Wavaka-Kolinde 1 10:1-33
10 Jino enu vandumbwami, ngunasake mutachikize ngwenu, vakakuluka jetu vosena vapwile mwishi yalivwi,+ kaha vosena vahichile mukalungalwiji,+
2 kaha vosena vavambapachishile muli Mose kuhichila mulivwi namukalungalwiji,
3 kaha vosena valile kulya chakushipilitu chochimwe,+
4 kaha nawa vosena vanwine kunwa chakushipilitu chochimwe.+ Mwomwo vapwilenga nakunwa kulilolwa lyakushipilitu lize lyavakavangijilenga, kaha lilolwa kana lyemanyinyineko Kulishitu.*+
5 Chipwe ngocho, vavavulu Kalunga kavevwililile kuwahako, mwomwo vavajihile mupambo.+
6 Jino vyumevi vyapwile vyakutalilaho kuli etu, mangana tuzeneke kufwila vyuma vyavipi nge muze vavifwilililile vakiko.+
7 Kaha kanda namupwa muvaka-kulemesa makombeloko, nge muze vapwile vakwavo vamwe, ngana muze vasoneka ngwavo: “Vatu vatwamine hamavu nakulya nakunwa. Kaha vakatukile nakuputuka kulisamba.”+
8 Kanda natulinganga ujilako,* nge muze valingile vamwe ujila,* kaha kwafwile vatu 23,000 mulikumbi lyangongo.+
9 Kaha nawa kanda natumwesekanga Yehovako,*+ nge muze vamwesekele vamwe, kaha vavanongesele kumanoka.+
10 Kaha kanda namupwanga muvaka-kutatwokako, nge muze vatatwokele vamwe,+ kaha vavanongesele kuli muka-kunongesa.+
11 Jino vyumevi vyasolokele kuli vakiko mangana vipwenga vyakutalilaho, kaha vavisonekelele kutuhuhumuna etu,+ etu vene tuli nakuyoyela kukukuma chakatwamino kamyaka yino.
12 Ngocho ou nashinganyeka ngwenyi nemana azangame kuchina mwalimbuka.+
13 Kakweshi vyeseko vyeka vinamiwaneko shina vize kaha vyeji kuwananga vatu vosena.+ Oloze Kalunga apwa wakushishika, kaha keshi kumyechelela vamyeseke kuhambakana oho hanakumina ngolo jenuko,+ oloze omu navimiwana vyeseko, mwamisela nawa kuulovokelo mangana muhase kumika.+
14 Shikaho, enu vakwetu ngwazanga, chinenu kulemesa makombelo.+
15 Ami nguli nakuhanjika nge kuvatu vakunangakana. Ijivenu enu vavene vyuma nanguhanjika.
16 Uno lupasa lwakisu elu tweji kukisulanga, keshi chikiko kwazana kumanyinga aKulishituko numba?+ Uno mbolo yize tweji kupuzulanga, keshi chikiko kwazana kumujimba waKulishituko numba?+
17 Mwomwo kuli mbolo yimwe, etu numba tuhu tuvavavulu, tunapu mujimba umwe,+ mwomwo tuvosena tuli nakulya kumbolo yoyimwe.
18 Achishinganyekenu hali vaIsalele vakumujimba. Kutala vaze veji kulyanga vimuna vakuvatula kaveshi kwazana nalijiko lyakulumbilako numba?+
19 Uno nguli nakwamba ngwami ika? Kutala nguli nakwamba ngwami chuma chakuvatwila kumakombelo chapwa chachilemu numba, chipwe ngwami likombelo lyapwa lyalilemu numba?
20 Nduma, oloze ngwami vyuma vize veji kuvatulanga vaka-mafuchi veji kuvivatwilanga vandemone, keshi Kalungako,+ kaha ami kangweshi nakusaka mupwenga muvaka-kwazana navandemone hamweko.+
21 Enu kamwatela kunwanga mulupasa lwaYehova* namulupasa lwavandemoneko. Enu kamwatela kulyanga “kumesa yaYehova”*+ nakumesa yavandemoneko.
22 Uno ‘tuli nakusangumuna Yehova* evwenga lisungu’ tahi?+ Uno tunamuhambakana ngolo numba?
23 Vyuma vyosena vavitavisa mujishimbi, oloze keshi vyosena vika-kunganyalisako. Vyuma vyosena vavitavisa mujishimbi, oloze keshi vyosena vika-kutungako.+
24 Mutu himutu kanda mwasakanga kulinganyalisa iveneko, oloze anganyalisenga vakwavo.+
25 Lyenu cheshocho navalandulula hachilanjilo chanyama, chakuzeneka kwihula mwomwo yachivezu chenu,
26 mwomwo “mavu navyuma vyosena vyatwamaho vyapwa vyaYehova.”*+
27 Kachi nge mutu uze ketavako namisanyika kukulya, kahenu nawa munasake kuyako, lyenu tuhu vyeshovyo mwamihana, chakuzeneka kwihula mwomwo yachivezu chenu.
28 Oloze kachi nge mutu umwe mwamilweza ngwenyi: “Echi chakuvatwila kulikombelo,” kaha kanda namukalyakoko mwomwo yamutu uze namilweze, kaha nawa mwomwo yachivezu.+
29 Kangweshi nakwamba chivezu chenuko, shina chamukwenu. Mwomwo kulihehwa chami navachisopesela ikaze kuchivezu chamutu weka?+
30 Kachi nge hakulya ngweji kusakwililanga Kalunga, mwomwo ika navangwambila mwamupi hachuma chize ngweji kusakwililanga Kalunga?+
31 Shikaho, numba nge muli nakulya chipwe muli nakunwa, chipwe cheshocho muli nakulinga, lingenunga vyuma vyosena mujila yize nayimutohwesa Kalunga.+
32 Kanda namupwa muvaka-kuhukanyisa vaYuleya, chipwe vaHelase, chipwe chikungulwilo chaKalungako,+
33 nge muze nayami nguli nakuzata nangolo ngwivwise kuwaha vatu vosena muvyuma vyosena, keshi mangana ngwami ngulinganyalise ami iveneko,+ oloze ngwami ngunganyalise vavavulu, mangana vakahase kuvalwila.+
Kwinyikila Chamwishi
^ Chipwe “lyapwile Kulishitu.”
^ Tala Mukana waMazu.
^ Tala Mukana waMazu.
^ Tala Chihande A5.
^ Tala Chihande A5.
^ Tala Chihande A5.
^ Tala Chihande A5.
^ Tala Chihande A5.
