WavaHepeleu 8:1-13
8 Chishina chachilemu chavyumevi tuli nakushimutwila shina echi: Tuli nakapilishitu wakulitulaho wangocho+ uze natwame kuchilyo chalitanda lyaUze waUkelenga mumelu,+
2 muka-kuzata* muchihela chajila+ namumbalaka yamuchano yize emikile Yehova,* keshi mutuko.
3 Mwomwo kapilishitu wakulitulaho veji kumutongolanga mangana ahanenga mawana navimuna vakuvatula. Ngocho chatelemo kuli ou nawa kupwa nachuma chimwe chakuhana.+
4 Kachi nge apwanga hano hamavu kachi kapwile kapilishituko,+ mwomwo kuli lyehi malunga vaze veji kuhananga mawana nganomu jaya Jishimbi.
5 Malunga kana ava vali nakuzata mulimo wajila uze wapwa chifwanyisa, muvwimbimbi+ wavyuma vyamwilu,+ nge muze Mose vamuhanyine lushimbi kuli Kalunga omu asakile kutunga mbalaka. Mwomwo Kalunga ambile ngwenyi: “Nyingilila kanawa ukatunge vyuma vyosenevi nge kutesa nomu ngunakulwekesavyo kupili.”+
6 Oloze jino Yesu natambula lyehi mulimo wamwaza chikuma,* mwomwo napu muka-kuwanyisa+ lushiko lwamwenemwene,+ luze vanazamisa najishimbi jajishiko jamwenemwene.+
7 Kachi nge luze lushiko lwatete kalwapwile nakatengako, kachi kachasakiwile kuneha lwamuchivaliko.+
8 Mwomwo ikiye nawanyina vatu katenga hakwamba ngwenyi: “Yehova* nambe ngwenyi, ‘Talenu! Makumbi ali nakwiza omu nangukalishika lushiko lwaluhya navaze vakuzuvo yaIsalele navaze vakuzuvo yaYuta.
9 Lushiko kana kalweshi kukalifwana nalushiko luze ngwalishikile navakakuluka javo halikumbi lize ngwavakwachile kumavoko avo nakuvalovola mulifuchi lyaEjipituko,+ mwomwo kavalaminenga lushiko lwamiko, ngocho ngwalitwaminyine kuvazakama.’ Omu mukiko mwanambe Yehova.”*
10 “Yehova* nambe ngwenyi, ‘Elu lukiko lushiko nangukalishika navaze vakuzuvo yaIsalele omu nawakakuma makumbi aze: Nangukahaka jishimbi jami muvishinganyeka vyavo, kaha nangukajisoneka mumichima yavo.+ Nangukapwanga nguKalunga kavo, kaha vakiko navakapwanga vatu jami.+
11 “‘Kakweshi mutu mwakanangula cheka mukwavo muvatungila chipwe ndumbwenyiko ngwenyi: “Mutachikize Yehova.”* Mwomwo vatu vosena navakangutachikiza, vatu vamokomoko navava vavalemu.
12 Nangukavatetela havilinga vyavo vyakuhenga, kaha kangweshi kukanuka cheka jishili javoko.’”+
13 Hakwamba ngwenyi “lushiko lwaluhya,” nasolola nge luze lwakulivanga nalulingisa lyehi kupwa lwamokomoko.+ Jino chuma chize chinapu chamokomoko chili nakuya nakuzeya, chili kwakamwihi nakulelangana.+
Kwinyikila Chamwishi
^ Chipwe “muka-kuzachila vatu.”
^ Tala Chihande A5.
^ Chipwe “mulimo wakuzachila vatu.”
^ Tala Chihande A5.
^ Tala Chihande A5.
^ Tala Chihande A5.
^ Tala Chihande A5.