WaPetulu 2 3:1-18
3 Enu ngwazanga, ou ukiko jino mukanda wamuchivali nguli nakumisonekela wakusangumuna uhashi wenu wakushinganyeka kanawa kuhichila mumazu akumyanukisa,+ nge muze nawa ngwalingile mumukanda wami wakulivanga,
2 mangana mwanukenga mazu aze vahanjikile lyehi* vapolofweto vajila nalushimbi lwaMwata kaha nawa Mulwilo, luze lwejile kuhichila muli vaposetolo jenu.
3 Chatete, tachikizenu ngwenu, hamakumbi akukuminyina nahakasoloka vaka-kutoleka nakutoleka chavo, navakalinga mwaya kufwila chavo vavene+
4 nakwamba ngwavo: “Kupwako chenyi ocho vashika chili kulihize?+ Mwomwo kufuma vene haze vakakuluka jetu vasavalile tulo twakufwa, vyuma vyosena hanga vyapwila vene nge muze vinapunga kufuma kukuputuka chakutanga vyuma.”+
5 Mwomwo veji kuhombwanyisanga kaha chishina echi chakwamba nge, kushikulu kwapwile melu namavu, kaha lizu lyaKalunga lyalingishile mavu atutuke hameya namukachi kameya,+
6 kaha nawa kuhichila muwakiko, kaye kaze kapwileko hamakumbi aze vakanongesele omu kazalile nameya alivaji.+
7 Oloze kuhichila mulizu kana, melu namavu awa aliko oholili vawalama vakawanongese nakakahya nakuwalama nawa palanga nakulikumbi lyakusopesa nalyeli lyakunongesa vaka-kuzamukila Kalunga.+
8 Oloze enu ngwazanga, kanda namuvulyama chumechiko, likumbi limwe kuli Yehova* linapu nge myaka 1,000, kaha myaka 1,000 yinapu nge likumbi limwe.+
9 Yehova* keshi kulangisa kutesamo lushiko lwenyiko,+ nge omu vamona vatu vamwe ngwavo nalangisa, oloze namitalilila chikoki, mwomwo kazanga mutu numba umwe akanongeko, oloze azanga vosena vapihilile nakwalumuka.+
10 Oloze likumbi lyaYehova*+ nalikeza nge mwiji,+ kaha halikumbi kana melu nawakahita+ nalushindo, oloze vyuma vyamwilu hakwenya chikuma kakahya, navikayengunuka, kaha mavu namilimo yiliho navikasoloka hatoma.+
11 Hakuwana nge vyuma vyosenevi navikayengunuka mujila yangachize, shinganyekenu omu mwatela enu kupwa mutwamiso yenu yajila namuvilinga vyenu vyakuzachila Kalunga,
12 omu muli nakuvandamina nakwanuka* kupwako chalikumbi lyaYehova,*+ omu melu nawakanonga+ namilangi, kaha vyuma vyamwilu navikazuzuluka hakwenya chikuma kakahya.
13 Oloze kuli melu amahya namavu amahya aze tuli nakutalilila nge omu mwaya lushiko lwenyi,+ kaha namukapwanga kwoloka.+
14 Shikaho enu ngwazanga, hakuwana nge muli nakuvandamina vyuma kanevi, zatenu nangolo mangana akamiwane muvakuzeneka lipenga, muvakuzeneka katenga, kaha nawa akamiwane mukuunda.+
15 Kaha monenunga muchima wakutalilila chikoki waMwata wetu ngwenu ulwilo, nge muze Paulu ndumbwetu twazanga asonekele nawa kuli enu nge omu mwaya mangana aze vamuhanyine,+
16 nakuhanjika vyuma kanevi nge muze avisoneka mumikanda yenyi yosena. Kaha vyuma vimwe vyatwamamo vyavikalu kuvivwa, kaha evi vikiko vyuma vali nakuhingika vaze vazeneka kutachikiza vyuma* navaze vazeneka kuzama, nganomu vali nakulinga namuVisoneka vyeka vikwavo nawa, nakulinehela vavene kunonga.
17 Shikaho enu ngwazanga, enu hakutachikiza chimweza vyumevi, lilamenunga kuchina namuhungumuka navilinga vyakuhenga vyavatu vaupapwoki, nakulitwamina kuzama.+
18 Oloze zovolokenunga lika mulikoji lyalinene namuchinyingi chakutachikiza Mwata wetu, Mulwilo Yesu Kulishitu. Kuli ikiye kupwenga upahu oholili nahaya myaka yosena. Amene.
Kwinyikila Chamwishi
^ Chipwe “mazu aze vapolofwetele.”
^ Tala Chihande A5.
^ Tala Chihande A5.
^ Tala Chihande A5.
^ Chipwe “nakufwila kumona.” Hela., “nakwanguhwisa.”
^ Tala Chihande A5.
^ Chipwe “vaze vazeneka kulinangula.”
