WaPetulu 1 3:1-22
3 Nayenu mapwevo nawa, liluulenunga kuli malunga jenu,+ mangana chipwe nge vamwe kaveshi kwononoka kumazuko, muhase kuvakoka chakuzeneka mazu hakumona twamiso yamwaza yayenu mapwevo javo,+
2 mwomwo yakumona twamiso yenu yamwaza*+ nakalemesa kenu kakanene.
3 Kuliwahisa chenu kanda chipwa chakuwelukako, chakuvinda jikambu nakuvwala vyuma vyaulu,+ chipwe kuvwala uvwalo wamwazako,
4 oloze chipwenga chakuwahisa mutu wakusweka wamumuchima, chakuvwala uvwalo wakuhona kupola washipilitu yayivwovu yakuunda,+ yize yandando yayinene kumeso aKalunga.
5 Mwomwo omu mukiko valiwahishilenga namapwevo vajila vakunyima vaze vatalililenga kuli Kalunga, nakuliluulanga kuli malunga javo,
6 nge muze ononokele Sala kuli Apalahama nakumuvuluka ngwenyi, mwata.+ Kahenu namupwanga muvana venyi chikalu kaha nge namulinganga mwamwaza, nakuzeneka kwivwa woma.+
7 Nayenu malunga nawa, twamenunga namapwevo jenu mwaya chinyingi.* Vavumbikenunga+ nge hichitenga chakuhehela, chachivwovu, mwomwo nayenu nawa mwapwa muvaswana mumwaswanyina navo+ kuyoya vamihana hakumivwila uselewa waunene, mangana kulomba chenu vahone kuchijikinyina.
8 Ngocho muvosena shinganyekenunga mwomumwe,+ lizakamenunga navakwenu, pwenunga nazangi yakuzanga vandumbwenu, livwilenunga keke navakwenu,+ linyisenunga.+
9 Kanda namuhilwisa upi kumutu namilingi mwamupiko,+ chipwe matuka kumutu namitukanako.+ Olozenyi vakisulenunga,+ mwomwo echi chikiko vene vamisanyikilile mangana muhase kuswana kisu kana.
10 Mwomwo “weshowo mwasaka kulivwisa kuwaha kuyoya nakumona makumbi amwaza, atela kukinga lilimi lyenyi kuupi,+ nakukinga mivumbo yenyi kukuhanjika makuli.
11 Alihende kuvyuma vyavipi,+ alingenga vyuma vyamwaza.+ Atondenga kuunda, kaha achikavangizenga.+
12 Meso aYehova* eji kutalanga vaka-kwoloka, matwitwi enyi eji kwivwililanga kukulembelela chavo.+ Oloze meso aYehova* eji kutalanga nautenu vaze veji kulinganga vyuma vyavipi.”+
13 Chikupu vene, iyaze mwamilemeka kachi nge namupwa natwima yakuzata vyuma vyamwaza?+
14 Oloze nge namuyanda mwomwo yakwoloka, kaha munapu vakuwahilila.+ Kaha kanda namwivwa woma vyuma veji kwivwanga vatu womako,* chipwe kulizakaminako.+
15 Oloze lingisenu Kulishitu kupwa wajila nakumumona kupwa Mwata mumichima yenu, nakupwa vakulizanga shimbu yosena kulihakwila kumeso avosena vaze navasaka ngwavo muvalumbunwine lutalililo luze muli nalwo, oloze lingenunga ngocho namuchima wauvwovu+ nakalemesa chikuma.+
16 Pwenunga nachivezu chamwaza,+ mangana mweshomwo mwamupi vali nakumyamba, vaze vali nakumyamba mwamupi vevwenga sonyi+ hatwamiso yenu yamwaza hakupwa muvaka-kukavangiza Kulishitu.+
17 Chinawahe kuyanda mwomwo muli nakulinga mwamwaza,+ kachi nge mukiko netavisa Kalunga, kuhambakana kuyanda mwomwo muli nakulinga upi.+
18 Mwomwo naKulishitu nawa afwile kamwe kaha kunahu hajishili jetu.+ Ou mutu wakwoloka afwililile vaka-kuhenga,+ mangana amitwaminyine kuli Kalunga.+ Ikiye vamujihile kumujimba,+ oloze vamuyoyesele kushipilitu.+
19 Kaha ayile nakwambulula mazu kuli vashipilitu vatwama muufunge,+
20 vaze valikangile kunyima omu Kalunga avatalililile chikoki* mumakumbi aNowa,+ shimbu wato vapwile nakuutunga,+ muze vayowelele vatu vavandende kumeya,+ myono* 8 kaha.
21 Lumbapachiso luze lwalitombola nachuma echi luli nakumilwila nayenu nawa oholili (keshi nge kufumisa majilo amujimbako, oloze kulomba chivezu chamwaza kuli Kalunga),+ kuhichila mukusanguka chaYesu Kulishitu.
22 Ikiye ali kulivoko lyachilyo lyaKalunga,+ mwomwo ayile mwilu, kaha vangelo, navaka-mawata, navaka-ngolo vavalingishile valiluule kuli ikiye.+
Kwinyikila Chamwishi
^ Chipwe “twamiso yenu yitoma.”
^ Chipwe “tachikizenunga kanawa mapwevo jenu.”
^ Tala Chihande A5.
^ Tala Chihande A5.
^ Chipwe pamo, “kanda navamivwisa womako.”
^ Hela., “omu kutalilila chikoki chaKalunga chapwile nakuvandamina.”
^ Chipwe “vatu.”
