WavaHepeleu 9:1-28
9 Lushiko luze lwamwaka lwapwilenga najishimbi jamwakuzachila mulimo wajila, nachihela chacho chajila+ chahano hamavu.
2 Mwomwo vatungile kapete katete kambalaka muze mwapwilenga chitumbikilo chamanongo,+ namesa, najimbolo jakutumbika kumeso aKalunga,*+ kaha vakavulukilenga ngwavo, Chihela Chajila.+
3 Kaha kusali yalihina lyakuvatasana lyamuchivali+ kwapwile kapete kamumbalaka vavulukilenga ngwavo, Chihela Chajila Chikuma.+
4 Omu mukiko mwapwilenga chiloso chaulu,+ nachikasha chalushiko+ chakushila ulu chosena,+ muze mwapwilenga mulondo waulu uze wapwilenga namana,+ nambwechi yaAlone yize yachivikilile,+ navihanda vyamalolwa+ alushiko.
5 Helu lyacho hapwilenga vakeluve vaupahu vakutanduula mavava avo hachifwiko chakufwika hashili.*+ Oloze luno kalweshi lwola lwakuhanjika vyumevi munona munonako.
6 Jino omu valongesele vyuma kana mujila kaneyi, vapilishitu vapwile nakwingilanga mukapete katete kambalaka shimbu yosena nakuzata milimo yajila.+
7 Oloze kapilishitu wakulitulaho engililenga uka wenyi mukapete kamuchivali kamwe hamwaka,+ kaha ambachilenga manyinga+ aze ahanyinenga hali ivene+ nahajishili javatu+ jize valingilenga chakuhona kutachikiza.
8 Ngocho shipilitu yajila yasolwele hatoma nge jila yakwingila muchihela chajila yapwile kanda yisoloke hatoma shimbu yalingile mbalaka yakulivanga kuyichili.+
9 Eyi mbalaka yinapu chifwanyisa chavyuma viliko halwola luno,+ kaha mukulongesa kanechi, mawana navimuna vakuvatula vachili lika nakuvihana.+ Kaha evi kavyeshi kuhasa kukupwisa chivezu chamutu uze ali nakuzata mulimo wajilako.+
10 Oloze vyapandama kaha kuvyakulya nakuvyakunwa nakukusana* cheka nacheka kweseka nomu mwaya jishimbi.+ Kaha vyuma kana vyasakiwilenga mujishimbi kutalisa kumujimba,+ kaha vavahanyinevyo vavilingenga palanga nakulwola vatongola lwakwolola vyuma.
11 Oloze omu ejile Kulishitu kupwa kapilishitu wakulitulaho wavyuma vyamwaza vize vinalingiwa lyehi, engilile mumbalaka yayilemu yakukupuka chikuma yize kavatunga namavokoko, chipwe ngwetu yize kayeshi yakutenga hano hamavuko.
12 Engilile muze muchihela, keshi namanyinga avapembe nawawa avana vavangombeko, oloze namanyinga enyi ivene+ kamwe kaha kunahu nakutuyovola* haya myaka yosena.+
13 Mwomwo kachi nge manyinga avapembe nawawa avangombe vavakuji+ nauto wangombe wachihwevo* vize vanasapwila hali vaze vali namajilo, navivalingisa kupwa vajila nakuvatomesa kumujimba,+
14 kutala manyinga aKulishitu+ uze alihanyine kuli Kalunga chakuzeneka katenga kuhichila mushipilitu yahaya myaka yosena, kaweshi kuhambakanamo chikuma kutomesa vivezu vyetu kumilimo yakufwa,*+ mangana tuzachilenga Kalunga ou ayoya mulimo wajilako nyi?+
15 Shikaho napwila muka-kuwanyisa lushiko lwaluhya,+ mangana vaze vasanyika lyehi vatambwileho uswana wahaya myaka yosena uze vashikile,+ mwomwo ikiye afwile mangana avasokole nandando yakusokola+ kukuzombwojoka jishimbi jize vazombwojokele mulushiko lwamwaka.
16 Mwomwo heshoho hali lushiko kuvanga hafwenga mutu muka-kuwanyisa lushiko,
17 mwomwo lushiko lweji kupwanga nangolo nge kunasoloka kufwa, hakuwana nge kalweshi kupwa nangoloko shimbu muka-kuwanyisa lushiko achili wamutonyi.
18 Ngocho naluze lushiko lwamwaka kalwaputukile kuzata chakuzeneka manyingako.
19 Mwomwo omu Mose akumishile kuhana vatu vosena jindongi josena jamuJishimbi, ambachile manyinga avana vavangombe nawawa avapembe, nameya, nawanda uchila, nahusope,* kaha awasapwilile hamukanda* nahali vatu vosena
20 nakwamba ngwenyi: “Awa akiko manyinga alushiko luze Kalunga namilweze ngwenyi mululamenga.”+
21 Kaha asapwilile nawa aze manyinga+ hambalaka nahavyuma vyosena vyakuzachisa kumulimo wajila.*
22 Kaha kweseka nomu mwaya Jishimbi, vyuma vyosena veji kuvitomesanga namanyinga,+ ngocho kuvanga manyinga vawamwange mokomoko jishili kaveshi kujikonekelako.+
23 Shikaho chatelemo vize vifwanyisa+ vyavyuma vyamwilu kuvitomesa+ namanyinga avimuna vakuvatula, olozenyi vyuma vyamwilu vyasakiwile kuvitomesa navimuna vakuvatula veka vakuhambakana kulema.
24 Mwomwo Kulishitu kengilile muchihela chajila chakutunga namavoko+ chize chapwa chifwanyisa chavyuma viveneko,+ oloze engilile mwilu muvene,+ mangana asoloke kumeso aKalunga hali etu.+
25 Kachapwile ngocho mangana alihanenga ivene kakavuluko, nge omu kapilishitu wakulitulaho eji kwingilanga muchihela chajila hamwaka hamwaka+ namanyinga aze kaweshi enyiko.
26 Mokomoko kachi ayanjilenga kakavulu kufuma vene kukwala chihela chakaye. Oloze jino nalisolola ivene kamwe kaha kunahu hachikukulwishi chakatwamino kamyaka yino* mangana afumiseko shili hakulihana ivene kupwa chimuna wakuvatula.+
27 Nge omu vatu vavatongwela kufwa kamwe kaha kunahu, kaha kufumaho numba vavasopese,
28 ngocho naKulishitu nawa vamuhanyine kamwe kaha kunahu mangana ambate jishili javatu vavavulu,+ kahomu mwakasoloka kamuchivali, keshi kukatala vyashiliko, kaha navakamumona kuli vaze vali nakumutalilila chikuma mangana akavalwile.+
Kwinyikila Chamwishi
^ Chipwe “najimbolo jakuhana Kalunga.”
^ Chipwe “hachihela chakulingila chakufwika hashili.”
^ Hela., “nakukumbapachisa.”
^ Hela., “nakutusokola.”
^ Chipwe “nauto wamwanangombe wachihwevo.”
^ Chipwe “kumilimo yamokomoko.”
^ Tala Mukana waMazu.
^ Chipwe “hamukanda wakuvunga.”
^ Chipwe “kumulimo wakuzachila vatu.”
^ Tala Mukana waMazu.
