima wakuzachila Kalunga,+
4 kaha mutu kana napu wakulivwimba, kaha katachikijile chuma nachimweko.+ Ikiye afwila kulikokojwesa nakulipikila hamazu.+ Vyuma kanevi vyeji kunehanga lushiushiu, navikokojola, nakulivangijikila,* nakulishinganyekela vyuma vyavipi,
5 nakulingisa vatu vaze valumbuka muvishinganyeka,+ vaze nawa vahona muchano valipulilenga jipami havyuma vyavindende, hakushinganyeka ngwavo kupwa namuchima wakuzachila Kalunga hijila yakuwanyinamo nganyo.+
6 Chikupu vene kupwa namuchima wakuzachila Kalunga+ oku tunasuuluka navyuma tuli navyo chatwama nanganyo yayinene.
7 Mwomwo katwanehele chuma numba chimwe mukayeko, kaha nawa katweshi kufumamo nachuma chimweko.+
8 Ngocho omu tuli navyakulya nauvwalo,* natusuulukanga navyuma kanevi.+
9 Oloze vaze veji kufwilanga kupwa naluheto veji kwingilanga mucheseko namumuheto,+ namukufwila cheka nacheka chamokomoko chachipi chize cheji kutwalanga vatu kukunonga nakukuvenyeka.+
10 Mwomwo zangi yakuzanga jimbongo yinapu mwiji wavyuma vyavipi vyosena, kaha hakupwa nazangi kaneyi, vamwe vanahungumuka lyehi kulufwelelo, kaha vanalituvasana vavene namakava amavulu.+
11 Oloze ove mutu waKalunga, chinanga vyuma kanevi. Kaha fwilanga kwoloka, nakupwa namuchima wakuzachila Kalunga, nalufwelelo, nazangi, nalukakachila, nakuvova.+
12 Lwako jita yamwenemwene yalufwelelo, linjilila kukuyoya chahaya myaka yosena, chize vakusanyikilile, chize nawa wahanjikile hatoma mujila yamwenemwene kumeso avinjiho vavavulu.
13 Nguli nakukuhana jindongi kumeso aKalunga uze eji kulamanga nakuyoyesa vyuma vyosena, naKulishitu Yesu ou ahanyine unjiho hakuhanjika hatoma mujila yamwenemwene kumeso aPondeu Pilatu,+
14 ngwami, ulamenga lushimbi elu chakuzeneka kukuwanyina lipenga chipwe chuma chakukuhanyina mulonga palanga nakukusoloka chaMwata wetu Yesu Kulishitu,+
15 chize mwakasolola ou apwa uka wenyi Muka-kuyula, wakuwahilila halwola vatongola. Ikiye apwa Mwangana wavamyangana ava vali nakuyula, kaha nawa Mwata wavamyata ava vali nakuyula,+
16 ikiye uka wenyi kaha ahona kufwa,+ uze atwama mumumunyi uze vahona kupandama,+ kaha kanda vamumonengaho lyehi kuli mutuko, kaha nawa kaveshi kuhasa kumumonako.+ Kuli ikiye kupwenga kavumbi nangolo jahaya myaka yosena. Amene.
17 Valwezenga vaze vali naluheto mukatwamino kamyaka yino* vazenekenga kulivwimba,* chipwe kujika lutalililo lwavo haluheto lwakuzeneka kwilila,+ oloze shina hali Kalunga ou eji kutuhananga vyuma vize tweji kulivwisanga kuwaha.+
18 Valweze valingenga mwamwaza, vapwenga navilinga vyamwenemwene vyavivulu, vapwenga vaka-kuhanahana, vaze valizanga kulipangilanga vyuma navakwavo,+
19 nakulilamina vavene chihela chamwaza chakumyaka yakulutwe,+ mangana vakahase kulinjilila kukuyoya chamwenemwene.+
20 Ove Chimoteu, lamanga chuma chize vakuselelele+ nakulihendanga kumazu amokomoko aze eji kusaulanga vyuma vyajila, nakuvyuma vyakuhingika vize valyonga kuvuluka ngwavo “chinyingi.”+
21 Hakulisashila hachinyingi kana, vamwe vanapyapumuka kulufwelelo.
Likoji lyalinene lipwenga nayenu.
Kwinyikila Chamwishi
^ Chipwe “jajikangule; janganyo.”
^ Chipwe “nahanjikiso yakasautu.”
^ Chipwe “nazuvo.” Hela., “navyakulifwika.”
^ Tala Mukana waMazu.
^ Chipwe “kulizundula helu.”
