Wavaka-Kolinde 1 14:1-40
14 Fwilenunga kusolola zangi, kaha fwilenunga chikuma kupwa namawana akushipilitu, oloze chikumanyi fwilenunga kupolofweta.+
2 Mwomwo ou eji kuhanjikanga mulilimi lyeka keshi kuhanjika kuvatuko, oloze kuli Kalunga, mwomwo wauchi eji kwivwangako,+ oloze eji kuhanjikanga vyuma vyajila vyakusweka+ kuhichila mushipilitu.
3 Oloze ou eji kupolofwetanga eji kutunganga vatu nakuvakolezeza nakuvavendejeka namazu enyi.
4 Kaha ou eji kuhanjikanga mulilimi lyeka eji kulitunganga ivene, oloze ou eji kupolofwetanga eji kutunganga chikungulwilo.
5 Ami ngunasake jino ngwami muvosena muhanjikenga mumalimi eka,+ oloze chikumanyi ngunasake ngwami mupolofwetenga.+ Chikupu vene ou eji kupolofwetanga ahambakana ou eji kuhanjikanga mumalimi eka, kuvanga pamo alumune mazu enyi mulilimi lize navevwa vatu mangana chikungulwilo vachitunge.
6 Enu vandumbwami, kachi nge nangwiza kuli enu oholili nakuhanjika mumalimi eka chakuzeneka kuhanjika vyuma vanangusolwela,+ chipwe nachinyingi,+ chipwe naupolofweto, chipwe nakunangula, kaha vyuma muka vyamwaza ngunalingi kuli enu?
7 Omu mukiko vene muchapwa nakuvyuma vyakuzeneka kuyoya vize vyeji kuvumanga, vyakufwana nge panda, chipwe kalyalya. Kuvanga vivumo vililunge kanawa, mokomoko ovyo vanembi hapanda, chipwe hakalyalya navavitachikiza ngachilihi?
8 Mwomwo nge luneta naluvuma chivumo chakuzeneka kulumbunuka, iyaze mwalizanga kuya kujita?
9 Chochimwe nawa nayenu, kuvanga muhanjike mazu amashi kwivwa mumalimi enu, mokomoko evi namuhanjika navavitachikiza ngachilihi? Chikupu vene namuhanjikila mupeho kaha.
10 Muno mukaye munahase kupwa malimi akulisezaseza, oloze kakweshi lilimi limwe navazeneka kwivwako.
11 Jino kachi nge ami nanguhona kwivwa lilimi kana, kaha nangupwa nge ngumuka-lifuchi lyeka kuli uze ali nakuhanjika, kaha uze ali nakuhanjika nawa mwapwa nge himuka-lifuchi lyeka kuli ami.
12 Ngocho nayenu nawa, hakuwana nge mweji kufwilanga chikuma mawana akushipilitu, livulishilenu mawana aze nawatunga chikungulwilo.+
13 Shikaho, ou eji kuhanjikanga mulilimi lyeka, alombenga mangana ahasenga nawa kwalumuna mazu enyi.+
14 Mwomwo kachi nge nguli nakulomba mulilimi lyeka, wana wami washipilitu ukiko uli nakulomba, oloze vishinganyeka vyami kavyeshi nakuzatako.
15 Jino ngulinge muka? Nangulomba nawana washipilitu, kaha nangulomba nawa navishinganyeka vyami. Nangwimba mwaso wakwalisa nawana washipilitu, kaha nangwimba nawa mwaso wakwalisa navishinganyeka vyami.
16 Mokomoko, kachi nge nawalisa Kalunga nawana washipilitu, kaha mutu wakuzeneka kulinangula mwahasa ngachilihi kwamba ngwenyi, “Amene” kuvyuma uli nakulomba, hakuwana nge ikiye katachikijile vyuma uli nakuhanjikako?
17 Ove uli nakulombanga vene mujila yamwenemwene, oloze mukwenu kaweshi nakumutungako.
18 Ngunamusakwilila Kalunga ngwami ngweji kuhanjikanga mumalimi eka amavulu kuhambakana enu muvosena.
19 Chipwe ngocho, nachiwaha ami kuhanjika mazu atanu aze navevwa muchikungulwilo, mangana ngunangule vakwetu,* kuhambakana kuhanjika mazu 10,000 mulilimi lyeka.+
20 Enu vandumbwami, kanda namupwa muvana vavandende mukunangakana chenuko,+ oloze pwenunga muvana vavandende kuupi.+ Kaha mukunangakana chenu pwenunga mwakula lyehi.+
21 Vasoneka muJishimbi ngwavo: “Yehova* nambe ngwenyi, ‘Nangukahanjika kuli vatu ava kuzachisa malimi avaka-mafuchi eka namivumbo yavatu veka, oloze navakakana kungwivwilila.’”+
22 Ngocho malimi eka anapu chinjikizo kuli vatu vaze kavetavako keshi kuli vaka-kwitavako,+ oloze upolofweto unapu wavaka-kwitava keshi wavaka-kuhona kwitavako.
