Wavaka-Fwilipi 1:1-30
1 Etu vaPaulu naChimoteu, etu vandungo jaKulishitu Yesu, tuli nakumisonekela enu vaka-kujila vosena mwalikata naKulishitu Yesu, enu muli muFwilipi,+ natulama navaka-kuzachila:+
2 Likoji lyalinene nakuunda vyakuli Kalunga Setu naMwata Yesu Kulishitu vipwenga nayenu.
3 Ngweji kumusakwililanga Kalunga kami shimbu yosena nge ngunamyanuka
4 nakulembelela chize ngweji kulembelelanga hali enu muvosena. Ngweji kulembelelanga nakuwahilila,+
5 mwomwo yamulimo mwazachile wakutwala mujimbu wamwaza kulutwe kufuma vene kulikumbi lyatete palanga nakulelo lino.
6 Mwomwo ngunafwelela chuma chino ngwami, ou aputukile mulimo wamwaza muli enu mwatwalangaho lika kuuzata nakukaukumisa+ palanga nakulikumbi lyaKulishitu Yesu.+
7 Chinapu chakwoloka ami kushinganyeka ngocho hali enu muvosena, hakuwana nge muli mumuchima wami, enu mutwatambwila hamwe likoji lyalinene hakupwa mumalenge,+ nahakuhakwila mujimbu wamwaza nakuuzamisa najishimbi.+
8 Mwomwo Kalunga napu chinjiho chami omu nguli nakufwila kupwa nayenu muvosena hamwe hazangi yami nge yize atwama nayo Kulishitu Yesu.
9 Kaha echi chikiko ngweji kulombelanga lika, mangana ngwami zangi yenu yitohwenga lika+ nachinyingi chakwoloka,+ nakunangakana chosena,+
10 mangana muhase kukekesa mumone vyuma vyavilemu,+ mangana muzeneke kupwa nakatenga, nakuzeneka kuhukanyisa vakwenu+ palanga nakulikumbi lyaKulishitu,
11 kaha nawa ngwami muhase kuzala namihako yakwoloka, yize yeza kuhichila muli Yesu Kulishitu,+ mangana vamutohwesenga Kalunga nakumwalisanga.
12 Jino enu vandumbwami, ngunasake mutachikize ngwenu, vyuma vinasoloka kuli ami vinalingisa mujimbu wamwaza uzovoloke,
13 ngocho kungukasa chami mumalenge+ mwomwo yaKulishitu chinevwakana+ kuli Vaka-kulama Mwangana vosena nakuli vakwavo veka vosena.
14 Jino vandumbwetu vavavulu vamuli Mwata vanakwate ngolo mwomwo yakungukasa mumalenge, kaha vanomika chikuma nakuhanjika mazu aKalunga chakuzeneka woma.
15 Vamwe vali nakwambulula Kulishitu nalushiushiu navikokojola, oloze veka nawa namuchima wamwaza.
16 Kaha ava ngunavuluka usula vali nakwambulula Kulishitu mwomwo yazangi, mwomwo vanatachikiza ngwavo vanangutongola mangana nguhakwile mujimbu wamwaza.+
17 Oloze ava ngunalivange kuvuluka veji kuchilinganga namuchima wakulikindukila, keshi namuchima wamwenemweneko, mwomwo vali nakusaka kungunehela ukalu omu nguli mumalenge.
18 Jino vyuma muka vyafumineho? Ngwami mweshomwo chapwile, numba mwapwile mwakulyonga, numba mwamuchano, oloze Kulishitu vali nakumwambulula, kaha ngweji kuwahililanga hachuma kanechi. Kaha nanguwahililanga lika,
19 mwomwo ngunatachikiza ngwami kulembelela chenu+ nakungukafwako kuli shipilitu yaYesu Kulishitu nachikangunehela ulwilo.+
20 Omu mukiko vene ngweji kutalililanga nakufwelela ngwami, kangweshi kukevwa sonyi numba chachindendeko, oloze ngwami hakuhanjika nakukasunuka chikuma, Kulishitu navamutohwesa jino kuhichila mumujimba wami, ngana mwamakumbi osena, numba nguyoya numba ngufwa.+
21 Mwomwo ami nge nanguyoya, nanguyoyela Kulishitu,+ kachi nge nangufwa kaha chinapu nganyo.+
22 Jino kachi nge nanguyoyanga lika,* kaha chinapu mihako yakumulimo wami, oloze chuma nangusakulaho kangweshi kuchivulukako.
23 Ami nguli hakachi nakachi kavyumevi vivali, mwomwo nguli nakufwila ngusokoke nakutwamanga naKulishitu hamwe,+ mwomwo echi chikiko chinahambakana chikuma kuwaha.+
24 Oloze ngwatela kuyoyanga lika mwomwo yayenu.
25 Ngocho, hakufwelela chuma kanechi, ngunatachikiza ngwami nangutwamanga nakulipanjika nayenu muvosena hamwe, mangana muzovoloke nakwivwa kuwaha mulufwelelo lwenu,
26 mangana kulisamba chenu chikahambakane chikuma muli Kulishitu Yesu mwomwo yayami hakupwa cheka nayenu hamwe.
27 Oloze twamenunga nganomu mwatela mujimbu wamwaza wakuvuluka Kulishitu,+ mangana numba nge nangwiza nakumitala, numba nge kangweshi kwiza okwoko, ami nguhase kwivwa vyayenu ngwavo munazame mbe mushipilitu yimwe, kaha muvosena muli nakukilikichila lufwelelo lwamujimbu wamwaza namwono umwe,*+
28 nakuhona kumivwisa woma numba chachindende kuli vaka-kole jenu. Mwomwo chuma kanechi chinapu chinjikizo chakusolola kunonga chavo,+ oloze hiulwilo kuli enu,+ kahechi chinapu chakuli Kalunga.
29 Mwomwo enu vanamihane kutokwa kanechi hali Kulishitu, keshi nge kumufwelela kahako, nduma, oloze nakuyanjiwila nawa ikiye.+
30 Mwomwo kulipika muli nakulipika chinapu chochimwe nachize mwamwene kuli ami,+ nge muze munevu noholili ngwavo nguchili nakulipika.
