Wavaka-Kolinde 1 15:1-58
15 Jino enu vandumbwami, nangumyanukisa mujimbu wamwaza uze ngwavilikile kuli enu,+ uze vene mwetavilile, uze nawa unamilingisa muzame mbe.
2 Kaha nayenu vali nakumilwila kuhichila mumujimbu kana, kachi nge namulinjilila lika kumujimbu wamwaza uze ngwamyambulilile, kuvanganyi pamo mwalishinyine tuhu kupwa vaka-kwitava.
3 Mwomwo vyuma vyatete vize ngwamihanyine vikiko ngwatambwile nayami nawa, vyakuvuluka ngwavo, Kulishitu afwililile jishili jetu nganomu vyahanjika Visoneka,+
4 vamufunjile,+ kaha vamusangwile+ halikumbi lyamuchitatu+ nganomu vyahanjika Visoneka.+
5 Kaha alisolwele kuli Kefwase*+ nakuli vaze 12.+
6 Kufumaho asolokele kuli vandumbwetu vakuhambakana 500 halwola lwolumwe,+ kaha vavavulu kuvachili nakulelo lino, numba tuhu vamwe vanasavala lyehi tulo twakufwa.
7 Kufumaho asolokele kuli Yakova,+ nakuli vaposetolo vosena.+
8 Kaha kukuminyinako asolokele kuli ami nawa,+ ami ngunafwane nge mutu wakusemuka uvisu.
9 Mwomwo ami yami wamundende hali vaposetolo vosena, kaha kangwatelemo kunguvuluka ngwavo kaposetoloko, mwomwo ngwayanjishilenga chikungulwilo chaKalunga.+
10 Oloze halikoji lyalinene lyaKalunga hakiko ngunapwila nge omu nguli. Likoji lyenyi lyalinene lize vangusolwelele ami kalyayile mwanganaveneko. Ngwakilikichile kuhambakana vosena, oloze keshi nge yamiko, shina likoji lyaKalunga lize nguli nalyo.
11 Shikaho, numba ngupwa ami numba vakiko, evi vikiko tweji kwambululanga, kaha omu mukiko vene mumwetavilile.
12 Jino kachi nge vali nakwambulula ngwavo Kulishitu vamusangula kuvafu,+ nyi mwomwo ika vamwe hali enu veji kwambanga ngwavo kusanguka chavafu chauchiko?
13 Kachi nge kusanguka chavafu chauchiko chikupu, kahanyi naKulishitu vene kavamusangulako.
14 Kaha kachi nge Kulishitu kavamusangulako, kaha kwambulula chetu chinapu chakulishina tuhu, nalufwelelo lwenu nawa lunapu lwakulishina tuhu.
15 Kaha nawa tunapu tuvinjiho jaKalunga vamakuli,+ mwomwo tunahane unjiho hali Kalunga ngwetu asangwile Kulishitu,+ kaha echi chinapu nge tuli nakuhanjika hali uze kavasangulako kachi nge vafu chikupu kaveshi kukavasangulako.
16 Mwomwo kachi nge vafu kaveshi kukavasangulako, kaha naKulishitu nawa kavamusangulako.
17 Jino kachi nge Kulishitu kavamusangulako, kaha lufwelelo lwenu lunapu lwamokomoko, ngocho namupwa lika mujishili jenu.+
18 Kaha navaze vanasavala tulo twakufwa muli Kulishitu, navakiko vananongo haya myaka yosena.+
19 Kachi nge kutalilila tunatalilila muli Kulishitu chinapu kaha chamukuyoya chino, kaha etu yetu vatela kwivwila ushona kuhambakana vatu vosena.
