Wavaka-Efwesu 6:1-24
6 Enu vana, ononokenunga kuli visemi jenu+ nge omu mwaya muchima waMwata, mwomwo echi chinapu chakwoloka.
2 “Vumbikenunga masenu namanenu”+ lukiko lushimbi lwatete luze lukwechi lushiko ngwavo:
3 “Mangana vyuma vimiwahilenga,* mutwamenga lwola lwalusuku hamavu.”
4 Kaha enu masevo nawa, kanda namwivwisanga kupihya vana venuko,+ oloze valelenunga mukuvazangamisa+ namukuhuhumuna* chakuli Yehova.*+
5 Enu vandungo, ononokenunga kuli vakaka jenu*+ nawoma nakuchikima, nakulinga ngocho namuchima wamwenemwene, nge kuli Kulishitu,
6 keshi nakuzata mangana ngwenu vamimone nakwivwisa vatu kuwahako,+ oloze hakupwa muvandungo jaKulishitu vaze vali nakulinga mwaya muchima waKalunga namyono* yavo yosena.+
7 Zatenunga namuchima wamwaza, nge muli nakuzachila Yehova,*+ keshi nge vatuko,
8 mwomwo munatachikiza ngwenu cheshocho chamwaza mwalinga mutu himutu, chikiko vene mwakatambula cheka kuli Yehova,*+ numba apwa ndungo chipwe muka-kulihehwa.
9 Kaha enu vakaka javo nawa, lingenunga mwomumwe kuli vakiko, keshi nakuvakinjilako, mwomwo munatachikiza ngwenu Mwata wavo uze nawa apwa Mwata wenu, ali mwilu,+ kaha ikiye keshi kutala vatu kumesoko.
10 Kukuminyinako, kwatenunga lika ngolo+ muli Mwata namuundume wangolo jenyi.
11 Vwalenu vyuma vyajita+ vyosena vyakuli Kalunga, mangana muhasenga kwimanyina tufuta twaLiyavolo,
12 mwomwo etu katweshi nakulipika*+ navakwechi nyama namanyingako, oloze najifulumende, namawata, navaka-kuyula kaye kamilima yino, namazavu avashipilitu vakuhuka+ vaze vali muvihela vyamwilu.
13 Shikaho mbatenu vyuma vyosena vyajita vyakuli Kalunga,+ mangana muhase kuvemanyina nakole halikumbi lize lyalipi, kaha nge munatesamo lyehi vyuma vyosena, imanenu mbe.
14 Shikaho imanenu, oku munavwale muhya wamuchano mujimbunda+ jenu, nakuvwala nawa chipwiko chakukinga hatulo chakwoloka,+
15 nakuvwala mendelo kumahinji enu mangana mulizange kuvilika mujimbu wamwaza wakuvuluka kuunda.+
16 Kaha nawa mbatenu kepwe yayinene yalufwelelo,+ yize namuhasa kujimisa mivwi yakakahya yosena yayauze wakuhuka.*+
17 Tambulenu nawa litepa lyakukola lyaulwilo,+ napoko yamukwale yashipilitu, yikiko mazu aKalunga,+
18 kaha lwola lwosena lombenunga+ mushipilitu+ nakulomba chosena hohamwe nakulomba chakulembelela chosena. Kaha tonenunga shimbu yosena, nakulombelangako vaka-kujila vosena nakulomba chakulembelela.
19 Ngulombelenungako nayami nawa, mangana vanguhane mazu omu nangulokolola mukanwa kami, mangana nawa nguhase kuhanjika nakumika hakujimbula vyuma vyajila vyakusweka vyamujimbu wamwaza+
20 uze ngunapwila ngumuluwa+ wakukasa mumalenge, mangana nguwambulule nakumika, nganomu ngwatela ami kuhanjika.
21 Jino hakusaka mutachikize vyayami, nomu nguli nakutwamina, Tukiku,+ ou ndumbwetu twazanga, muka-kuzata wakushishika muli Mwata, ikiye mwakamilweza vyosena.+
22 Nguli nakumutuma kuli enu mwomwo yavyumevi, mangana ngwami muhase kutachikiza omu tuli, kaha nawa ngwami akavendejeke michima yenu.
23 Kuli vandumbwetu kupwenga kuunda nazangi hamwe nalufwelelo vyakuli Kalunga Setu naMwata Yesu Kulishitu.
24 Kaha likoji lyalinene lipwenga navosena vaze vazanga Mwata wetu Yesu Kulishitu nazangi yakuzeneka kukuma.
Kwinyikila Chamwishi
^ Chipwe “Mangana mufukilenga.”
^ Chipwe “namukunangula; namukutwaminyina.”
^ Tala Chihande A5.
^ Hela., “vakaka jenu vakumujimba.”
^ Tala Mukana waMazu, “Mwono.”
^ Tala Chihande A5.
^ Tala Chihande A5.
^ Hela., “katweshi nakulwa.”
^ Chipwe “kujimisa matongo akakahya osena ayauze wakuhuka.”