23 Shikaho kachi nge chikungulwilo chosena nachilikungulwila hamwe kuchihela chimwe nakuhanjika vosena mumalimi eka, kaha nge namwingila vatu vakuzeneka kulinangula, mokomoko vaze kavetavako, kutala kaveshi kumyamba ngwavo munazalukako nyi?
24 Oloze kachi nge enu muvosena muli nakupolofweta, kaha mutu uze ketavako, chipwe uze kalinangulako mwengilamo, navamuhanjikila nakumukekesa kanawa kuli vosena.
25 Vyuma vyakuswama vyamumuchima wenyi hinavisoloka, nakumulingisa alimbile chameso hamavu nakumulemesa Kalunga ngwenyi: “Chikupu vene Kalunga ali muli enu.”+
26 Jino nachipwa ngachilihi enu vandumbwami? Enu hakukungulukila hamwe, umwe mwemba samu, mukwavo mwanangula, mukwavo mwasolola vyuma, mukwavo mwahanjika mulilimi lyeka, mukwavo mwalumbununa mazu.+ Vyuma vyosena vilingenunga mangana mulitungenga navakwenu.
27 Kachi nge mutu umwe mwahanjika mulilimi lyeka, kaha chipwenga ngocho kuli vavali chipwe vatatu kunahu, kaha vahanjike ou nahenyi ou nahenyi, kaha umwe atela kwalumuna mazu avo mulilimi navevwa vatu.+
28 Oloze kachi nge kakweshi muka-kwalumuna mazuko, kaha atela kuhola kulu muchikungulwilo, alihanjikise ivene nakuhanjika kuli Kalunga.
29 Vapolofweto+ vavali chipwe vatatu vahanjike, kaha ava vosena vatachikize mwalumbunukila mazu.
30 Oloze kachi nge umwe vanamusolwela vyuma shimbu natwame kuze, kaha uze muka-kuhanjika watete ahole kulu.
31 Mwomwo enu muvosena munahase kupolofweta umwe naumwe, mangana vosena valinangule nakuvakolezeza.+
32 Mawana ashipilitu avapolofweto atela kupwa mungolo javapolofweto.
33 Mwomwo Kalunga kapwa Kalunga waliuyako, oloze wakuunda.+
Nge omu chapwa muvikungulwilo vyavaka-kujila vyosena,
34 mapwevo vaholenga kulu muvikungulwilo, mwomwo kavavetavisa kuhanjikako.+ Oloze valiluulenga,+ nge muze jahanjika nawa Jishimbi.
35 Jino nge vanasake kulinangula vyuma vimwe, kaha vatela kwihula malunga javo kujizuvo javo, mwomwo chinapu chasonyi pwevo kuhanjika muchikungulwilo.
36 Uno kuli enu kukiko kwafumine mazu aKalunga tahi, nyi ejile kuli enu kaha?
37 Kachi nge mutu nashinganyeka ngwenyi apwa kapolofweto chipwe ngwenyi vamuhana wana washipilitu, kaha atela kwitavila ngwenyi vyuma nguli nakusoneka kuli enu vinapu jishimbi jaMwata.
38 Oloze kachi nge mutu mwahombwanyisa vyumevi, kaha naikiye nawa navamuhombwanyisa.*
39 Ngocho enu vandumbwami, fwilenunga chikuma kupolofweta,+ kaha kanda namukanyisa vatu kuhanjika mumalimi ekako.+
40 Oloze vyuma vyosena vilingenunga mwamwenemwene kaha nawa mukulonga.+
Kwinyikila Chamwishi
^ Chipwe “ngunangule vakwetu hakanwa.”
^ Tala Chihande A5.
^ Chipwe pamo, “kachi nge mutu mwahona kutachikiza vyumevi, kaha mwatwamanga lika chakuhona kuvitachikiza.”
