Wavaka-Kolinde 1 2:1-16
2 Ngocho enu vandumbwami, omu ngwejile kuli enu nakuvilika vyuma vyajila vyakusweka vyaKalunga,+ kangwavihanjikile namazu akukanganako,+ chipwe namangana akukanganako.
2 Mwomwo ami kangwajinyine kutachikiza chuma cheka muli enuko, shina Yesu Kulishitu kaha, uze vasukikile hachitondo.+
3 Kahomu ngwejile kuli enu ngwapwile wakuhehela, ngwapwile nawoma, nakuchikima chikuma.
4 Hanjikiso yami navyuma ngwambulwile kavyapwile namazu amangana akukunyulako, oloze vyapwile naunjiho washipilitu nangolo,+
5 mangana lufwelelo lwenu luzeneke kupendamina hamangana avatu, shina hangolo jaKalunga.
6 Etu tweji kuhanjikanga vyamangana muli ava vanakulu lyehi,+ keshi vyamangana akatwamino kamyaka yinoko,* chipwe avaka-kuyula vamukatwamino kamyaka yino vaze navakanongako.+
7 Oloze tweji kuhanjikanga vyamangana aKalunga avyuma vyajila vyakusweka,+ mangana akusweka aze Kalunga ajinyine chimweza shimbu twapwile tutwamino twamyaka kana tuchili kanda, mangana akatunehele upahu.
8 Awa akiko mangana aze kavatachikiza kuli muka-kuyula numba umwe wamukatwamino kamyaka yinoko,*+ mwomwo kachi nge vawatachikijile, kachi Mwata waupahu kavamusukikile hachitondoko.
9 Oloze nge muze vasoneka ngwavo: “Vyuma vize Kalunga nawahishila vatu vaze vamuzanga, meso anahono kuvimona, matwitwi anahono kuvivwa, kaha nawa kavyengilile mumuchima wamutuko.”+
10 Oloze Kalunga navisolola kuli etu+ kuhichila mushipilitu yenyi,+ mwomwo shipilitu yeji kutalatalanga muvyuma vyosena, namuvyuma vyakujiminyina vyaKalunga.+
11 Mwomwo iyaze hali vatu natachikiza vyuma vyamutu? Kuvanga kaha shipilitu yamutu yize yili muli ikiye. Ngocho nawa, naumwe wauchi natachikiza vyuma vyaKalunga, kuvanga shipilitu yaKalunga kaha.
12 Jino etu katwatambwile shipilitu yakayeko, oloze shipilitu yakufuma kuli Kalunga,+ mangana tutachikize vyuma vize vanatuhane kuli Kalunga mujila yalikoji.
13 Vyuma kana vikiko vene tweji kuhanjikanga, keshi namazu vanangula namangana avatuko,+ oloze nawaze vanangula nashipilitu,+ omu natulumbununa vyuma vyakushipilitu kuzachisa mazu akushipilitu.
14 Mutu wakumujimba keshi kutambula* vyuma vyashipilitu yaKalungako, mwomwo vinapu uleya kuli ikiye, kaha keshi kuhasa kuvitachikizako, mwomwo veji kuvikekesanga mujila yakushipilitu.
15 Oloze mutu wakushipilitu eji kukekesanga vyuma vyosena,+ kaha ikiye kaveshi kumukekesa kumutu numba umweko.
16 Mwomwo “iyaze natachikiza vishinganyeka vyaYehova* numba amunangule?”+ Oloze etu tuli navishinganyeka vyaKulishitu.+
Kwinyikila Chamwishi
^ Tala Mukana waMazu.
^ Tala Mukana waMazu.
^ Chipwe “keshi kwitavila.”
^ Tala Chihande A5.
