Wavaka-Kolinde 1 12:1-31
12 Jino enu vandumbwami, kutalisa kumawana akushipilitu,+ kangwasakile ngwami muhone kwijivako.
2 Munatachikiza ngwenu, omu mwapwilenga muvatu vakumafuchi,* vamihungumwishile nakumilumbwila kumakombelo akuhona kuhanjika,+ nakukavanga kweshokwo navamitwala.
3 Shikaho ngunasake mutachikize ngwenu, mutu naumwe wauchi mwahanjika nashipilitu yaKalunga ngwenyi: “Yesu wakwangula,” kaha wauchi nawa mwamba ngwenyi: “Yesu ikiye Mwata,” kuvanga nashipilitu yajila kaha.+
4 Jino kuli mawana akulisezaseza, oloze shipilitu yoyimwe kaha,+
5 kaha kuli milimo yakulisezaseza,+ oloze Mwata youmwe kaha,
6 kaha kuli vyuma vyakuzata vyakulisezaseza, oloze Kalunga youmwe kaha uze eji kuzatanga milimo yosena muli vatu vosena.+
7 Oloze milimo yashipilitu vanayihane kuli mutu himutu mangana yinganyalise vatu.+
8 Umwe vanamuhane hanjikiso yamangana* kuhichila mushipilitu, mukwavo vanamuhane hanjikiso yachinyingi kuhichila mushipilitu yoyimwe,
9 mukwavo vanamuhane lufwelelo+ kuhichila mushipilitu yoyimwe, mukwavo vanamuhane mawana akuhindula vaka-kuviza+ kuhichila mushipilitu yoyimwe,
10 mukwavo kuzata milimo yangolo,+ mukwavo kupolofweta, mukwavo kunangakana mazu vahwima,+ mukwavo kuhanjika malimi akulisezaseza,+ mukwavo kulumbununa malimi eka.+
11 Oloze milimo yosena eyi, veji kuyizatanga kushipilitu yoyimwe kaha, yeji kupangilanga mutu himutu kweseka nomu yasaka.
12 Mwomwo nganomu mujimba wapwa umwe kaha, oloze watwama navilyo vyavivulu, kaha vilyo vyosena vyamujimba kana, numba tuhu vyapwa vyavivulu, vinapu mujimba umwe kaha,+ ngocho omu mukiko mwanapu naKulishitu nawa.
13 Mwomwo kuhichila mushipilitu yimwe, etu tuvosena vatumbapachishile mumujimba umwe, chipwe tuvaYuleya chipwe tuvaHelase, chipwe tuvandungo chipwe tuvakulihehwa, kaha tuvosena vatunwishile shipilitu yimwe.
14 Mwomwo mujimba kawatwama nachilyo chimwe kahako, oloze watwama navilyo vyavivulu.+
15 Kachi nge lihinji nalyamba ngwalyo, “Ami kangweshi nguchihanda chamujimbako mwomwo kangweshi ngulivokoko,” echi keshi chikiko nachilingisa lihinji lihone kupwa chihanda chamujimbako.
16 Kaha kachi nge litwitwi nalyamba ngwalyo, “Ami kangweshi nguchihanda chamujimbako mwomwo kangweshi ngulisoko,” echi keshi chikiko nachilingisa litwitwi lihone kupwa chihanda chamujimbako.
17 Kachi nge mujimba wosena wapwanga liso, kachi uhashi wakwivwa naupwa kulihize? Kachi nge mujimba wosena wapwanga litwitwi kaha, kachi uhashi wakuhumbika livumba naupwa kulihize?
18 Oloze jino Kalunga nalongesa chilyo hichilyo chamujimba nge muze evwila kuwaha.
19 Kaha kachi vyosena vyapwanga chilyo chimwe kaha, kachi mujimba naupwa kulihize?
20 Oloze jino kuli vilyo vyavivulu, oloze mujimba umwe kaha.
21 Liso kalyeshi kuhasa kwamba livoko ngwalyo: “Kangweshi nakukusakako,” namutwe nawa kaweshi kuhasa kwamba mahinji ngwawo: “Kangweshi nakumisakako.”
22 Oloze navilyo vyamujimba vize vyasoloka kupwa vyakuhehela, vyapwa vyavilemu,
23 kaha vihanda vyamujimba vize twashinganyeka ngwetu kavyeshi naulemuko, vikiko twamona kupwa vyavilemu chikuma,+ kaha vihanda vyetu vize vyasoloka kupwa vyamokomoko, vikiko vene twavumbika chikuma,
24 oloze vihanda vyetu vyamwaza kavyeshi kusakiwa vyuma vimweko. Chipwe ngocho, Kalunga natungu mujimba nakuhana ulemu waunene kuchihanda chize chahonene ulemu,
25 mangana mumujimba muzeneke kupwa chihandwa, oloze vilyo vyawo vilizakamenga kanawa navikwavo.+
26 Kaha kachi nge chilyo chimwe nachiyanda, kaha vilyo vyosena naviyanjila hamwe nachikiko,+ mokomoko, kachi nge chilyo chimwe navachitohwesa, kaha vilyo vyosena naviwahilila hamwe nachikiko.+
27 Jino enu munapu mujimba waKulishitu,+ kaha enu muvosena mutu himutu munapu chilyo chawo.+
28 Kaha Kalunga nasakula vatu vakulisezaseza muchikungulwilo. Vatete vaposetolo,+ vamuchivali vapolofweto,+ vamuchitatu vaka-kunangula,+ kufumaho milimo yangolo,+ kufumaho mawana akuhindula vaka-kuviza,+ kaha milimo yakukafwa vatu, kaha uhashi wakutwaminyina,+ kaha malimi akulisezaseza.+
29 Uno vosena vanapu vaposetolo numba? Uno vosena vanapu vapolofweto numba? Uno vosena vanapu vaka-kunangula numba? Uno vosena vanapu vaka-kuzata milimo yangolo numba?
30 Uno vosena vali namawana akuhindula vaka-kuviza numba? Uno vosena veji kuhanjika mumalimi eka numba?+ Uno vosena vanapu vaka-kwalumuna mazu numba?+
31 Oloze fwilenunga chikuma kupwa* namawana amanene.+ Kaha ami nawa nangumilweza jila yakuhambakana kuwaha.+
Kwinyikila Chamwishi
^ Kulumbununa, vaze kavetavako.
^ Chipwe “vanamuhane mujimbu wamangana.”
^ Chipwe “Oloze zatenunga nangolo mupwenga.”
