WavaHepeleu 3:1-19
3 Ngocho enu vandumbwetu vajila, enu muli nachazano kukusanyika chamwilu,*+ shinganyekenu kanawa hali kaposetolo, kapilishitu wakulitulaho uze twetavila, Yesu.+
2 Apwilenga wakushishika kuli Uze amutongwele+ nganomu apwilenga Mose nawa muzuvo yayaUze yosena.+
3 Mwomwo Yesu vamumona ngwavo atela upahu waunene+ kuhambakana Mose, mwomwo muka-kutunga zuvo vamuvumbika chikuma kuhambakana zuvo ivene.
4 Mwomwo zuvo hizuvo vayitunga kuli mutu, oloze uze atengele vyuma vyosena ikiye Kalunga.
5 Kaha Mose, hakupwa muka-kuzata, apwilenga wakushishika muzuvo yayaUze yosena, kaha echi chahanyine unjiho wavyuma vize navakahanjika kulutwe,
6 oloze Kulishitu apwilenga wakushishika hakupwa mwana+ wakutala zuvo yaKalunga. Etu natupwanga zuvo yaKalunga,+ kachi nge natulinjilila kukuhanjika chetu chakuhanjika nakukasunuka mbwe nakusongo nakulutalililo luze tweji kulisashilanga.
7 Shikaho shipilitu yajila yahanjikila ngwayo,+ “Kachi nge likumbi lyalelo namwivwilila kulizu lyenyi,
8 kanda namukaluhwisa michima yenuko nge muze chapwile halikumbi lyakungweseka mupambo omu vangwivwishile chikuma matoto,+
9 omu vangwesekele vakakuluka jenu, numba tuhu vamwenenga milimo yami hamyaka 40.+
10 Shikaho ngwevwilile kupihya chisemunwino chino nakwamba ngwami: ‘Veji kuhungumukanga shimbu yosena mumichima yavo, kaha kavatachikijile jijila jamiko.’
11 Ngocho ngwapihililile nakulishinga ngwami: ‘Kaveshi kukengila mukunoka chamiko.’”+
12 Zangamenu enu vandumbwami, kuchina umwe hali enu mwasosoloka kuli Kalunga ou ayoya nakupwa namuchima wakuhuka wakuzeneka lufwelelo.+
13 Oloze likolezezenunga lika navakwenu hakumbi hakumbi, chikalu kuvanavuluka ngwavo, “Likumbi lyalelo,”+ kuchina umwe hali enu mwakakama muchima mwomwo yashili yize yatwama nangolo jakutangisa.
14 Mwomwo chikupu vene natupwa tuvaka-kwazana hamwe naKulishitu, kachi nge lufwelelo luze twapwilenga nalwo kukuputuka natululama mbwe nakusongo.+
15 Mwomwo vamba ngwavo, “Kachi nge likumbi lyalelo namwivwilila kulizu lyenyi, kanda namukaluhwisa michima yenuko nge muze chapwile halikumbi lize vamwivwishile chikuma matoto.”+
16 Mwomwo veya vaze vevwile, oloze hinavamwivwisa chikuma matoto? Kumana keshi vosena vaze valovokele muEjipitu hakuvatwaminyina kuli Moseko nyi?+
17 Kaha nawa veya vaze Kalunga evwililenga kupihya hamyaka 40 ?+ Kumana keshi vaze valingile shili, vaze vakwechi mijimba yavo yalindwomwokele mupamboko nyi?+
18 Uno kuli veya alishingile ngwenyi kaveshi kukengila mukunoka chenyiko? Kumana keshi kuli vaze kaha valikangileko nyi?
19 Ngocho tunamono ngwetu kavahashile kwingilamoko mwomwo yakuhona kupwa nalufwelelo.+
Kwinyikila Chamwishi
^ Chipwe “nachazano chakumilanya mwilu.”