20 Oloze jino Kulishitu vamusangula kuvafu, ikiye mihako yatete yavaze vanasavala lyehi tulo twakufwa.+
21 Hakuwana nge kufwa chejile kuhichila muli mutu umwe,+ ngocho nakusanguka chavafu nawa cheza kuhichila muli mutu umwe.+
22 Mwomwo nganomu vali nakufwa vosena muli Alama,+ ngocho nawa muli Kulishitu mukiko vene navakayoyela vosena.+
23 Oloze mutu himutu nahenyi: Mihako yatete ivene Kulishitu,+ kaha namwiza vaze vakuli Kulishitu halwola lwakupwako chenyi.+
24 Jino kumakumishilo, mwakahana Wangana kuli Ise Kalunga kenyi, omu mwakalinga nge hananongesa lyehi jifulumende josena, namawata osena, nangolo jeka josena.+
25 Mwomwo atela kupwa mwangana nakuyula palanga nomu Kalunga mwakahaka vaka-kole vosena mwishi yavilyachilo vyenyi.+
26 Kufwa chize chapwa muka-kole wakukuminyina, navakachifumisako.+
27 Mwomwo Kalunga “aluwile vyuma vyosena mwishi yavilyachilo vyenyi.”+ Oloze muka-kwimba jisamu hakwamba ngwenyi ‘vyuma vyosena vanaviluula,’+ chasoloka hatoma nge kavulukilile kumwe naUze aluwile vyuma vyosena kuli ikiyeko.+
28 Kahomu navikalinga vyuma vyosena hivanaviluula lyehi kuli ikiye, kaha naivene Mwana nawa mwakaliluula kuli Ou aluwile vyuma vyosena kuli ikiye,+ mangana Kalunga apwenga vyuma vyosena kuli vosena.+
29 Mokomoko vaze vali nakumbapachisa mangana vapwenga vafu navakalinga mukaze?+ Kachi nge vafu kaveshi kukasangukako, kaha ikaze vali nakuvambapachishila mangana vapwenga vafu?
30 Kaha ikaze tuli nakuhakila kuyoya chetu muponde lwola lwosena?+
31 Ngweji kulitalasananga nakufwa hakumbi hakumbi. Omu mukiko vene enu vandumbwami, nge kutesa nakulisamba chami ngweji kulisambanga hali enu muli Kulishitu Yesu Mwata wetu.
32 Kachi nge ngunalipikinga navisuma kuEfwesu,+ nge muze vanalinginga vatu veka,* kaha nachingunganyalisa ikaze? Kachi nge vafu kaveshi kukavasangulako, kahanyi “tulyenu, tunwenu mwomwo hamene natufwa.”+
33 Kanda navamihungumwisako. Kulikata navatu vavapi cheji kwenyekanga* vilinga vyamwaza.+
34 Shinganyekenu mwamangana mulinge mwaya kwoloka, kaha kanda namulinganga shiliko, mwomwo vamwe kaveshi nachinyingi chakutachikiza Kalungako. Ami nguli nakuhanjika ngocho mangana mwivwenga sonyi.
35 Chipwe ngocho, mutu umwe nahase kwihula ngwenyi: “Uno vafu navakavasangula ngachilihi? Uno navakeza namijimba yangachilihi?”+
36 Ove mutu wakuhona mangana. Ocho nautumba kacheshi kusoka nakupwa chachitonyiko kuvanga chivangile kufwa.
37 Kaha ocho nautumba kaweshi kutumba mujimba wacho uze naukakolako, oloze nautumba kaha linona ukawalyo, numba lipwa lyatiliku, numba lyambuto yeka,
38 oloze Kalunga mwalihana mujimba nge omu nasakila ivene, kaha mbuto himbuto mwayihana mujimba wayo.
39 Keshi nge mijimba yosena yapwa yoyimweko, oloze kwatwama mujimba wavatu, kaha kwatwama mujimba watunyama, kaha kwatwama nawa mujimba watujila, kaha ukwavo nawa wavaishi.
40 Kwatwama nawa mijimba yamwilu+ namijimba yahamavu.+ Oloze upahu wamijimba yamwilu wapwa weka, kaha ou wamijimba yahamavu nawa wapwa weka.
