WavaHepeleu 4:1-16
4 Shikaho, hakuwana nge lushiko lwakwingila mukunoka chenyi kuluchili lika, tuzangamenu* kuchina mutu umwe hali enu mwakalihonaho.+
2 Mwomwo nayetu nawa vanatwambulila mujimbu wamwaza+ ngana mwavakiko. Oloze mazu aze vevwile kawavanganyalishileko, mwomwo kavapwile nalufwelelo lwolumwe ngana lwavaze vevwililileko.
3 Mwomwo etu tunasolola lyehi lufwelelo, twengila mukunoka kana nge muze ahanjika ngwenyi: “Ngwapihililile nakulishinga ngwami, ‘Kaveshi kukengila mukunoka chamiko,’”+ numba tuhu milimo yenyi yakumine kufuma kukwala chihela chakaye.+
4 Mwomwo hachisoneka chimwe navulukaho likumbi lyakusokesa 7 ngwenyi: “Kalunga anokele kumilimo yenyi yosena halikumbi lyakusokesa 7,”+
5 kaha hano nambe cheka nawa ngwenyi: “Kaveshi kukengila mukunoka chamiko.”+
6 Shikaho hakuwana nge vamwe kanda vachingilemo, kaha vaze nawa valivangile kwambulila mujimbu wamwaza kavengililemoko mwomwo yakulikanga chavo,+
7 ngocho himwasakula cheka likumbi lyeka omu hahichile shimbu yayisuku, lize avulukile musamu yaNdavichi ngwenyi, “Likumbi lyalelo,” nganomu unahanjika lyehi uno mukanda ngwawo: “Kachi nge likumbi lyalelo namwivwilila kulizu lyenyi, kanda namukaluhwisa michima yenuko.”+
8 Mwomwo kachi nge Yoshuwa+ avengishile muchihela chakunokela, kachi Kalunga kavulukile cheka vyalikumbi lyeka halwola lwekako.
9 Ngocho kunoka chasambata chavatu jaKalunga kuchichili lika.+
10 Mwomwo mutu uze nengila lyehi mukunoka chaKalunga, nanoko lyehi nakumilimo yenyi nawa, nganomu anokele Kalunga kumilimo yenyi.+
11 Shikaho tuzatenu nangolo mangana twingile mukunoka kana, kuchina nakupwa mutu mwalikanga nge muze valikangile vakiko.+
12 Mwomwo mazu aKalunga apwa amatonyi, kaha atwama nangolo,+ avambuka kuhambakana poko yamukwale yauvela kuvali,+ kaha eji kutuvasananga nakuhandununa mwono* nashipilitu,* namanungililo nausongosongo, kaha anahase kumona omu vinayi vishinganyeka nakujina chamumuchima.
13 Kaha kakweshi chuma chakutenga chimwe chaswama kumeso enyiko,+ oloze vyuma vyosena vyapwa vyauselesele, vili hatoma kumeso ayou natukalyambulula etu vavene.+
14 Shikaho, hakuwana nge tuli nakapilishitu wakulitulaho wamunene ou napulasana lyehi mumelu, Yesu mwanaKalunga,+ ngocho tuhanjikenunga hatoma vyaikiye.+
15 Mwomwo etu katweshi nakapilishitu wakulitulaho wakuhona kutwivwila keke mukuhehela chetuko,+ oloze tuli nauze veseka lyehi mwosena ngana mwayetu, oloze wakuhona shili.+
16 Shikaho tupandamenunga kulitanda lyaKalunga lyalikoji lyalinene nakuhanjikanga nakukasunuka,+ mangana vatutetele nakutusolwela likoji lyalinene lyakutukafwa halwola lwakutamo.
