WavaHepeleu 11:1-40
11 Lufwelelo lwapwa kuvandamina namuchima wakukunyuka vyuma vize twatalilila,+ hiunjiho wakusolola hatoma* vyuma vivene vize katwamweneko.
2 Mwomwo yalufwelelo kanelu, vatu vakushikulu* vapwile naunjiho wakuvevwila kuwaha.
3 Mwomwo yalufwelelo, tunatachikiza ngwetu tutwamino twamyaka* vatuhakileko namazu aKalunga, ngocho evi tunamono vinafumu kuvyuma vize vyazeneka kusoloka hatoma.
4 Mwomwo yalufwelelo, Avele ahanyine Kalunga wana waulemu wachimuna wakuvatula kuhambakana waKena,+ kaha hakupwa nalufwelelo kana, vamuvulukile ngwavo wakwoloka, mwomwo Kalunga etavilile* mawana enyi,+ kaha numba tuhu afwa lyehi, oloze achili nakuhanjika+ kuhichila mulufwelelo lwenyi.
5 Mwomwo yalufwelelo, Enoke+ vamunungulwile mangana azeneke kumona kufwa, kaha kavamuwanyine chekako, mwomwo Kalunga amunungulwile.+ Shimbu kanda vamunungulule, atambwile unjiho ngwavo evwishile Kalunga kuwaha.
6 Kaha nawa chakuzeneka lufwelelo, chachikalu kumwivwisa Kalunga kuwaha, mwomwo weshowo mwapandama kuli Kalunga, atela kwitavila ngwenyi kwatwama, kaha nawa ngwenyi ikiye apwa muka-kufweta vaze vali nakumutondatonda chikuma.+
7 Mwomwo yalufwelelo, omu Nowa+ alingile hanatambula lyehi mazu akumuhuhumuna kuli Kalunga havyuma vyapwile kanda vachivimone,+ evwile Kalunga woma, kaha asongele wato+ mangana alwile vaze vakuzuvo yenyi. Hakupwa nalufwelelo kana, apayishile kaye,+ kaha apwile swana wakuswana kwoloka mwomwo yalufwelelo.
8 Mwomwo yalufwelelo, omu Apalahama vamusanyikile,+ ononokele nakuya kuchihela chize mwakatambula kupwa uswana wenyi. Akatukile nakuya numba tuhu katachikijile okwo apwile nakuyako.+
9 Mwomwo yalufwelelo, azuzumanyine nge mwiza mulifuchi vamushikile, kwijiva nge mulifuchi lyeka,+ kaha atwaminenga mujimbalaka+ naIsaka naYakova hamwe, vaze vapwile vaswana naikiye hamwe vakuswana vyuma vyovimwe vize vashikile.+
10 Mwomwo apwile nakuvandamina nganda yize yapwile navihela vyazuvo vyamwenemwene, yize vatakile nakutunga kuli Kalunga ivene.+
11 Mwomwo yalufwelelo nawa, Sala vamuhanyine ngolo jakusema mwana,* numba tuhu azombokele haseteko yakusema,+ mwomwo amwene Uze amushikile ngwenyi wakushishika.
12 Kaha nawa kulunga umwe uze apwile nge afwa lyehi,+ kwasemukile vana+ vavavulu nge vatanganyika vamwilu, nge usekeseke wakungenge yakalungalwiji ou vahona kulava.+
13 Vosena ava vafwile nalufwelelo lwavo numba tuhu kavatambwile vyuma vize vavashikileko,+ oloze vavimwene omu vyapwile kwakusuku,+ kaha vavitambwile nakuwahilila nakuhanjika hatoma kumeso avatu ngwavo vapwile vangeji, vaka-kuzuzumana mulifuchi.
14 Mwomwo vaze veji kuhanjikanga ngocho, veji kusololanga ngwavo vali nakutondatonda chikuma chihela chakutwama.
15 Kachi nge vapwile nakwanukanga chihela chize vasezele,+ kachi vakindulukile cheka.
16 Oloze jino vali nakusaka chihela chakuhambakana kuwaha, chihela chamwilu. Ngocho Kalunga keshi kuvevwila sonyiko hakumuvuluka ngwavo, Kalunga kavo,+ mwomwo navalongesela lyehi nganda.+
17 Mwomwo yalufwelelo, omu vamwesekele Apalahama,+ lunga uze atambwile jishiko nakuwahilila, asakile kulumba mwanenyi umwe kaha wakulipwila,+ kaha chapwile vene nge nalumbu lyehi Isaka,
18 numba tuhu vamulwezele ngwavo: “Vaze navakavuluka ngwavo ‘vaka-tanga* yove’ navakafuma muli Isaka.”+