41 Upahu walikumbi wapwa weka, kaha upahu wakakweji wapwa weka,+ kaha upahu wavatanganyika nawa wapwa weka, naupahu watanganyika hitanganyika walihandununa.
42 Ngocho omu mukiko chapwa nakusanguka chavafu nawa. Mujimba navaufunda* nakupola, navausangula wakuhona kupola.+
43 Navaufunda wakuhona kavumbi, navausangula nakupwa waupahu.+ Navaufunda wakuhehela, navausangula nakupwa wangolo.+
44 Navaufunda kupwa mujimba wanyama, navausangula kupwa mujimba wakushipilitu. Kachi nge kwatwama mujimba wanyama, kaha kwatwama nawa namujimba wakushipilitu.
45 Omu mukiko vasoneka ngwavo: “Mutu watete Alama apwile jino mutu* wakuyoya.”+ Alama wakukuminyina apwile jino shipilitu yakuhana kuyoya.+
46 Ngocho uze wakushipilitu keshi ukiko wateteko. Oloze uze wamujimba wanyama ukiko watete, kaha kufumaho numba jino uze wakushipilitu.
47 Mutu watete afuma kumavu, kaha wakuumba nalukungu,+ mutu wamuchivali afuma mwilu.+
48 Nganomu apwa ou wakuumba nalukungu, mukiko muvapwa nawa navaze vakuumba nalukungu, kaha nganomu apwa ou wamwilu, mukiko muvapwa nawa navaze vamwilu.+
49 Kaha nganomu twafwana ou wakuumba nalukungu,+ mukiko nawa munatukafwana uze wamwilu.+
50 Oloze enu vandumbwami, nangumilweza ngwami, ou ukwechi nyama namanyinga keshi kuhasa kuswana Wangana waKalungako, chipwe echi cheji kupolanga kacheshi kuhasa kuswana chize chakuhona kupolako.
51 Ivwenu! Nangumilweza vyuma vyajila vyakusweka ngwami: Tuvosena katweshi kukasavala tulo twakufwako, oloze tuvosena navakatwalumuna mweka,+
52 mukapyapya kaha, mukukemwina chaliso, halwola nalukavuma luneta lwamakumishilo. Mwomwo luneta nalukavuma,+ kaha vafu navakavasangula vakuhona kupola, kaha etu navakatwalumuna mweka.
53 Mwomwo echi cheji kupolanga chatela kuvwala chize chakuhona kupola,+ kaha echi cheji kufwanga chatela kuvwala chize chakuhona kufwa.+
54 Oloze echi cheji kupolanga omu nachivwala chize chakuhona kupola, nechi nawa cheji kufwanga omu nachivwala chize chakuhona kufwa, numba jino chitesemo mazu aze vasoneka ngwavo: “Kufwa vanachiminyi haya myaka yosena.”+
55 “Ove kufwa, kufungulula chove chilihize? Ove kufwa, mumunyi wove ulihize?”+
56 Mumunyi wakuneha kufwa ukiko vene shili,+ kaha ngolo jashili jikiko vene Jishimbi.*+
57 Oloze tusakwililenu Kalunga mwomwo natuhane kufungulula kuhichila muli Mwata wetu Yesu Kulishitu.+
58 Ngocho enu vandumbwami ngwazanga, pwenunga vakuzama mbe,+ chakuzeneka kusosoloka, shimbu yosena pwenunga navyuma vyavivulu vyakuzata+ mumulimo waMwata, hakutachikiza ngwenu kukilikita chenu kacheshi chakulishina tuhuko+ kutalisa kuli Mwata.
Kwinyikila Chamwishi
^ Vamuvuluka nawa ngwavo Petulu.
^ Chipwe pamo, “nge muze vashinganyeka vatu.”
^ Chipwe “cheji kupihisanga.”
^ Hela., “navautumba.”
^ Chipwe “mwono.”
^ Chipwe “kaha Jishimbi jeji kuhananga shili ngolo.”
