WaChituse 1:1-16
1 Ami Paulu, ndungo yaKalunga, kaha nawa kaposetolo kaYesu Kulishitu nge omu mwaya lufwelelo lwavaze vasakula kuli Kalunga, nachinyingi chakwoloka chakutachikiza kanawa muchano uze waya mwaya muchima wakuzachila Kalunga,
2 uze wazama halutalililo lwakuyoya chahaya myaka yosena,+ chize Kalunga ou ahona kwonga+ atushikile kushikulu.
3 Oloze halwola lwenyi ivene, alingishile mazu enyi vawatachikize kuhichila mumulimo wakwambulula uze vanguhanyine+ nge omu lwaya lushimbi lwaMulwilo wetu, Kalunga.
4 Kuli ove Chituse, ove mwanami wamwenemwene mulufwelelo luze twatwama nalwo:
Likoji lyalinene nakuunda vyakufuma kuli Kalunga Setu nakuli Kulishitu Yesu Mulwilo wetu vipwenga nayove.
5 Ngwakusezele kuKelete mangana wolole vyuma vize vyahengele nakutongola vakulwane munganda hinganda nge muze ngwakulwezele ngwami:
6 mukulwane katela kupwa* nachuma chakumuhanyina mulongako, atela kupwa lunga ambata pwevo umwe kaha, uze atwama navana vaze vapwa vaka-kwitava vaze vazeneka puho yakuhungukila muvilinga vyakuhuka, kaha nawa kavalikangako.+
7 Mwomwo hakupwa kaselwa kaKalunga, kalama atela kupwa wakuzeneka chuma chakumuhanyina mulonga, keshi muka-kutakilika mwaya muchima wenyiko,+ keshi muka-kusulakana washiko,+ keshi muka-kupendako, keshi muka-ukenyako,* keshi muka-kufwila kunganyala vyuma mulizangaminako,
8 oloze apwenga wachisambo,+ muka-kuzanga vyuma vyamwenemwene, muka-kushinganyeka mwamangana,+ wakwoloka, wakushishika,+ muka-muchima wakulikanyisa,+
9 muka-kulinjilila kumazu* aze anatela kwitavila hakuzachisa uhashi wenyi wakunangula,+ mangana ahase kukolezeza* chikuma vatu nakunangula chamwenemwene,*+ nakuhanjikila+ nawa vaka-kulingulula.
10 Mwomwo kuli vaka-kulikanga vavavulu, navaka-kuhanjika vyuma vyamokomoko, navaka-kwonga, chikumanyi vaze valama ungalami.+
11 Chinapu chakutamo kuvaholesa mwomwo vatu kanava veji kulumbulanga vatu vosena mujitanga hakunangula vyuma kavatela kunangulako mwomwo yakufwila kulinganyalisa vavene.
12 Mutu umwe hali vakiko, kapolofweto kavo, ambile ngwenyi: “Vaka-Kelete vapwa vaka-kwonga shimbu yosena, tunyama vavapi vamuchipapa, vovwa, vafwa hakulya.”
13 Ou unjiho unapu wamuchano. Mwomwo yavyuma kanevi, vahanjikilenga lika nangolo mangana vapwenga vavakangule mulufwelelo,
14 vazenekenga kuhaka michima yavo kuvishimo vyavaYuleya nakujishimbi javatu vaze veji kusezanga muchano.
15 Vyuma vyosena vyapwa vitoma kuvatu vatoma.+ Oloze kuvatu vakujiluluka, vakuhona lufwelelo kakweshi chuma numba chimwe chinatomoko, mwomwo vishinganyeka vyavo navivezu vyavo vyapwa vyakujiluluka.+
16 Veji kuhanjikanga hatoma kumeso avatu ngwavo vamutachikiza Kalunga, oloze veji kumusaulanga navilinga vyavo,+ mwomwo vanapu vakwivwisa unyengwe, vaka-kulikanga, kaha kavatamo kuzata milimo yamwenemwene yosenako.
Kwinyikila Chamwishi
^ Hela., “kachi nge kuli lunga uze keshi.”
^ Chipwe “keshi muka-kuzungako.”
^ Chipwe “kumujimbu.”
^ Chipwe “ahase kulembelela.”
^ Chipwe “chachikangule; changanyo.”
