Wavaka-Kolinde 1 3:1-23
3 Ngocho enu vandumbwami, ami kangwahanjikile kuli enu kwijiva nge kuvatu vakushipilituko,+ oloze kwijiva nge kuvatu vakumujimba kaha, kwijiva nge kuli vakemba+ muli Kulishitu.
2 Ami ngwaminwishile mavele, kangwamilishile kulya chakutafunyako, mwomwo halwola luze kamwapwile muvakujikizako. Kaha chipwe oholyapwa vene kanda muchijikize,+
3 mwomwo muchili muvakumujimba.+ Hakuwana nge muli enu muli lwiso navikokojola, kutala kamweshi muvatu vakumujimbako+ nyi? Kutala kamweshi nakutambuka nganomu vatambuka vatuko nyi?
4 Mwomwo nge mutu mwamba ngwenyi, “Ami nguwakuli Paulu,” mukwavo ngwenyi, “Ami nguwakuli Apolo,”+ kutala kamweshi nakulinga nge muvatu vakukayeko nyi?
5 Nyi Apolo ikiye iyaze? Kaha Paulu nawa ikiye iyaze? Vanapu vaka-kuzata+ kaha, vaze vamikafwile mwalumuke nakupwa vaka-kwitava, nge muze Mwata avahanyine mutu himutu mulimo wakuzata.
6 Ami ngwatumbile,+ Apolo atukumwinyine meya,+ oloze Kalunga ikiye akoleselenga,
7 mangana ou mwatumba, chipwe ou mwatukumwina meya vazeneke kumwalisa, shina Kalunga uze eji kukolesanga.+
8 Ngocho ou eji kutumbanga nou eji kutukumwinanga meya vanapu umwe,* oloze mutu himutu mwakatambula fweto yenyi kweseka namulimo wenyi.+
9 Mwomwo etu tuvaka-kuzachila hamwe naKalunga. Enu munapu wande uze ali nakulima Kalunga, munapu zuvo yaKalunga.+
10 Ami hakupwa ngukuluwa muka-kutunga,* ngwalile chihela+ kweseka nalikoji lyalinene lyaKalunga lize vangusolwelele, oloze weka ali nakutungilaho. Ngocho mutu himutu anyingililenga omu ali nakutungila hachihela kana.
11 Mwomwo naumwe wauchi mwahasa kwala chihela chekako, shina echi vanale lyehi, chikiko vene Yesu Kulishitu.+
12 Jino kachi nge hachihela kana mutu mwatungilaho naulu, chipwe napalata, chipwe namalolwa andando yayinene, chipwe namitondo, chipwe namwila, chipwe navisachi,
13 mulimo wamutu himutu naukasoloka omu wapwa,* mwomwo likumbi lize nalikausolola, kakahya kakiko nakakausolola.+ Kakahya kavene nakakeseka mulimo natungu mutu himutu.
14 Kachi nge mulimo wamutu uze natungilaho naukasalaho, kaha mwakatambula fweto,
15 oloze kachi nge mulimo wamutu naukawema, kaha mwakavindama, oloze ikiye navakamulwila. Chipwe ngocho nachikapwa kwijiva nge nahichi mukakahya.
16 Uno kamwatachikijile ngwenu enu munapu tembele yaKalunga,+ kaha ngwenu shipilitu yaKalunga yatwama muli enuko tahi?+
17 Kachi nge mutu mwenyeka tembele yaKalunga, kaha Kalunga mwamwenyeka naikiye, mwomwo tembele yaKalunga yinapu yajila, kaha enu yenu vene tembele kana.+
18 Mutu kanda alitangisa iveneko: Kachi nge hali enu hali mutu nashinganyeka ngwenyi ali namangana mukatwamino kamyaka yino,* kaha alilingise kupwa chileya, mangana apwenga muka-mangana.
19 Mwomwo mangana akaye kano anapu uleya kuli Kalunga, mwomwo vasoneka ngwavo: “Vaka-mangana eji kuvakwachilanga kukulunguluka chavo.”+
20 Kaha nawa ngwavo: “Yehova* atachikiza ngwenyi vishinganyeka vyavaka-mangana vyapwa vyaufwefwelekete.”+
21 Shikaho kanda nakupwa mutu mwalisashilanga hali vatu vakwavoko, mwomwo vyuma vyosena vinapu vyenu,
22 chipwe Paulu, chipwe Apolo, chipwe Kefwase,*+ chipwe kaye, chipwe kuyoya, chipwe kufwa, chipwe vyuma viliko, chipwe vyuma navikeza, vyosena vinapu vyenu,
23 kaha enu nawa munapu muvakuli Kulishitu,+ kaha Kulishitu nawa napu wakuli Kalunga.
Kwinyikila Chamwishi
^ Chipwe “vali nakujina chochimwe.”
^ Chipwe “hakupwa ngumuka-kutunga wamangana.”
^ Hela., “naukasoloka hatoma.”
^ Tala Mukana waMazu.
^ Tala Chihande A5.
^ Vamuvuluka nawa ngwavo Petulu.
