WaChimoteu 2 1:1-18
1 Ami Paulu, kaposetolo kaKulishitu Yesu nge mwaya muchima waKalunga kweseka nalushiko lwakuyoya chize cheza kuhichila muli Kulishitu Yesu,+
2 nguli nakukusonekela ove Chimoteu, ove mwanami ngwazanga:+
Likoji lyalinene, nakutetela, nakuunda vyakuli Kalunga Setu, naKulishitu Yesu Mwata wetu vipwenga nayove.
3 Ngunamusakwilila Kalunga ou ngweji kuzachilanga mulimo wajila nachivezu chitoma ngana muze valingile vakakuluka jami, kangweshi kukuvulyama mukulembelela chami ufuku namusanako.
4 Omu nguli nakwanuka masoji ove, nguli nakufwila kukumona, mangana nguwahilile chikuma.
5 Mwomwo ngunanuka lufwelelo lwove lwakuzeneka kulyonga,+ luze lwavangilile kupwa muli kaka yove wapwevo Lowise namuli noko Yunese, kaha lukiko ngunafwelela nawa ngwami luli muli ove.
6 Shikaho nguli nakukwanukisa ngwami ou wana waKalunga uli muli ove uze watambwile hakukunangika mavoko ami, uusambizenga ukwate nge kakahya.+
7 Mwomwo Kalunga katuhanyine shipilitu yakulizuzukila nawomako,+ oloze yangolo,+ yazangi, yakushinganyeka mwamangana.
8 Ngocho kanda nawivwila sonyi unjiho wakuvuluka Mwata wetu,+ chipwe ami funge vanakase mwomwo yaikiyeko, oloze ove yanjila+ tuhu mujimbu wamwaza hakufwelela mungolo jaKalunga.+
9 Ikiye atulwilile, kaha atusanyikile nakusanyika chajila,+ keshi mwomwo yamilimo yetuko, oloze mwomwo yakujina chenyi nalikoji lyenyi lyalinene.+ Eli likoji vatuhanyinelyo kushikulu muli Kulishitu Yesu,
10 oloze jino vanalisolola lyehi hatoma hakusoloka chaMulwilo wetu Kulishitu Yesu+ uze nafumisako kufwa,+ kaha natusolwela hatoma mwakupwila nakuyoya+ chakuhona kupola+ kuhichila mumujimbu wamwaza,+
11 uze vangutongwelele ami kupwa ngumuka-kwambulula, ngukaposetolo, kaha nawa ngumuka-kunangula.+
12 Shikaho nguli nakuyanda navyuma kanevi,+ oloze kangwevwile sonyiko.+ Mwomwo ngunatachikiza Ou ngunetavila, kaha ngunafwelela ngwami mwalamanga chuma chize ngwamuhanyine palanga nakulikumbi lize.+
13 Kavangizanga lika mwaya mazu amwenemwene*+ aze wevwile kuli ami mulufwelelo nazangi hakulikata naKulishitu Yesu.
14 Shipilitu yajila yize yatwama muli etu yikukafwe ulamenga chumechi chamwenemwene.+
15 Ove unatachikiza lyehi ngwove vatu vosena mungalila yaAja+ vananguseze, kuhakilako vene naFujelu naHelemojene.
16 Kaha Mwata avatetele vaze vakuzuvo yaOnesefwolu+ mwomwo ikiye anguhizumwinenga kakavulu, kaha kevwilile malenge ami sonyiko.
17 Oloze omu apwile muLoma angutondele chikuma, kaha anguwanyine.
18 Mwata amwitavile mangana vakamutetele kuli Yehova* halikumbi lize. Kaha ove unatachikiza kanawa milimo yosena yize azachile muEfwesu.