WaChituse 2:1-15
2 Oloze ove hanjikanga lika vyuma vize vyalitombola nakunangula chamwenemwene.*+
2 Vakulwane vamalunga vapwenga vaka-kulinga vyuma nakwesekela, vapwenga vaka-kuzakama vyuma, vaka-kushinganyeka mwamangana, vavakangule mulufwelelo, namuzangi, namulukakachila.
3 Vakulwane vamapwevo nawa vatambukenga nge vatu vajila, keshi vaka-kuvangila vakwavoko, keshi vaka-kutwama muundungo wavinyo vyavivuluko, vapwenga vaka-kunangula vyuma vyamwaza,
4 mangana vakafwe* vana vamapwevo vazangenga malunga javo, vazangenga vana vavo,
5 vapwenga vaka-kushinganyeka mwamangana, vatoma, vaka-kuzata kujizuvo javo,* vamwenemwene, valiluulenga kuli malunga javo,+ mangana mazu aKalunga vahone kuwasaula kuvatu.
6 Kolezezanga lika vakweze vamalunga nawa vapwenga vaka-kushinganyeka mwamangana.+
7 Pwakonga uwakutalilaho kuvilinga vyamwaza muvyuma vyosena. Nangulanga vyuma vyamwenemwene* nakuhakako mangana,+
8 nakuhanjika mazu amwenemwene* aze navahona kuwanyina katenga,+ mangana vaze veji kutwimanyinanga nakole vapaye nakuhona kuwana chuma chachipi* chakuhanjika hali etu.+
9 Vandungo valiluulenga kuli vakaka javo muvyuma vyosena,+ vevwisenga kuwaha vakaka javo, keshi kuvalingululangako,
10 keshi kuvevanga vyumako,+ oloze vapwenga vakushishika chikuma, mangana vawahisenga kunangula chakuli Mulwilo wetu Kalunga muvyuma vyosena.+
11 Mwomwo likoji lyalinene lyaKalunga vanalisolola lyehi, kaha linanehe ulwilo kuli vatu vosena.+
12 Lyeji kutunangulanga tukane vilinga vyakuhona kumwivwa Kalunga woma, namuchima wakufwila vyuma vyahakaye,+ oloze tupwenga tuvaka-kushinganyeka mwamangana, vakwoloka, vakwechi muchima wakuzachila Kalunga mukatwamino kamyaka yino,*+
13 oku tuli nakuvandamina lutalililo lwetu lwakuneha kuwahilila+ nakuvandamina kusoloka chaupahu waKalunga wamunene, naMulwilo wetu Yesu Kulishitu,
14 ou alihanyine ivene hali etu+ mangana atusokole*+ kuupapwoki wosena nakulitomesela ivene vatu vaze vanapu luheto lwenyi lwakulipwila, vaze nawa vafwila vilinga vyamwenemwene.+
15 Hanjikanga lika vyumevi nakuvalembelela* nakuvahanjikila kweseka nangolo vakuhana.+ Kanda navakulumbilisa kuli mutu numba umweko.
Kwinyikila Chamwishi
^ Chipwe “chachikangule; changanyo.”
^ Chipwe “veulule; vanangule.”
^ Chipwe “vaka-kuzakama jizuvo javo.”
^ Chipwe pamo, “Nangulanga vyuma mujila yamwenemwene.”
^ Chipwe “amakangule; anganyo.”
^ Chipwe “chuma chaunyengwe.”
^ Tala Mukana waMazu.
^ Hela., “atupululule.”
^ Chipwe “nakuvakolezeza.”
