WaPetulu 2 1:1-21
1 Ami Shimona Petulu, ndungo yaYesu Kulishitu kaha nawa kaposetolo kenyi, nguli nakusonekela vaze vali nalufwelelo luze lwapwa lwalulemu nge elu lwayetu kuhichila mukwoloka chaKalunga ketu naMulwilo wetu Yesu Kulishitu:
2 Likoji lyalinene nakuunda vivulenga kuli enu, kuhichila muchinyingi chakwoloka+ chakutachikiza Kalunga naMwata wetu Yesu,
3 mwomwo ngolo jaKalunga jinatuhane vyuma vyosena vyakutukafwa kukuyoya chetu nakumuchima wetu wakuzachila Kalunga kuhichila muchinyingi chakwoloka chakutachikiza Uze atusanyikile+ naupahu wenyi nakuwaha chenyi.
4 Kaha kuhichila muvyumevi mukiko natuhanyina jishiko jenyi jajilemu, jajinene chikuma,+ mangana ngwenyi hajikiko mupwenga muvakufwana nge omu apwa Kalunga,+ hakuwana nge munachinyi lyehi kupola chamukaye chize cheza mwomwo yakufwila chachipi.*
5 Shikaho zatenunga nangolo josena+ mangana kulufwelelo lwenu muhakileko kuwaha,+ kukuwaha chenu muhakileko chinyingi,+
6 kuchinyingi chenu muhakileko muchima wakulikanyisa,+ kumuchima wenu wakulikanyisa muhakileko lukakachila, kulukakachila lwenu muhakileko muchima wakuzachila Kalunga,+
7 kumuchima wenu wakuzachila Kalunga muhakileko zangi yakuzanga vandumbwenu, kaha kuzangi yenu yakuzanga vandumbwenu muhakileko zangi yakuzanga vatu vosena.+
8 Mwomwo kachi nge vyuma kanevi navipwa muli enu nakuvulilila, kaha navimilingisa muzeneke kuzeya chipwe muhone kwima mihako+ kutalisa kuchinyingi chakwoloka chakutachikiza Mwata wetu Yesu Kulishitu.
9 Mwomwo weshowo azeneka kupwa navyuma kanevi, napu kapuputa, nakane kumona musana,+ kaha navulyama kumutomesa chize vamutomesa kujishili+ jenyi jakunyima.
10 Shikaho enu vandumbwami, zatenu chikuma nangolo mangana kumisanyika chize vamisanyika+ nakumisakula chize vamisakula vizame mbe muli enu, mwomwo kachi nge namulinganga vyumevi, kaha chikupu vene kamweshi kwiza kukalimbukako.+
11 Ngocho navakamitavisa kwingila muWangana wahaya myaka yosena+ waMwata wetu, uze nawa apwa Mulwilo wetu Yesu Kulishitu.+
12 Shikaho ngweji kushinganyekanga kumyanukisa vyuma evi shimbu yosena, numba tuhu mwavitachikiza lyehi kaha nawa mwazama lyehi mbe mumuchano ou muli nawo.
13 Kaha shimbu nguchili mutavanaku* yino,+ ngunachimono kupwa chakwoloka kumyanukisa vyumevi,+
14 mwomwo ngunatachikiza ngwami tavanaku yami kalinwomu vayifumiseko nge muze angulwezele kanawa Mwata wetu Yesu Kulishitu.+
15 Nanguzatanga nangolo shimbu yosena mangana omu nangulinga ngunayi lyehi, enu muhase kwanukanga* vyumevi.
16 Mwomwo ngolo jaMwata wetu Yesu Kulishitu, nakupwako chenyi katwavijimbwile kuli enu navihande vyamakuli vyakutaka mukulungulukako, oloze twapwile tuvinjiho vaze vamwene ukelenga wenyi.+
17 Mwomwo atambwile ulemu naupahu kuli Ise Kalunga omu vamulwezele mazu awa* akufuma kuupahu waukelenga ngwavo: “Ou ikiye Mwanami, ou ngwazanga, ou ngwevwila kuwaha.”+
18 Mazu awa akufuma mwilu twawevwile omu twapwile nenyi hapili yajila.
19 Ngocho tuli namazu aupolofweto akuzama mbe, kaha muli nakulinga kanawa hakuhakako michima yenu nge kulinongo+ lyakumunyika muma mwamilima (palanga nomu nakucha, nomu mwatutuka litota)+ mumichima yenu.
20 Enu munatachikiza chatete ngwenu, kakweshi upolofweto umwe wamuVisoneka valilumbunwina vatu vaveneko.
21 Mwomwo kumyaka yosena kakwapwile upolofweto wejile mukusaka chamutuko,+ oloze vatu vahanjikile vyakuli Kalunga omu vavatwaminyinyine nashipilitu yajila.+
Kwinyikila Chamwishi
^ Chipwe “mwomwo yapeha yayipi.”
^ Chipwe “mumbalaka,” kulumbununa mujimba wenyi wahamavu.
^ Chipwe “muhase kuvulukanga.”
^ Hela., “lizu eli.”
