WaPetulu 1 5:1-14
5 Shikaho ami hakupwa ngumukwenu mukulwane, nguchinjiho kuvihuli vyaKulishitu, kaha nawa ngumuka-kwazana kuupahu uze nawiza kukasoloka,+ nangulembelela* vakulwane vali muli enu ngwami:
2 Fungenunga utanga waKalunga+ uze vamihana kulama hakupwa mutulama,* keshi nakulishinjilako, oloze nakulisuula kumeso aKalunga,+ keshi nakufwila kulinganyalisa enu vaveneko,+ oloze mukulisakila,
3 keshi kulilingisa kupwa muvakaka javava vanapu uswana waKalungako,+ oloze pwenunga muvakutalilaho kuutanga.+
4 Kahomu mwakasoloka kafunga wamunene,+ namukatambula muchama waupahu wakuhona kupiluka.+
5 Nayenu vanyike vamalunga nawa, liluulenunga kuli vakulwane jenu.+ Kaha muvosena linyisenunga kuli vakwenu, mwomwo Kalunga eji kwimanyinanga vaka-kulivwimba nakole, oloze eji kusolwelanga vaka-kulinyisa likoji lyalinene.+
6 Shikaho linyisenu mwishi yalivoko lyangolo lyaKalunga, mangana akamitohwese halwola lwatela.+
7 Mbilenu kulizakamina chenu chosena* hali ikiye,+ mwomwo amizakama.+
8 Lamenunga uhashi wenu wakushinganyeka kanawa, tonenunga.+ Muka-kole wenu Liyavolo eji kuhitangana nge ndumba wakutahwoka, nakutondatonda weshowo mwawana amulye.+
9 Oloze mwimanyinenunga,+ zamenunga mbe mulufwelelo hakutachikiza ngwenu vihuli evi muli nakumona vikiko vali nakumona navandumbwenu* vosena mukaye.+
10 Oloze omu namulinga himunayande lyehi katando kakandende, Kalunga walikoji lyalinene lyosena, uze amisanyikilile kuupahu wenyi wahaya myaka yosena,+ kuhichila mukulikata naKulishitu, mwakamanyisa kumilongesa. Mwakamizamisa mbe,+ mwakamijikijisa,+ mwakamilingisa mukemane nangolo.
11 Kuli ikiye kupwenga ngolo haya myaka yosena. Amene.
12 Ngunamisonekela mazu amandende kuhichila muli Shilivanu*+ uze ngwamona kupwa ndumbwetu wakushishika, mangana ngumikolezeze nakumilweza unjiho wamwenemwene ngwami eli likiko likoji lyalinene lyaKalunga lyamuchano. Zamenunga mbe mulikoji kana.
13 Pwevo uze ali muMbavilone, uze vasakula ngana mwayenu, namimenekako, namwanami Mako+ nawa namimeneka.
14 Limenekenu navakwenu nakulisweswenya chazangi.
Kaha enu muvosena mwalikata naKulishitu, kuunda chipwenga nayenu.
Kwinyikila Chamwishi
^ Chipwe “nangukolezeza.”
^ Chipwe “hakuulamanga kanawa.”
^ Chipwe “Mbilenu ukalu wenu wosena.”
^ Hela., “navanavakwenu.”
^ Vamuvuluka nawa ngwavo Shilase.
