WaPetulu 2 2:1-22
2 Oloze muli vatu vaze mwalovokele nawa vapolofweto vamakuli nge omu namuli enu nawa namukapwa vaka-kunangula vamakuli.+ Vatu kana navakaneha mauka akuhanduka akumyenyeka, kaha navakamukana nauze vene avalanjile,+ nakulikokela washi kunonga.
2 Kaha nawa vavavulu navakakavangizanga milimo yavilinga vyavo vyakuzunguma,*+ kaha mwomwo yavakiko, jila yamuchano navakayisaulanga.+
3 Kaha hakupwa nachipululu navakamilyapula namazu avo amakuli. Oloze kusopesa chavo chize vavavulukilile kushikulu+ kacheshi kushimbulako, kaha kunonga chavo nachiza vene.+
4 Kalunga azangamishile vangelo vaze valingile shili+ hakuvambila muTataluse,*+ nakuvakasa malenge* amilima vavalame mangana vakavasopese.+
5 Azangamishile kaye kakushikulu,+ oloze alamine Nowa, muka-kwambulula kwoloka+ navakwavo 7+ omu anehele livaji hakaye kavaka-kuzamukila Kalunga.+
6 Kaha avapayishile hakwocha jinganda jaSotome naNgomola josena,+ nakupwa chakutalilaho kuli vaka-kuzamukila Kalunga havyuma navikeza kulutwe.+
7 Ayowele Lote mutu wakwoloka+ uze ayanjiwile chikuma navilinga vyakuzunguma* vyavatu vaupapwoki—,
8 mwomwo uze lunga wakwoloka ayanjishilenga mwono* wenyi wakwoloka hakumbi hakumbi hakumona nakwivwa vilinga vyaupapwoki omu atwaminenga muli vakiko.
9 Ngocho Yehova* atachikiza mwakuyowela vatu vaze vakwechi muchima wakumuzachila muvyeseko vyavo,+ oloze alama vaka-kuhenga akavanongese halikumbi lyakusopesa,*+
10 chikumanyi vaze veji kusakanga kupihisa mijimba yavakwavo,+ navaze veji kulumbilisanga wata.+
Vakiko hakuhamuka nakutakilikanga mwaya michima yavo, kaveshi kwivwa woma wakusaulanga vatu vaupahuko,
11 oloze vangelo numba tuhu vatwama chikuma nangolo naundume, kaveshi kuvasopesa namazu akasautuko, mwomwo yakusaka kuvumbika Yehova.*+
12 Oloze vatu kanava, vapwa nge tunyama vakuhona mangana vaze veji kulinganga vyuma chakuzeneka kushinganyeka, vaze vasemuka mangana vavakwate nakuvanongesa, kaha veji kusaulanga vyuma vize vahona kutachikiza.+ Kaha navakanonga hakukava jila yavo yize nayikavatwala kukunonga,
13 navakamona lupi nakupwa fweto yavo mwomwo yakukava jila yavo yayipi.
Veji kwivwanga kuwaha kundupukila muchiyoyelo chaviseke+ numba vene musana weye. Vanapu mapenga natutenga vaze veji kwivwilanga kuwaha kunangula chamakuli oku vali nakulya nayenu hamwe kuviwanyino.+
14 Meso avo anazale naukoji,+ kaha kaveshi kuhasa kulihenda kushiliko, veji kuzondolanga vaze vahehela.* Vali namichima yize vejilisa kwivwa chipululu. Vanapu vana vakwangula.
15 Vavahungumwisa hakuseza jila yakwoloka. Vanakavangiza jila yaMbalame+ mwanaMbeyole uze azangile fweto yamilimo yakuhenga,+
16 oloze vamuhanjikilile hakuhokola lushimbi.+ Kaha kanyama wakuhona kuhanjika wakumbata viteli, ahanjikile nalizu lyamutu nakuhonesa vyuma vyakuhingama asakile kulinga uze kapolofweto.+
17 Ava vanapu tuselwoke vakuzeneka meya, vanapu mbundu yakupekumuna nanyamanganda, kaha vakiko vavalamina milima yakwilava wi.+
18 Veji kuhanjikanga mazu akulitukwojola aufwefwelekete. Kaha hakukava kufwila chamujimba,+ namilimo yavilinga vyakuzunguma,* veji kuzondolanga vaze vanachinyi vatu vaze veji kulinganga vyuma vyakuhenga.+
19 Vali nakuvafwelelesa kutwama mukulihehwa okunyi vakiko vavene vanapu vandungo vaze navakapola.+ Mwomwo kachi nge mutu vanamufungulula kuli mukwavo, kaha napu ndungo yenyi.*+
20 Kachi nge vakiko vanaseze lyehi vilinga vyamajilo vyakaye+ hakupwa nachinyingi chakwoloka chakutachikiza Mwata, Mulwilo Yesu Kulishitu, oloze hinavandupukila cheka muvyuma kanevi nakufunguluka, kaha katwamino kavo kakukuminyina kanapihi chikuma kuhambakana kakulivanga.+
21 Kachi chawahile kuli vakiko kuhona kutachikiza jila yakwoloka, kuhambakana kuyitachikiza kaha hinavaseza lushimbi lwajila luze vatambwile.+
22 Ngocho chishimo chamuchano chinatesamo kuli vakiko chakwamba ngwavo: “Kawa mwahilukila cheka visazo vyenyi, kaha ngulu uze vakosanga nahiluka cheka nakulipochinga mumalova.”+
Kwinyikila Chamwishi
^ Chipwe “yavilinga vyavo vyakwivwisa sonyi.” MuchiHelase, a·selʹgei·a. Tala Mukana waMazu.
^ Chipwe pamo, “nakuvambila mumena.”
^ Tala Mukana waMazu.
^ Chipwe “navilinga vyakwivwisa sonyi.” MuchiHelase, a·selʹgei·a. Tala Mukana waMazu.
^ Tala Mukana waMazu.
^ Hela., “halikumbi lyakuvatetako.”
^ Tala Chihande A5.
^ Tala Chihande A5.
^ Chipwe “kuzondolanga myono yakuhehela.”
^ Chipwe “yavilinga vyakwivwisa sonyi.” MuchiHelase, a·selʹgei·a. Tala Mukana waMazu.
^ Chipwe “vanamufungulula kuchuma chimwe, kaha napu ndungo yachuma kana.”
