WavaHepeleu 7:1-28
7 Mwomwo ou Mekizeteke, mwangana waSalema, kapilishitu kaKalunga Wakulitulaho Chikuma, asesele Apalahama omu Apalahama apwile nakukinduluka kuze ayile nakujiha vamyangana, kaha amukiswile,+
2 kaha Apalahama amuhanyine vyakusokesa mulikumi kuvyuma vyosena. Chatete, lijina lyenyi lyalumbununa ngwavo, “Mwangana Wakwoloka,” kaha ikiye cheka mwangana waSalema, kulumbununa ngwavo, “Mwangana Wakuunda.”
3 Ikiye keshi naiseko, keshi nanayeko, keshi nachisaka afumako, keshi nahaze haputukilile makumbi enyiko, chipwe haze hakumina kuyoya chenyiko, oloze hakumufwanyisa nge MwanaKalunga, apwa kapilishitu haya myaka yosena.+
4 Talenu ulemu apwile nawo mutu kana, uze Apalahama, mutwe watanga,* ahanyine vyakusokesa mulikumi kuvyuma vyamwaza vize apukwile kujita.+
5 Kaha kweseka nomu mwaya Jishimbi, vaze vanapu vana vaLevi+ vaze veji kutambulanga upilishitu, vatwama nalushimbi lwakutambulanga vyakusokesa mumakumi kuli vakwavo vatu,+ kuli vandumbwavo, numba tuhu ava hivana vaApalahama.*
6 Oloze mutu uze azeneka kufuma kuchisaka chavo, atambwile vyakusokesa mumakumi kuli Apalahama, nakukisula ou vashikile jishiko.+
7 Kaha chamuchano vene ou wamundende veji kumukisulanga kuli ou wamunene.
8 Kusali yimwe malunga vaze vali nakuya nakufwa, vakiko veji kutambulanga vyakusokesa mumakumi, oloze kusali yikwavo shina ou vanavulukila unjiho ngwavo mwayoyanga.+
9 Tunahase vene kwamba ngwetu naLevi uze eji kutambulanga vyakusokesa mumakumi, nahane vyakusokesa mumakumi kuhichila muli Apalahama,
10 mwomwo ikiye achipwile muka-tanga yakakuluka yenyi uze mwakeza kulutwe omu vamusesele kuli Mekizeteke.+
11 Jino kachi nge kukupuka mwosena chejile kuhichila muupilishitu wavaLevi,+ (mwomwo naukiko wapwile hichuma chize chapwile muJishimbi jize vahanyine kuvatu), kaha nakusakiwila ika kukatula kapilishitu weka wakufwana nge Mekizeteke,+ keshi ou wakufwana nge Aloneko?
12 Hakuwana nge upilishitu vali nakuwalumuna, naJishimbi nawa vatela kujalumuna.+
13 Mwomwo mutu uze vanavulukila vyumevi afumine kumuyachi weka, kuze kakwatwama mutu azachilaho lyehi kulijiko lyakulumbilako.+
14 Mwomwo tunejiva jino ngwetu Mwata wetu afuma kumuyachi waYuta,+ oloze Mose kavulukile ngwenyi kumuyachi uze nakukafuma vapilishituko.
15 Kaha natwijiva kanawa omu mweza kapilishitu+ weka wakufwana nge Mekizeteke,+
16 uze napu ngocho, keshi nalushimbi luze lwapendamina hachisemwa chavatuko, oloze nangolo jakuyoya jize navahona kunongesa.+
17 Mwomwo vanamuvulukila unjiho ngwavo: “Ove ukapilishitu haya myaka yosena wakufwana nge Mekizeteke.”+
18 Ngocho lushimbi lwakulivanga vanalufumisako mwomwo lunahehela, kaha nawa kalweshi nangolo jakuzata kanawako.+
19 Mwomwo Jishimbi kajalingishile chuma numba chimwe chikupukeko,+ oloze lutalililo lwamwenemwene+ luze vajimbwile lukiko lwalingishile vyuma vyosena vikupuke, kaha luli nakutupandamisa kuli Kalunga.+
20 Jino hakuwana nge kalwapwile lwakuzeneka kulishinga lushingoko,
21 (mwomwo kuvali vaze vanapu vapilishitu chakuzeneka kulishinga lushingo, oloze ounyi napu ngocho halushingo alishingile Uze avulukile vyaikiye ngwenyi: “Yehova* nalishingi, kaha keshi kukalumuna vishinganyeka vyenyiko,* nalishingi ngwenyi: ‘Ove ukapilishitu haya myaka yosena’”),+
22 ngocho naYesu vanamulingisa kupwa chijikilo chalushiko+ lwakuhambakana kuwaha.
23 Kaha nawa, vavavulu vapwilenga vapilishitu vakulishisashisa+ mwomwo kufwa chavahoneselenga kutwalililaho,
24 oloze ikiye hakutwalaho lika nakuyoya haya myaka yosena,+ shikaho upilishitu wenyi kaweshi navaka-kuuswanako.
25 Ngocho nahase nawa kulwila kanawa vaze vali nakupandama kuli Kalunga kuhichila muli ikiye, mwomwo ayoya lika shimbu yosena mangana avalembelelengako.+
26 Mwomwo chakutamo etu kupwa nakapilishitu wakulitulaho wangocho, wakushishika, wakuzeneka kutachikiza upi, wakuzeneka majilo,+ wakuhandunuka kuli vaka-shili, kaha wakuzezuka helu lyamelu.+
27 Ikiye kasakiwa kuhananga vimuna vakuvatula hakumbi hakumbiko,+ chakulivanga hajishili jenyi ivene, kaha kufumaho javatu veka,+ nge muze valingilenga vapilishitu vakulitulahoko, mwomwo echi achilingile kamwe kaha kunahu omu alihanyine ivene.+
28 Mwomwo Jishimbi jeji kutongolanga vatu vakuhehela kupwa vapilishitu vakulitulaho,+ oloze mazu akulishinga nalushingo+ aze ejile hanyima yaJishimbi, atongola mwana ou vakupwisa lyehi+ haya myaka yosena.
Kwinyikila Chamwishi
^ Chipwe “kakuluka.”
^ Hela., “hivana vakufuma kumitanda yaApalahama.”
^ Tala Chihande A5.
^ Chipwe “keshi kukaliveyako.”