19 Oloze amwene ngwenyi Kalunga nahase kumusangula kuvafu, kaha kukiko vene amutambwile mujila yachifwanyisa.+
20 Mwomwo yalufwelelo, Isaka nawa akiswile Yakova+ naEsau+ kutalisa kuvyuma vyapwile nakwiza kulutwe.
21 Mwomwo yalufwelelo, omu Yakova apwile kwakamwihi nakufwa,+ akiswile vana vaYosefwe+ umwe naumwe, kaha alemesele Kalunga oku nalijikilila hamukombo wenyi.+
22 Mwomwo yalufwelelo, omu Yosefwe apwile kwakamwihi nakufwa, avulukile vyakulovoka chavana vaIsalele, kaha ahanyine jindongi* kutalisa kuvifuwa vyenyi.*+
23 Mwomwo yalufwelelo, Mose omu asemukile vamuswekele kuli visemi jenyi hatukweji vatatu,+ mwomwo ou mwana vamumwene ngwavo wamwaza,+ kaha kavevwile woma lushimbi lwamwanganako.+
24 Mwomwo yalufwelelo, omu alingile Mose nakolo lyehi,+ akanyine kumuvulukanga ngwavo mwana wamwanaFwalo wapwevo,+
25 asakwileho kumuyanjishila hamwe navatu jaKalunga, mukutela kulivwisa kuwaha viseke vyashili hatando yayindende,
26 mwomwo amwene kutoleka chakutoleka Kulishitu ngwenyi hiluheto kuhambakana vikumba vyamuEjipitu, mwomwo ikiye ashishikile chikuma hafweto yize mwakatambula.
27 Mwomwo yalufwelelo, afumine muEjipitu,+ kevwile woma utenu wamwanganako,+ mwomwo azaminenga lika mbe kwijiva nge ali nakumona Uze vahona kumona.+
28 Mwomwo yalufwelelo, alingile Paseka nakusapula manyinga, mangana muka-kunongesa ahone kwenyeka* vana vavo vavatwatwa.+
29 Mwomwo yalufwelelo, vahichile muKalungalwiji Uchila kwijiva nge hatunda yaumu,+ oloze vaEjipitu omu vesekele ngwavo vahiteho vavaminyine kumeya.+
30 Mwomwo yalufwelelo, kembwe yaYeliko yapuzukile omu vatu valingile hivanayijinguluka lyehi makumbi 7.+
31 Mwomwo yalufwelelo, Lahave pwevo muka-ujila kanongelele kumwe navaze valikangileko, mwomwo ikiye atambwile vandoji mujila yamwaza.+
32 Vyuma vyeka muka nawa nanguhanjika? Mwomwo lwola nalungukehela kachi nge nanguvuluka vyaNgiteyone+ naMbalake+ naSamasone+ naYefweta+ naNdavichi+ naSamwele+ navapolofweto veka.
33 Halufwelelo lwavo vafungulwile mawangana,+ vanehele kwoloka, vatambwile jishiko,+ vasokele kutunwa twavandumba,+
34 vahonesele ngolo jakakahya,+ vapulukile kuuvela wajipoko jamikwale,+ vavazamikishile kukuhehela chavo,+ vapwile vakuhamuka mujita,+ vafungulwile maswalale vaze vavalukukile.+
35 Mapwevo vatambwile cheka vafu javo vaze vasangwile kuvafu,+ oloze malunga veka vayanjile, mwomwo kavetavilile kuvasokola nandando yakusokolako mangana vakamone kusanguka chamwenemwene.
36 Kaha veka vahichile muvyeseko hakuvahulamisa nahakuvalipula vikote, chikumanyi hakuvakasa mumalenge+ namutumenga.+
37 Vavashile malolwa,+ vavesekele, vavavatwile muvihanda vivali najisaha, vavajihile najipoko jamikwale,+ vakimbangilenga oku vanavwale malambu amikoko, namalambu avapembe,+ omu vapwile mukukalikiza, namuluyando,+ vavayanjishile,+
38 kaha kaye kakavateleleleko. Valumbwangililenga mujipambo nakujipili namumena akusendeveka+ namena eka.
39 Kaha vosena ava numba tuhu vatambwile unjiho ngwavo vevwishile Kalunga kuwaha mwomwo yalufwelelo lwavo, oloze kavatambwile vyuma vavashikileko,
40 mwomwo Kalunga amwene chimweza vyuma vyamwenemwene vize natukatambula,+ mangana vakiko vahone kuvalingisa vakupuke mwosena chakuzeneka etu.
Kwinyikila Chamwishi
^ Chipwe “hiunjiho wakutamo.”
^ Chipwe “vakakuluka jetu.”
^ Tala Mukana waMazu.
^ Chipwe “Kalunga amuvulukilile unjiho hakwitavila.”
^ Hela., “mbuto.”
^ Hela., “mbuto.”
^ Chipwe “lushimbi.”
^ Chipwe “kutalisa kukumufunda.”
^ Hela., “ahone kukwata.”
