WaFwilemone 1:1-25
1 Ami Paulu, ami funge+ mwomwo yaKulishitu Yesu, nguli nandumbwetu Chimoteu,+ kaha nguli nakukusonekela ove Fwilemone twazanga, mukwetu mutwazachila,
2 naAfwiya, ndumbwetu wapwevo, naAlakipu,+ mukwetu liswalale, nachikungulwilo chize chili muzuvo yove:+
3 Likoji lyalinene nakuunda vyakuli Setu Kalunga, naMwata Yesu Kulishitu vipwenga nayenu.
4 Ngweji kumusakwililanga Kalunga kami shimbu yosena omu ngweji kukuvulukanga mukulomba chami,+
5 hakwivwa lufwelelo lwove nazangi yove yakuzanga Mwata Yesu navaka-kujila vosena.
6 Ngweji kulombanga ngwami lufwelelo lwove luze twatwama nalwo tuvosena lukulingise witavile vyuma vyamwaza vyosena twatwama navyo muli Kulishitu.
7 Hakwivwa zangi yove, ngwevwile kuwaha chikuma nakunguvendejeka mwomwo ove ndumbwami unahizumuna michima yavaka-kujila.
8 Shikaho, numba tuhu nguli nakuhanjika nakukasunuka chikuma kutalisa kuli Kulishitu nakuhasa kukulweza vyuma vyakwoloka watela kulinga,
9 oloze nangukulembelela mwomwo yazangi, hakuwana nge ami Paulu ngunakolo jino, kaha oholyapwa nawa ngufunge mwomwo yaKulishitu Yesu.
10 Nguli nakukulembelela hali mwanami Oneshimu+ uze ngwapwile nge nguise+ halwola ngwapwile mukamenga.*
11 Hakavanga apwile wamokomoko kuli ove, oloze oholili napu wamulemu jino kuli ove nayami.
12 Kaha nguli nakumukindulwisa cheka kuli ove, mwomwo ngwamuzanga chikuma.
13 Ngunasake ngwami kachi ngutwame nenyi kuno mangana ashise muli ove, anguzachilenga milimo omu nguli mukamenga mwomwo yamujimbu wamwaza.+
14 Oloze kangwasakile ngulinge chuma chimwe chakuhona ove kwitavilako, mangana cheshocho chuma chamwaza naungulingila chifume kumuchima wove keshi chakukushinjilako.+
15 Echi chikiko pamo afuminyine kuli ove hatando yayindende,* mangana ukamwitavile cheka nakutwama nenyi haya myaka yosena,
16 keshi nge ndungo chekako,+ oloze wakuhambakana hali ndungo, ikiye ndumbwove wazanga+ uze ngwazanga chikuma nayami, oloze kuli ove nahambakanamo mwomwo mwalikata kumujimba namuli Mwata nawa.
17 Shikaho nge wangumona ngwove ngusepa lyove,* kaha mutambule nalikoji nganomu unahase kungutambula ami.
18 Oloze kachi nge akuvulumwine mulonga chipwe atwama namukuli kuli ove, kaha kawihule kuli ami.
19 Ami Paulu nguli nakusoneka nalivoko lyami ngwami: Nangukaufweta. Kaha kangwatela kukulweza ngwami nayove nawa watwama namukuli kuli amiko, mukuli kana shina yove vene.
20 Ove ndumbwami, ijiva kungukafwako muli Mwata: Hizumuna muchima wami muli Kulishitu.
21 Ngunafwelela vene ngwami nawononoka, shikaho nguli nakukusonekela hakutachikiza ngwami naulinga kuhambakana nomu ngunakulweze.
22 Kaha nawa nguwahishilenu kwakutwama mwomwo ngunafwelela ngwami hakulomba chenu hakiko navangusuwila nakungukindulwisa kuli enu.*+
23 Epafwase,+ mukwetu funge mwomwo yakulikata naKulishitu Yesu, nakumeneka,
24 naMako nawa, naAlishitaku,+ naNdemase,+ naLuka,+ vakwetu mutwazachila vanakumeneka.
25 Likoji lyalinene lyaMwata Yesu Kulishitu lipwenga nayenu hashipilitu yenu mweji kusololanga.
Kwinyikila Chamwishi
^ Hela., “ngwapwile mumalenge.”
^ Hela., “haola yimwe.”
^ Hela., “ngwove ngumukwenu mutwazanyina.”
^ Chipwe “hakiko navangusokwela ngwizenga kuli enu.”
