Wavaka-Kolinde 1 4:1-21
4 Mutu atela kutumona ngwenyi tunapu vaka-kukafwa vaKulishitu, ngwenyi tunapu tuselwa havyuma vyaKalunga vyajila vyakusweka.+
2 Ngocho jino chuma vatonda muli tuselwa shina kupwa vakushishika.
3 Kuli ami chinapu chamokomoko kungukekesa kuli enu, chipwe kujizango javatu jakusopela milonga. Mwomwo nayami ivene kangweshi kulikekesako.
4 Mwomwo ami kangwatachikijile chuma numba chimwe chakulihanyina ami ivene mulongako. Chipwe ngocho, kangwalimona ngwami nguwakwolokako, mwomwo ou eji kungukekesanga shina Yehova* kaha.+
5 Shikaho kanda namuyula+ chuma numba chimweko shimbu kanda lwola luvene luhete, kuvanga Mwata neza. Ikiye mwakaneha vyuma vyakusweka vyamumilima kumusana, nakusolola hatoma vyuma vajina vatu mumichima yavo. Kufumaho numba mutu himutu vakamwalise kuli Kalunga.+
6 Jino enu vandumbwami, vyumevi ngunavipandamisa kuli ami ivene nakuli Apolo,+ mangana munganyalileho, kaha nawa mulinangule kuli etu lushimbi elu ngwavo: “Kanda kuhambakana havyuma vasonekako,” mangana muzeneke kulivwimba,+ muzeneke kuzanga mutu umwe nakulumbilisa mukwavoko.
7 Mwomwo iyaze nakulingisa kupwa uwamulemu kuhambakana mukwenu? Uno chuma chikaze uli nacho chize wazenekele kutambula?+ Jino kachi nge wachitambwile, kaha ikaze uli nakulisashila kwijiva nge kawachitambwileko?
8 Uno munekuta lyehi tahi? Uno munahete lyehi luheto nyi? Uno munaputuka lyehi kuyula nge vamyangana+ chakuzeneka yetu nyi? Kachi mwaputukanga kuyula nge vamyangana, kachi chinawahe mangana nayetu nawa tuyule hamwe nayenu nge vamyangana.+
9 Mwomwo ami ngunamono ngwami, etu vaposetolo, Kalunga natunehe mukukuminyina hatoma nge vatu vanatongwela kukufwa,+ mwomwo tunapu tuchuma chize kali nakutala kaye,+ navangelo, navatu.
10 Etu tuvileya+ mwomwo yaKulishitu, oloze enu munazangama muli Kulishitu. Etu tunahehela, oloze enu munajikiza. Enu vanamihane ulemu, etu vanatusaula.
11 Palanga nakuola yino tuchili lika nakwivwa zala+ nalipwila+ nawa, tuchili lika nauvu,* kaha chivatuveta lika,+ katweshi namembo akutwamako,
12 tuchili lika nakufulyangila, nakuzata milimo namavoko etu.+ Hakututukana, etu tweji kukisulanga.+ Hakutuyanjisa, etu tweji kumikanga.+
13 Hakutuvangijikila vyavipi, etu tweji kukumbululanga mujila yayivwovu.*+ Etu tunapu kwijiva nge swali yakaye,* kwijiva nge tumajilo avyuma vyosena palanga nakulelo lino.
14 Ami kangweshi nakusoneka vyumevi mangana ngwami ngumivwise sonyiko, oloze mangana ngumihuhumune nge vana vami ngwazanga.
15 Mwomwo numba tuhu muli navaka-kumilama* 10,000 muli Kulishitu, oloze chikupu vene kamweshi namasenu vavavuluko, mwomwo muli Kulishitu Yesu ami ngunapu ngusenu kuhichila mumujimbu wamwaza.+
16 Shikaho ngunamilembelela ngwami, ngulondezezenunga.+
17 Shikaho nguli nakumitumina Chimoteu, mwomwo apwa mwanami ngwazanga muli Mwata kaha nawa wakushishika. Mwakamyanukisanga jijila jami jakulingilamo vyuma vyakupandama kuli Kulishitu Yesu,+ nganomu nguli nakunangula kwosena muchikungulwilo hichikungulwilo.
18 Vamwe vanalivwimbi kwijiva nge ami kangweshi kwiza kuli enuko.
19 Oloze nangwiza kuli enu kalinwomu kachi nge Yehova* netava, kaha nangwiza nakutachikiza ngolo javaze vanalivwimbi, keshi nge ovyo veji kuhanjikangako.
20 Mwomwo Wangana waKalunga kawapendamina hakuhanjikako, oloze hangolo.
21 Enu munasake ika? Munasake ngwenu ngwizenga kuli enu nambwechi+ tahi, nyi nazangi nashipilitu yayivwovu?
Kwinyikila Chamwishi
^ Tala Chihande A5.
^ Hela., “tuchili lika uselesele.”
^ Hela., “etu tweji kulembelelanga.”
^ Chipwe “nge majilo akaye.”
^ Chipwe “navaka-kuminangula.”
^ Tala Chihande A5.
